«AMANAT» پارتياسى دەنساۋلىق ساقتاۋ سالاسىنىڭ بۇگىنى مەن كەلەشەگى تۋرالى اشىق اڭگىمەلەسۋ ماقساتىندا ەلىمىزدىڭ بارلىق وڭىرىندەگى 600-دەن استام دارىگەردىڭ، مەدبيكەلەردىڭ، عالىمداردىڭ، مەديتسينالىق ۇيىمدار باسشىلارىنىڭ جانە ساراپشىلاردىڭ باسىن قوستى. «دارىگەر Talks» پارتيالىق ديالوگ الاڭىنىڭ II وتىرىسىنا قاتىسۋشىلار وتاندىق مەديتسينادا ورىن العان جۇيەلى ماسەلەلەردى تالقىلاپ، ونى شەشۋ جولدارىن ۇسىندى جانە ءوز تاجىريبەلەرىمەن ءبولىستى.
ءسوز باسىندا ءماجىلىس سپيكەرى، «AMANAT» پارتياسىنىڭ توراعاسى ەرلان قوشانوۆ ءىس-شاراعا قاتىسۋشىلاردى وتكەن مەديتسينا قىزمەتكەرى كۇنىمەن قۇتتىقتادى. ول دارىگەرلەردىڭ ەل ومىرىندەگى ەرەكشە ءرولىن اتاپ ءوتىپ، دەنساۋلىق ساقتاۋ جۇيەسىن دامىتۋ ماسەلەسى اركەز مەملەكەت باسشىسىنىڭ نازارىندا ەكەنىن جەتكىزدى.
«پرەزيدەنت قاسىم-جومارت توقاەۆ اتاپ وتكەندەي، مەديتسينا قىزمەتكەرلەرى، بەيبىت كۇننىڭ باتىرلارى دەگەن اتقا لايىق. بۇگىندە وتاندىق مەديتسينا جارقىن ناتيجە كورسەتۋدە. ءبىزدىڭ دارىگەرلەرىمىز ساناۋلى مەملەكەتتە عانا قول جەتىمدى ەڭ كۇردەلى ترانسپلانتاتسيالىق وتالار جاسايدى. «AMANAT» پارتياسىمەن بىرگە العا قويعان ارمان-ماقساتتارىڭىزعا جەتىپ، ازاماتتارىمىزدىڭ دەنساۋلىعى مەن تۇرمىسىن جاقسارتۋ جولىندا قالتقىسىز قىزمەت ەتىپ كەلەسىزدەر. بۇل – ءبىز ءۇشىن اسا ماڭىزدى»، – دەدى ول.
ءماجىلىس توراعاسى مەديتسينا قاۋىمداستىعىنىڭ وكىلدەرى «AMANAT»-تىڭ ماڭىزدى تىرەگى ەكەنىن اتاپ ءوتتى. سەبەبى ءاربىر ءۇشىنشى مەديتسينا قىزمەتكەرى – پارتيا مۇشەسى. وسى ورايدا، «دارىگەر Talks» پلاتفورماسى وتاندىق مەديتسينانىڭ وزەكتى ماسەلەلەرى اشىق تالقىلاناتىن جانە ونى ودان ءارى دامىتۋ بويىنشا ماڭىزدى مىندەتتەر ازىرلەنەتىن بىرەگەي الاڭعا اينالدى. ماسەلەن، وزەكتى تاقىرىپتاردىڭ ءبىرى – اۋىلداعى مەديتسينا قىزمەتكەرلەرىنىڭ تاپشىلىعى. اتالعان ماسەلەنى شەشۋ ماقساتىندا اۋىلدىق جەرگە كوشىپ بارعان 700-گە جۋىق مەديتسينا قىزمەتكەرىنە بىلتىردان باستاپ 100 ەتج (شامامەن 9 ملن تەڭگە) كولەمىندە كوتەرمە جاردەماقى تولەندى. بۇل نورما «AMANAT» پارتياسىنىڭ سايلاۋالدى باعدارلاماسىندا قاراستىرىلعان ەدى.
