Premer-ministrdıŋ orynbasary – Ūlttyq ekonomika ministrı Serık Jūmanǧarin jurnalisterdıŋ sūraǧyna jauap beruden bas tartty, dep habarlaidy «Adyrna» tılşısı.
Senat otyrysynyŋ brifingınde BES.media jurnalisı ministrlıktıŋ mälımetı boiynşa 200 mlrd teŋgeden astam salyqty biudjetke tölemegen kompaniiaǧa qatysty sūraq qoidy. Serık Jūmanǧarin ol kompaniianyŋ atyn ataudan bas tartyp, jurnalister ortasynan mūrnyn şüiırıp ötıp, zaldan şyǧyp kettı. Odan keiın qoiylǧan qosymşa sūraqtar da jauapsyz qaldy.
Būǧan deiın joǧary şendı şeneunık AHQO kesırınen milliardtaǧan salyq tölenbeitının aitqan edı.
«Bız salyqty joǧaltyp jatyrmyz, öitkenı AHQO Qazaqstandaǧy qandai da bır qosymşa offşorǧa ainaluy mümkın. Men naqty käsıporyndardy atamai-aq qoiaiyn, bıraq solardyŋ bırı bas keŋsesın holding arqyly sol jerge köşırgen. Sonyŋ saldarynan bız KTS pen QQS salyqtarynan 200 milliardtan astam şyǧynǧa ūşyradyq»,–dedı ol.
Eske salaiyq, aqpan aiynda Serık Jūmanǧarin qosylǧan qūn salyǧyn köteru jaily bastamanyŋ avtoryn ataudan bas tartyp, mäselenı jabudy sūraǧan bolatyn. Jurnalisterdıŋ sūraǧyna ol «Ony ne ısteisız?» dep qarsy saual qoiǧan.
Al 2024 jyldyŋ qazanynda Ükımet brifingınde Jūmanǧaringe «Premer-ministr bolǧyŋyz kele me?» degen sūraq qoiyldy. Ministr būl sūraqqa da jauap beruden bas tartty.
Jūmanǧarin Ūlttyq ekonomika ministrınıŋ orynbasary lauazymynda bolǧan kezde de synǧa ūşyraǧan bolatyn. Ol 2019 jyly tarifter jaily qoiǧan jurnalisterdıŋ sūraǧyna «Jynymdy keltırmeşı» dep jauap qatqan. Keiın şeneunık būl sözı üşın BAQ ökılderınen keşırım sūrady.
