"باسىنان ۇرعان": سوققىعا جىعىلعان ساربازدىڭ اتا-اناسى دابىل قاقتى (ۆيدەو)

5235
Adyrna.kz Telegram

اتىراۋداعى ۇقك شەكارا قىزمەتىنە قاراستى №2016 اسكەري بولىمىندە بورىشىن وتەپ جاتقان 19 جاستاعى ماڭعىستاۋلىق ساربازدى ۇرىپ-سوققان، دەپ جازادى "ادىرنا" ۇلتتىق پورتالى. 

"اق جايىق" باسىلىمىنىڭ حابارلاۋىنشا، مەدەت امانگەلدى 11 شىلدە كۇنى سوققىعا جىعىلعان. سودان بەرى قاراي دەنساۋلىعى كۇرت ناشارلاپ كەتكەن. بىراق اسكەري بولىمدەگىلەر  اتا-اناسىنا «مەدەتتىڭ ەسى اۋىسىپ، ىشىنە جىن كىرگەن» دەپ حابارلاعان.

مەدەتتىڭ اناسى دينا مەرگەنباەۆا ۇلىنىڭ السىرەپ قالعاندىقتان سويلەيتىن جاعدايدا ەمەس ەكەنىن ايتىپ، «شارشاتپاشى»دەپ وعان سۇراق قويماۋىمىزدى ءوتىندى.

ال ءوزى ءبىزدىڭ سۇراعىمىزعا ۇلى مەدەتپەن 9 شىلدە كۇنى ۇيالى تەلەفونمەن سويلەسكەندە، ونىڭ «ماما، ۋايىمداما، مەنىڭ جاعدايىم جاقسى، قىزمەتىمدى اتقارىپ ءجۇرمىن» دەپ جاۋاپ بەرگەنىن جەتكىزدى. ونىڭ ايتۋىنشا، اتىراۋعا سوققىدان باسىنان زاقىم العان بالاسىنىڭ دەنساۋلىعىن تولىق تەكسەرتىپ، وعان نە بولعانىن انىقتاۋ ءۇشىن كەلىپ وتىر. ول «بالامنىڭ باسىن ەەگ، مرت-عا ءتۇسىرۋ ءۇشىن كەلىپ تۇرمىن، بىراق، بىزگە ونى الىپ كەتۋگە رۇقسات بەرمەي وتىر» دەدى.

مەدەتتىڭ اكەسى وكتيابر تولەمىسوۆ اسكەري بولىمگە شاقىرتقان جەدەل جاردەم كولىگىنىڭ ۇلىن اكەتۋگە اسىقپاعانىن ايتتى. ءبىز اسكەري ءبولىمنىڭ الدىنا كەلگەندە بىرنەشە مينۋت وتكەن سوڭ اسكەريلەر مەدەتتىڭ جەدەل جاردەم كولىگىنە وتىرۋىنا رۇقسات بەردى. ونىڭ قاسىنا اناسى بىرگە وتىردى، ال اسكەريلەردىڭ بىرگە بارۋىنا تۋىستارى قارسى بولىپ، كولىككە كىرگىزبەدى.

وسى كەزدە مەدەتتىڭ اكەسى اسكەريلەردەن ۇلىنىڭ سوققى العانىنا ءبىر اپتا بولسا دا بىردە-ءبىر رەت اۋرۋحاناعا نەگە اپارماعانىن، باسىن مرت-عا نەگە تۇسىرمەگەنىن جانە وزدەرى ءتۇسىرتۋ ءۇشىن رۇقسات نەگە بەرمەي وتىرعانىن سۇرادى. ول «اسكەريلەر دارىگەرلەرمەن كەلىسىپ، شىنايى دياگنوزىن جاسىرۋى مۇمكىن» دەگەن كۇدىگىن اشىق ءبىلدىردى.

ال مەدەتتىڭ اكەسىنىڭ ءىنىسى تورە تولەمىسوۆ «ءبىر ساعاتتان استى، ءالى جۇرمەدى، سەبەبى، اسكەريلەر ونى وبلىستىق اۋرۋحاناعا اپارعىسى كەلمەي، وزدەرىنىڭ اۋرۋحاناسىنا اپارامىز دەپ، رۇقسات بەرمەي وتىر» دەيدى:

- ولار ءوز اۋرۋحاناسىندا ءوزارا تانىس دارىگەرلەرىمەن كەلىسۋى مۇمكىن. اسكەردە تاياق جەگەن بالا اۋىرىپ، ءولىپ كەتسە كىم جاۋاپ بەرەدى؟ قازىر جاسوسپىرىمدەر نە ءۇشىن اسكەرگە بارعاننان قورقادى؟ مىنە، وسىنداي زاڭسىزدىقتاردان!

مەدەتتىڭ تۋىستارى اسكەري پوليتسيانىڭ تەرگەۋ ءىسىن اشقانىن اتىراۋعا كەلگەندە بىلگەن. تورە تولەمىسوۆ اسكەري پوليتسياعا بارا جاتقانىن، وعان مەدەتتى ءتۇسىرىپ العان ەكى ۆيدەونى تاپسىراتىنىن ايتتى. مەدەت ءبىرىنشى ۆيدەودا ءوزىن كىم، قاشان، نە ءۇشىن ۇرعانىن ايتقان. مەدەتتىڭ ايتۋىنشا، ول باسقا ساربازدارمەن بىرگە 10 شىلدە كۇنى تۋعان كۇنىن اتاپ وتكەن. ال كەلەسى كۇنى تۇسكى ۇزىلىستە ونى كەڭسە بولمەسىنە ءبىر اعا سەرجانت-ستارشينا شاقىرىپ، وسى ءۇشىن ۇرىپ-سوققان. بىراق مەدەت تۋعان كۇنىن اتاپ وتەتىنى جايلى الدىن الا ەسكەرتىپ، رۇقسات العانىن ايتادى. ەكىنشى ۆيدەودا مەدەت 12 شىلدەدە تاڭەرتەڭ سانيتارلىق بولىمگە بارعانىن، 13 شىلدەدە تاڭەرتەڭ كولىكپەن ءبىر كاپيتانمەن قالاعا شىعىپ، ونىڭ وزىنە «ىشىمدە ادام بار، جىن بار، سويلەيدى، ءۇشىنشى قابات قاۋىپتى سياقتى ماعان، سەكىرىپ كەتەيىن دەپ ءجۇرمىن دەگەن اڭگىمەلەر ايت. سولاي ايتساڭ، سەنى مەشىتكە جىبەرەدى» دەپ ايتقىزعانىن، سول سەبەپتى «مەشىتكە بارۋ ءۇشىن ءبارىن ايتقانىن» ايتادى.

 

"ادىرنا" ۇلتتىق پورتالى 

 

 

پىكىرلەر