كاسىبي مەرەكە قارساڭىندا تۇركىستان وبلىسىندا بۇقارالىق اقپارات قۇرالدارى سالاسىنىڭ وكىلدەرىنە مەملەكەت باسشىسى قاسىم-جومارت توقاەۆتىڭ اتىنان باسپانا كىلتى تابىستالدى.
پرەزيدەنتتىڭ تاپسىرماسىنا سايكەس، ەلىمىزدە رەسپۋبليكالىق بۇقارالىق اقپارات قۇرالدارىنىڭ عانا ەمەس، وڭىرلىك جۋرناليستەردىڭ دە الەۋمەتتىك جاعدايىن جاقسارتۋعا باعىتتالعان باستاما جۇزەگە اسىرىلۋدا. وسىعان وراي تۇركىستان وبلىسىنىڭ بۇقارالىق اقپارات قۇرالدارى سالاسىندا ەڭبەك ەتىپ جۇرگەن ازاماتتار جاڭا باسپانالى بولدى.
سالتاناتتى راسىمدە تۇركىستان وبلىسىنىڭ اكىمى نۇرالحان كوشەروۆ مەملەكەت باسشىسىنىڭ اتىنان جاڭا پاتەرلەردىڭ كىلتىن تابىستاپ، جۋرناليستەردى كاسىبي مەرەكەلەرىمەن قۇتتىقتادى.
پرەزيدەنت تاپسىرماسى اياسىندا تۇركىستان وبلىسىندا باسپاناعا يە بولعانداردىڭ ءبىرى – «24KZ» تەلەارناسىنىڭ تۇركىستان وبلىسىنداعى تەلەوپەراتورى ەربولات ءابىشوۆ. كوپ جىلدىق اقپارات سالاسىنداعى ەڭبەگىمەن تانىلعان تەلەوپەراتورعا تۇركىستان قالاسىنان قاجەتتى جيھازبەن جابدىقتالعان جاڭا پاتەردىڭ كىلتى تابىستالدى.
ەربولات ءابىشوۆ ەڭبەك جولىن 2000 جىلى قازىعۇرت اۋداندىق تەلەارناسىندا باستاپ، كەيىن وبلىستىق جانە رەسپۋبليكالىق تەلەارنالاردا قىزمەت اتقاردى. 2012 جىلدان بەرى «حابار» اگەنتتىگىنىڭ تۇركىستان وبلىسىنداعى تەلەوپەراتورى رەتىندە ەل ومىرىندەگى ماڭىزدى وقيعالاردى كاسىبي دەڭگەيدە كورەرمەنگە جەتكىزىپ كەلەدى. ونىڭ كوپجىلدىق تاجىريبەسى مەن ادال ەڭبەگى ارىپتەستەرى اراسىندا جوعارى باعالانادى.
ەكىنشى باسپانا سوزاق اۋداندىق قوعامدىق-ساياسي «سوزاق ءۇنى» گازەتىنىڭ جاۋاپتى حاتشىسى نۇرسۇلتان شەرتاەۆقا تابىستالدى. ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىنىڭ تۇلەگى نۇرسۇلتان شەرتاەۆ 13 جىلدان بەرى اۋداندىق باسىلىمدا تابىستى ەڭبەك ەتىپ، ءوڭىردىڭ الەۋمەتتىك-ەكونوميكالىق دامۋىن، قوعامدىق ءومىرى مەن ەلدىك باستامالاردى تۇراقتى تۇردە ناسيحاتتاپ كەلەدى. پرەزيدەنت باستاماسى اياسىندا ول تۋعان ولكەسى – سوزاق اۋدانىنان باسپانالى بولدى.
وبلىس اكىمى نۇرالحان كوشەروۆ جۋرناليستەردى كاسىبي مەرەكەلەرىمەن قۇتتىقتاپ، مەملەكەت باسشىسى بۇقارالىق اقپارات قۇرالدارى قىزمەتكەرلەرىنىڭ ەڭبەگىن ءاردايىم جوعارى باعالايتىنىن اتاپ ءوتتى.
– پرەزيدەنتىمىز قاسىم-جومارت كەمەلۇلى توقاەۆ اقپارات سالاسى قىزمەتكەرلەرىنىڭ ەڭبەگىن ءاردايىم جوعارى باعالاپ كەلەدى. بۇگىن مەملەكەت باسشىسىنىڭ اتىنان وزدەرىڭىزگە باسپانا كىلتىن تابىستاۋ – زور مارتەبە. بۇل – جۋرناليستەردىڭ قوعامداعى ءرولىن ايقىندايتىن، ولاردىڭ الەۋمەتتىك جاعدايىن جاقسارتۋعا باعىتتالعان ناقتى قولداۋ. ەل يگىلىگى جولىنداعى ەڭبەكتەرىڭىز جەمىستى بولىپ، قالامدارىڭىز مۇقالماسىن. سىزدەرگە شىعارماشىلىق تابىس، وتباسىلارىڭىزعا اماندىق تىلەيمىن، – دەدى وبلىس اكىمى.
ايتا كەتەيىك، مەملەكەت باسشىسىنىڭ باستاماسىمەن سوڭعى جىلدارى بۇقارالىق اقپارات قۇرالدارى قىزمەتكەرلەرىن الەۋمەتتىك قولداۋ شارالارى جۇيەلى تۇردە جۇزەگە اسىرىلىپ كەلەدى. بيىل العاش رەت وڭىرلىك جۋرناليستەرگە دە باسپانا بەرۋ تۋرالى شەشىم قابىلدانۋى – اقپارات سالاسى ماماندارىنىڭ ەڭبەگىنە كورسەتىلگەن زور قۇرمەتتىڭ ءارى مەملەكەت قامقورلىعىنىڭ ايقىن كورىنىسى.
بۇل باستاما جۋرناليستەردىڭ الەۋمەتتىك ءال-اۋقاتىن ارتتىرۋمەن قاتار، ولاردىڭ كاسىبي قىزمەتىنە جاڭا سەرپىن بەرىپ، ەل دامۋى جولىنداعى جاۋاپتى مىندەتتەردى ساپالى اتقارۋىنا بەرىك نەگىز قالايدى.