سونداي-اق دەپۋتاتتىق كورپۋس پەن دەنساۋلىق ساقتاۋ مينيسترلىگىنىڭ بىرلەسكەن جۇمىسى ارقىلى مەديتسينا قىزمەتكەرلەرىنە بىلىكتىلىك ساناتتارىن بەرۋدىڭ جاڭا جۇيەسى وزگەرتىلدى. مىڭداعان دارىگەر مەن مەدبيكە تەستىلەۋسىز بالامالى بىلىكتىلىك دەڭگەيىن الدى. بۇل – مەديتسينا قىزمەتكەرلەرىنىڭ پارتياعا جولداعان كوپتەگەن وتىنىشىنە جاۋاپ رەتىندە قابىلدانعان شەشىم. بۇعان قوسا، ماجىلىستەگى «AMANAT» فراكتسياسىنىڭ مۇشەلەرى ءدارى-دارمەكتەر مەن مەديتسينالىق قىزمەتتەرگە 10% ققس ەنگىزۋگە قارسىلىق ءبىلدىردى.
پرەزيدەنت تاپسىرماسى بويىنشا دارىگەرلەردى كاسىبي ساقتاندىرۋ جۇيەسى ەنگىزىلدى: بۇدان بىلاي دارىگەردىڭ قاتەلىگىنەن ورىن العان شىعىندار مامانداردىڭ جەكە قاراجاتىنان ەمەس، بيۋدجەت ەسەبىنەن جابىلادى.
الايدا وتاندىق دارىلىك پرەپاراتتارمەن قامتاماسىز ەتۋ، ءمامس جۇيەسىنىڭ اشىقتىعى سىندى بىرقاتار ماسەلە ءالى دە بار. مەديتسينا قىزمەتكەرلەرىنە قول جۇمساۋ ماسەلەسى تولىق شەشىلگەن جوق. بۇگىندە مەديتسينا قىزمەتكەرلەرىنىڭ كاسىبي قىزمەتىنە وزگە تۇلعالاردىڭ كەدەرگى كەلتىرۋىنەن قورعايتىن نورمالار كۇشەيتىلدى. سونىمەن قاتار «AMANAT» فراكتسياسىنىڭ مۇشەلەرى دارىگەرلەرگە قاتىستى زورلىق-زومبىلىق جاساعان ادامدار ءۇشىن جەكە قىلمىستىق جاۋاپكەرشىلىك قاراستىرۋ ماسەلەسى بويىنشا تۇزەتۋلەر ەنگىزۋگە باستاماشىلىق ەتتى.
سونداي-اق ءىس-شارا بارىسىندا پرەمەر-ءمينيستردىڭ ورىنباسارى ەرمەك كوشەرباەۆ جانە دەنساۋلىق ساقتاۋ ءمينيسترى اقمارال ءالنازاروۆا ءسوز سويلەدى. ال «دارىگەر Talks» پارتيالىق ديالوگ الاڭىنا قاتىسۋشىلار وزدەرىنىڭ جەكە قالىپتاسۋ تاريحىمەن ءبولىسىپ، ارىپتەستەرىمەن بىرگە كاسىبي سىن-تەگەۋرىندەردى تالقىلادى.
ماسەلەن، قىزىلوردا قالاسىنداعى كوپ بەيىندى وبلىستىق اۋرۋحانانىڭ №1 تەراپيا بولىمشەسىنىڭ مەڭگەرۋشىسى، ەندوكرينولوگ ەلەنا تسحاي بولماشى گورمونالدىق اقاۋلاردىڭ ءوزى كۇردەلى ماسەلە تۋىنداتۋى مۇمكىن ەكەنىن، سوندىقتان تاۋەكەلدى ۋاقتىلى انىقتاپ، ەم قابىلداي باستاۋ اسا ماڭىزدى ەكەنىن ايتتى.
قازاقستان مەديتسينالىق تۋريزم قاۋىمداستىعىنىڭ پرەزيدەنتى كريستينا كريۆەتستىڭ ايتۋىنشا، قازاقستاندا مەديتسينالىق قىزمەت قۇنى دامىعان ەلدەرگە قاراعاندا ايتارلىقتاي ارزان، الايدا ەمدەۋ ساپاسى الەمدىك ستاندارتتارعا ساي كەلەدى. بۇل – ەلىمىزگە كەلەتىن شەتەلدىك مەديتسينالىق تۋريستەر ءۇشىن اسا تارتىمدى. جىل سايىن الەمدەگى 45 مەملەكەتتىڭ 10 مىڭنان استام ازاماتى ەم قابىلداۋ ءۇشىن قازاقستانعا ارنايى ات باسىن بۇرادى.
