وسىدان ءبىراز ۋاقىت بۇرىن بەلگىلى ءبىر تۇلعا اقىن جانە باتىر ماحامبەتتى ابايدان بيىك كورەمىن، دەپ ايتىپ ەدى. ەندى مىنە qamshy.kz سايتىندا "اباي 21 عاسىردا ءومىر سۇرسە، ارى كەتسە بلوگەر بولاتىن ەدى" دەگەن ماقالا جاريالاندى. وسى ماقالادا ايتقانى جاريالانعان ءبىر كاسىپكەر ءوزىنىڭ ايتقانىن اقيقات دە سانايدى: "ايتقانىم بىرەۋگە ۇناماس. بىراق اقيقاتتى ايتاتىن كەز كەلدى دەپ ويلايمىن. ونى ءدال قازىر قابىلداي الماساڭىزدار دا، بولاشاق ۇرپاق تۇسىنەدى دەپ ۇمىتتەنەمىن. قازاقتىڭ ماقتانىشى كىم دەسەڭ ءبارى اباي دەيدى. مەن مۇنىمەن كەلىسپەيمىن. ابايدى ءوز باسىم مويىندامايمىن" . كاسىپكەردىڭ ايتقانى وزىنە اقيقات ەكەنى ايان. جانە زايىرلى مەملەكەتتە اركىم ءوز پىكىرىن بىلدىرۋگە ەرىكتى. باسقالار ونىڭ اۋزىنا "قاقپاق بولمايتىنى" دا راس. قاقپاق بولمايدى دا.
مەن دە ءوزىمنىڭ اقيقاتىمدى العا تارتايىن. بىرىنشىدەن "و دۇنيەلىك بولعاندار اياق-قولىن سەرمەپ ءوزىن قورعاي المايدى". بۇل اقيىق اقىن ءابدىلدا ءتاجىبايۇلىنىڭ اقيقاتى. بۇنىمەن ەشكىم دە، ءتىپتى وسى كاسىپكەر دە تالاسا الماس. كاسىپكەر وسىنى بىلە وتىرىپ اباي تۋرالى ايتىپ وتىر. ارينە ەركى بار، ايتسىن. اباي ءبارىبىر اباي بولىپ قالا بەرەدى.
كاسىپكەر سۇراقتى توتەسىنەن قويىپتى دا ءوز سۇراعىنا ءوزى جاۋاپ بەرىپتى: "اباي قانداي جاقسىلىعى ءۇشىن وسىنشا دارىپتەلەدى؟ قيىن-قىستاۋ زاماندا قول باستادى ما، ەل باستادى ما؟ ول ءتىپتى اۋىل باسقارعان ەمەس. ول اقىلدى، جاقسى ادام. بىراق بۇكىل قازاق ۇلگى بولارلىقتاي كەمەڭگەر تۇلعا ەمەس". ابايدى "بۇكىل قازاق ۇلگى الاتىنداي كەمەڭگەر ەمەس" دەپ ايتقان كاسىپكەر ابايدىڭ نەگە ۇلگى بولا المايتىنى تۋرالى بىردە ءبىر ءۋاج كەلتىرمەگەن. ابايدىڭ ولەڭدەرى، ونىڭ قارا سوزدەرى، ەشتەڭەسى جوقتاي.
وسىلاي دەگەن كاسىپكەر اقىننىڭ اكەسىن ماقتاپتى: "قۇنانباي ناعىز ازاماتتىعىمەن كوزگە تۇسكەن ادام. ەل باسقاردى. شىنىمەن دە ۇلگى بولارلىق تۇلعا". كاسىپكەردىڭ بۇل سوزىمەن ءتىپتى دە تالاسۋدىڭ قاجەتى جوق. نەگە؟ سەبەبى كاسىپكەر بۇل پىكىرىندە قۇنانبايدىڭ دا ۇلگى بولارلىق ءبىر ءىسىن ناقتى مىسال رەتىندە كەلتىرمەگەن. سولاي بولا تۇرا "اباي ءبىزدىڭ زامانىمىزدا ءومىر سۇرسە ارى كەتسە تانىمال بلوگەر عانا بولاتىن ەدى" دەيدى. ال قۇرمەتتى تانىمال بلوگەرلەر كاسىپكەردىڭ وسى پىكىرىنە ء"بىز بۇگىن ابايدان كەم ەمەسپىز" دەپ ءۇن قوسار ما ەكەن، الدە ءۇنسىز قالار ما ەكەن؟
كاسىپكەر اباي تۋرالى: ء"بىرىنشى قارا سوزىندە وسى جاسقا كەلىپ نە ءبىتىردىم، ەندى نە ىستەمەكپىن دەگەن ويعا كەلەدى. ول كەزدە اباي 45-تە بولاتىن. دەمەك 45 جاسقا دەيىن اباي تۇك بىتىرمەگەن. قۇر قىدىرعان، دومبىرا تارتقان. ەشنارسە ىستەگىسى كەلمەگەن" دەپ جازادى. ال، ەندى وزدەرىڭىز ويلاپ كورىڭىزدەرشى، شىنىمەن دە "...45 جاسقا دەيىن اباي تۇك بىتىرمەگەن. قۇر قىدىرعان، دومبىرا تارتقان" با؟
سونىمەن كاسىپكەر: "وسىنىڭ ءبارىن نە ءۇشىن ايتىپ وتىرمىن، ماقساتىم نە؟" دەپ سۇراق قويادى. جانە ءوز سۇراعىنا ءوزى: "كەڭەس ۇكىمەتى قازاقتىڭ يگى جاقسىلارىن قۇرتىپ تىندى. بىراق حالىقتى الداي تۇرۋى شارت ەدى. سوندىقتان ۇلگى بولارلىق تۇلعا رەتىندە ابايدى تاڭداپ الدى. اۋەزوۆ بولسا ارتىلعان مىندەتتى جوعارى دەڭگەيدە اتقارىپ شىقتى" دەپ جاۋاپ بەرگەن.
