اتىراۋ وبلىسىندا سۋعا باتىپ كەتكەن ماحامبەت اۋدانى اكىمىنىڭ ءمايىتى تابىلدى. بۇل تۋرالى وبلىس اكىمدىگىنىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.
توتەنشە جاعدايلار دەپارتامەنتىنىڭ حابارلاۋىنشا، 31 شىلدە كۇنى سۋعا باتىپ كەتكەن اكىمنىڭ دەنەسى 1 تامىز كەشكى 20.00-دە وقيعا ورنىنان 25 شاقىرىم جەردە سارايشىق اۋىلىنىڭ شەتىندە جايىق جاعاسىنان جەرگىلىكتى تۇرعىندار تاپتى. سوت-مەديتسينالىق ساراپتاما تاعايىندالدى.
"بۇگىن تۇندە جايىق وزەنىنەن ماحامبەت اۋدانى اكىمىنىڭ ءمايىتى تابىلدى. قۇزىرلى ورگاندار وسى دەرەك بويىنشا تەكسەرىس جۇرگىزىپ جاتىر. رينات باۋىرجانۇلى ءوز ءىسىنىڭ كاسىبي مامانى رەتىندە ارىپتەستەرىنىڭ ەسىندە قالادى. اتىراۋ وبلىسىنىڭ اكىمى جانە بارشا ارىپتەستەرى رينات باۋىرجانۇلىنىڭ مەزگىلسىز دۇنيەدەن وتۋىنە وراي مارقۇمنىڭ وتباسى مەن جاقىندارىنا قايعىرىپ كوڭىل ايتادى", – دەپ حابارلادى اكىمدىك.
ايتا كەتەيىك، رينات جانقىلىش 2021 جىلدىڭ اقپان ايىندا ماحامبەت اۋدانىنىڭ اكىمى بولىپ تاعايىندالعان.
"ادىرنا" ۇلتتىق پورتالى