جەتىسۋ وبلىسى اقسۋ اۋدانىنىڭ جەدەل جاردەم فەلدشەرى سايات مىرزاحانوۆ دارىگەردىڭ تاباندىلىعى مەن تاپقىرلىعى قانشالىقتى ماڭىزدى ەكەنىن اتاپ ءوتتى. ماسەلەن، جاڭبىر جولدى شايىپ، كولىكپەن ءجۇرۋ مۇمكىن بولماي قالعان كەزدە، ساياتتىڭ اتقا مىنۋىنە تۋرا كەلگەن ەدى. وسىلايشا، ول ناۋقاسقا ۋاقتىلى جەتتى.
اقتوبەدەگى م.وسپانوۆ اتىنداعى باتىس قازاقستان مەديتسينا ۋنيۆەرسيتەتىنىڭ راديولوگيا كافەدراسىنىڭ مەڭگەرۋشىسى ەربولات ىزتىلەۋوۆ ادام پاپيللوماۆيرۋسىنا قارسى ەكپەگە نەمقۇرايدى قاراۋدىڭ قايعىلى سالدارىنا نازار اۋداردى. سەمەيدەگى پەريناتالدىق ورتالىقتىڭ نەوناتالدىق بلوگىنىڭ باسشىسى گۇلجازيرا دۇيسەكەنوۆا جۇكتىلىكتىڭ 25-ءشى اپتاسىندا دۇنيەگە كەلگەن سالماعى نەبارى 470 گراممدى قۇرايتىن قىزدى دارىگەرلەر قالاي امان الىپ قالعانىن ايتتى. دارىگەرلەر 117 كۇن بويى نارەستەنىڭ ءومىرى ءۇشىن كۇرەستى.
پەتروپاۆل قالاسىنداعى كوپسالالى وبلىستىق بالالار اۋرۋحاناسىنىڭ كونسۋلتاتيۆتىك-دياگنوستيكالىق ورتالىعىنىڭ مەڭگەرۋشىسى ارلان بالتابەكوۆ اپپاراتتىق تەلەمەديتسينانى قولدانۋ بارىسىنداعى جەتىستىكتەرمەن ءبولىستى. وسى ارقىلى شالعاي اۋىلداردىڭ تۇرعىندارى وبلىس ورتالىعىنا قاتىناماي-اق تار بەيىندى مەديتسينالىق كومەككە قول جەتكىزۋدە. «Esen Foundation» قورىنىڭ دەنساۋلىق ساقتاۋ سالاسىنا قاتىستى جوبالارىنىڭ جەتەكشىسى لەيلا يشباەۆا اقمولا وبلىسى تسەلينوگراد اۋدانىندا «Baquatty audan» پيلوتتىق جوباسىن جۇزەگە اسىرۋدىڭ ارالىق قورىتىندىسىن ۇسىندى. وسىلايشا، مەنتورلىق جۇيەنى ەنگىزۋ ارقىلى اۋىلداعى 300 ماماننىڭ استاناداعى ارىپتەستەرىمەن تىكەلەي كەڭەسۋ مۇمكىندىگى پايدا بولدى. بۇل قادام ساپالى ءالى جەدەل شەشىم قابىلداۋ دەڭگەيىن ارتتىرۋدا.
ورتالىق كلينيكالىق اۋرۋحاناداعى نەيروحيرۋرگيا ورتالىعىنىڭ جەتەكشىسى مىڭجىلقى بەردىقوجاەۆ پەن الماتىدان كەلگەن نەيروحيرۋرگ-دارىگەر مارات سارشاەۆ قازاقستاندىق دارىگەرلەر فرانتسۋز ارىپتەستەرىن وقىتىپ جاتقانىن مالىمدەدى. ەلىمىزدەگى ەڭ كونە اۋرۋحانانىڭ نەيروحيرۋرگتارى شەتەلدىك ارىپتەستەرىنە شەبەرلىك ساعاتىن وتكىزىپ، تىكەلەي ەفيردە ميعا اسا كۇردەلى ەكى وتا جاسادى.
وتىرىس مودەراتورى – بەلگىلى تەلەجۇرگىزۋشى يرينا تەن.
كەزدەسۋ سوڭىندا «AMANAT» پارتياسىنىڭ توراعاسى ەرلان قوشانوۆ جانە دەنساۋلىق ساقتاۋ ءمينيسترى اقمارال ءالنازاروۆا كاسىبي قىزمەتى بارىسىندا ەلگە سىڭىرگەن ەڭبەگى ءۇشىن بىرقاتار مەديتسينا قىزمەتكەرىن ماراپاتتادى.