كاسىپكەردىڭ تۇجىرىم جاساۋى دا قىزىق: "اۋەزوۆ بولسا ارتىلعان مىندەتتى جوعارى دەڭگەيدە اتقارىپ شىقتى" دەيدى. سوندا "اباي جولى" سىندى الەمنىڭ كوپتەگەن تىلدەرىنە اۋدارىلعان رومان-ەپوپەيا جازۋ بيلىكتىڭ تاپسىرماسىن وپ-وڭاي ورىنداۋعا بولاتىن ءىس دەپ ويلايتىنىن جاسىرمايدى. كاسىپكەردىڭ بۇل ويىن قولدايتىندار بار ما ەكەن؟
ودان ارى قاراي كاسىپكەر ء"بىز ءالى كۇنگە دەيىن اباي سياقتىمىز. قازاق وتىرىپ الىپ ويلانعاندى، اسپانعا قاراپ ارمانداعاندى، ەشنىرسە ىستەۋگە قۇلقى جوق، ومىردەن باز كەشۋگە دايار. مۇنىڭ ءبارى سول يدەولوگيانىڭ، جاقسى پياردىڭ تىكەلەي اسەرى" دەيدى. بىراق نەگە ەكەنى بەلگىسىز ءسوزىن "مەن" دەپ باستاپ ء"بىز" دەپ كوپشىلىكتىڭ اتىنان سويلەپ كەتكەنى دە تۇسىنىكسىز. ("ەشنىرسە" دەپ ماقالادا كەلتىرگەندەي كوشىرىپ جازدىم. بۇل ءسوز ء"ا" ءارپى ارقىلى "ەشنارسە" دەپ جازىلادى).
كاسىپكەر تاعى بىلاي دەيدى: "شىن مانىسىندە قازاقتا ۇلگى بولارلىق تۇلعالار كوپ. كەرەي مەن جانىبەك، قاسىم حان، ابىلاي حاندار ناعىز ازاماتتار. سولار سياقتى بولۋعا ۇمتىلۋىمىز ءتيىس. سوندا عانا مىقتى بولامىز". بۇعان نە دەۋگە بولادى؟ ەشتەڭە دە. سەبەبى ەشقانداي ناقتى ساراپتامالىق ويلار جوق. جالپىلاما ايتىلعان ءسوز.
كاسىپكەر "ەرىككەننەن ابايعا ءتيىسىپ وتىرعانىم جوق" دەيدى. ونىڭ جوعارىدا كەلتىرگەن سوزدەرىنەن ۇلى ابايعا تيىسكەن ەشتەڭە بايقامادىم.
qamshy.kz كاسىپكەردىڭ سۋرەتىن ابايدىڭ سۋرەتىنەن بۇرىن ورنالاستىرىپتى. ەسىمىن دە اتاپتى. ماقۇل، بۇلاي ەتۋ وزدەرىنىڭ ەركى.
ال، مەن ابايدىڭ اتىن جازدىم. سەبەبى مەن ابايدى بىلەمىن. كاسىپكەردىڭ اتىن جازعان جوقپىن، سەبەبى ول اتىن اتايتىنداي الىپ بارا جاتقان پىكىر بىلدىرگەن جوق.
كاسىپكەر ءوزىنىڭ پىكىرىن: "...بولاشاق ۇرپاق تۇسىنەدى دەپ ۇمىتتەنەمىن" دەپتى.
ال، ءسىز نە دەيسىز، قۇرمەتتى زامانداس بولاشاق ۇرپاق كاسىپكەردىڭ سوزىنەن نە تۇسىنەر ەكەن؟ ەگەر ونىڭ سوزدەرى بولاشاق ۇرپاققا جەتسە، ارينە. اي قايدام، جەتە قويار ما ەكەن؟
بەردالى وسپان،
"ادىرنا" ۇلتتىق پورتالى.
