قازاقستانداعى تانىمال تاۋەلسىز مەديا — «وردا» رەداكتسياسى ءوز باسىلىمىنا قارسى جۇيەلى قىسىم مەن رەيدەرلىك شابۋىل جاسالىپ جاتقانىن حابارلادى. باسىلىمنىڭ ايتۋىنشا، سوڭعى التى اي ىشىندە جۋرناليستەر مەن باس رەداكتور گۇلنار باجكەنوۆا قۋدالاۋعا ۇشىراپ، ءانونيمدى قورقىتۋلار مەن اقپاراتتىق شابۋىلداردىڭ نىساناسىنا اينالعان، دەپ حابارلايدى “ادىرنا”.
باجكەنوۆانىڭ مالىمەتىنشە، بەلگىسىز ادامدار جۋرناليستەردىڭ تۇرعىلىقتى مەكەنجايلارىنا بارىپ، وزدەرىن پوليتسيا قىزمەتكەرلەرى رەتىندە تانىستىرىپ، كورشىلەردەن سۇراۋ جۇرگىزۋدە. ولار فوتوروبوتتار كورسەتىپ، جۋرناليست «ىزدەۋدە» دەپ اقپارات تاراتىپ جاتىر. سونىمەن قاتار، قىزمەتكەرلەردىڭ جەكە دەرەكتەرى مەن تەلەفون نومىرلەرى ينتيمدىك قىزمەت ۇسىناتىن سايتتار مەن OLX سىندى پلاتفورمالاردا جالعان جارنامالارمەن جاريالانۋدا.
«جالعان الەۋمەتتىك جەلى اككاۋنتتارى ارقىلى جۋرناليستەردىڭ اتىنان شىندىققا جاناسپايتىن مالىمەتتەر، سونىڭ ىشىندە باس رەداكتوردىڭ قايتىس بولعانى جونىندە فەيك حابارلامالار تارالىپ جاتىر»، — دەپ جازدى باسىلىم.
رەداكتسيا «وردا» اككاۋنتتارىنىڭ الەۋمەتتىك جەلىلەردە ءجيى بۇعاتتالاتىنىن دا مالىمدەدى. قۇپيا چاتتاردا رەداكتسيا قىزمەتكەرلەرىنە قاتىستى دەنساۋلىعىنا جانە ومىرىنە تونەتىن قاۋىپ جونىندە اشىق جازىلعان.
باسىلىمدى باقىلاۋعا الۋعا باعىتتالعان ءتۇرلى ارەكەتتەر ءساتسىز بولعاننان كەيىن، ىقپالدى ادامدار «وردا» زاڭدى تۇلعاسىن تارتىپ الۋعا كىرىسكەن. مۇنداي ارەكەتتەردى رەداكتسيا رەيدەرلىك باسىپ الۋ دەپ باعالاپ وتىر.
«تاۋەلسىز باق رەتىندە ءبىز قانداي دا ءبىر ورتالىقتاندىرىلعان جۇيەگە قوسىلۋدان باس تارتتىق. وسىعان بايلانىستى ءبىزدىڭ زاڭدى تۇلعامىزدى كۇشپەن يەمدەنۋ جوسپارى جاسالىپ وتىر»، — دەلىنگەن مالىمدەمەدە.
قازىرگى ۋاقىتتا رەداكتسيا قۇقىق قورعاۋ ورگاندارىنا رەسمي ارىز دايىنداپ، جاقىن كۇندەرى ءباسپاسوز كونفەرەنتسياسىن وتكىزۋدى جوسپارلاپ وتىر. وندا بۇل شابۋىلداردىڭ ارتىندا كىم تۇرعانى تۋرالى ناقتى دەرەكتەر ۇسىنىلاتىنى حابارلاندى.
