باتىس قازاقستان وبلىسى شىڭعىرلاۋ اۋدانىندا بەكبۋسينوۆتار وتباسى كوپكە ۇلگى بولىپ وتىر. سەبەبى، وتباسىندا مۇمكىندىگى شەكتەۋلى جاندار بولسا دا، ومىرگە دەگەن قۇشتارلىقتارىنىڭ ارقاسىندا تاعدىردىڭ سىناعىنا مويىماي، العا ۇمتىلىپ، كوپشىلىكتى تاڭعالدىرىپ كەلەدى. «ادىرنا» ۇلتتىق پورتالىنىڭ ءتىلشىسى بەكبۋسينوۆتار وتباسىمەن تىلدەسىپ، ومىرگە دەگەن قۇشتارلىقتارىنىڭ قۇپياسىن سۇرادى.
بەكبۋسينوۆتار وتباسى باتىس قازاقستان وبلىسى شىڭعىرلاۋ اۋدانى اششىساي اۋىلىندا تۇرادى. وتباسىدا مۇمكىندىگى شەكتەۋلى ەكى بالا بار، سونىمەن قوسا وتاعاسىنىڭ ءوزى وراز بەكبۋسينوۆ تە وسى ساناتتا، سويلەۋ-ەستۋ قابىلەتى تومەن. الايدا وعان قاراماي قولىنا العان ءىسىن دوڭگەلەتىپ، ازىن-اۋلاق مالىن كوبەيتىپ، جاز بويى ءشوبىن شاۋىپ، كاسىبىن دوڭگەلەتىپ وتىرعان جايى بار.
«1996 جىلى قاراشا ايىندا ۇيلەنىپ، تويدان كەيىن بولەك شىقتىق. العاشىندا ءبىز ءۇشىن قيىن بولدى. كۇيەۋىمنىڭ مەملەكەتتەن بەرەتىن جاردەماقاسىمەن كۇن كوردىك. العاشقى بالامىز دۇنيەگە كەلگەندە قۋانىشىمىزدا شەك بولمادى. الايدا تۇڭعىشىمىز تىلەگەنگە دتسپ دياگنوزى قويىلدى. سودان كەيىن ءتۇرلى اۋرۋحانانىڭ تابالدىرىعىن توزدىردىق»، - دەيدى وتاناسى نۇرگۇل.
ۇلىنىڭ تامىرىن بايلاپ، تاعدىرىنا قيىندىقتار اكەلگەن كەسەل – مەديتسينا تىلىندە تسەرەبرالدى سال اۋرۋى (دتسپ) دەپ تۇسىندىرىلەدى. قازىرگى مەديتسينا بۇل اۋرۋدى ەمدەۋگە قاۋقارسىز. الايدا 26 جاستاعى تىلەگەن ومىرگە قۇشتار. اناسىنىڭ ايتۋىنشا، قازىر اكەسىنە قولعابىس ەتۋدە.
«تۇڭعىش بالام جۇمىس ىستەگىسى كەلەدى. 9 بىتىرگەننەن كەيىن پروگرامميست وقۋىن وقىپ الدى. ەكى ديپلومى بار. الايدا مۇگەدەكتىگى بولعان سوڭ، ەشقانداي مەكەمە جۇمىسقا المايدى. ماعان «ماما، مەن جۇمىس ىستەگىم كەلەدى. مەن پەنسيا ەمەس، جالاقى العىم كەلەدى. مەن بارلىق جۇمىستى ىستەي الامىن» دەگەندە نە ايتارىمدى بىلمەي قالدىم. بيىل جۇمىسسىزدىقپەن جۇمىسقا تۇردى. جاقىندا العاشقى جالاقىسىن الىپ، ءماز بولىپ ءجۇر»، دەپ كۇرسىندى نۇرگۇل.
فوتو: ۇلكەن ۇلى تىلەگەن مەن كىشى ۇلى ارمان
«جولداسىم العاشىندا بارلىق جەرگە بارىپ، جۇمىس ىزدەپ كوردى. كۇزەتشى دە بولدى. وتباسى بولىپ كەتۋ ءۇشىن بارىنشا شىداپ، بارلىعىنان ۇنەمدەدىك. مەن ساۋدامەن دە اينالىستىم. الماتىدان تاۋارلار الىپ كەلىپ، ساتىپ تا كوردىم. قولدان اتشانا جاساپ، ءبىر بۇزاۋعا الماستىرىپ الدىق. العاشقى مالىمىز وسى بولدى. جىل سايىن وزگە وتباسىلار سوعىم سويسا، ءبىز مۇلدە سوعىم سويماي، ەت تە جەمەدىك. ءبىر مالىمىز ەكەۋ بولۋ ءۇشىن بارىمىزدى ۇنەمدەۋگە تىرىسىپ، ءويستىپ ۇلكەن شارۋا قوجالىعىنا اينالىپ وتىرمىز. شۇكىر!»، - دەيدى نۇرگۇل.
«ارمان» شارۋا قوجالىعىنىڭ اشىلعانىنا كوپ بولا قويماسا دا، قوجالىقتاعى مال سانى ارتىپ، وركەندەپ كەلەدى. بۇگىندە جيىرماعا جۋىق جىلقى، جەتپىسكە جۋىق ءىرى قارا جانە ۇساق مالدار بار. ودان بولەك، باۋ-باقشا ەگىپ وتىر. مۇمكىندىگىمىز شەكتەۋلى دەپ، ۇكىمەتكە الاقان جايماي، تيىسىنشە وزگەلەردى كاسىپپەن قامتىساق دەگەن ويلارى دا بار.
فوتو: “ارمان” شارۋا قوجالىعى
«ۇلكەن ۇلىم تىلەگەننەن كەيىن، قىزىم اسەم دۇنيەگە كەلدى. قۇدايعا شۇكىر، ونىڭ دەنى ساۋ. قازىر مەديتسينالىق كوللەدجدە وقيدى. ال ودان كەيىن 2008 جىلى بالام ارمان دۇنيەگە كەلدى. وكىنىشكە وراي، ول داۋن سيندرومىمەن اۋىرادى. جاسى ون تورتتە بولسا دا، ەكى جاسار بالا ءتارىزدى. العاشىندا دارىگەرلەر ماعان «ونداي بالانى باعا المايسىز» دەدى. مەن جوق دەپ ءجۇرىپ، الىپ كەتتىم. بالالارىمدى تاستاۋ ويىما دا كەلمەيدى. ارماندى 7 جاسقا كەلگەندە مەكتەپكە دە المادى، مۇگەدەكتىك الىڭىز دەدى. مەن قولىمنان كەلگەنىن ىستەۋگە تىرىستىم. ءاردايىم بالالارىمنىڭ باقىتىن تىلەپ، ەڭبەك ەتۋگە دايىنمىن» ، - دەيدى انا.
وتباسىندا ءۇش بىردەي مۇمكىندىگى شەكتەۋلى جان بار بولسا دا، بەكبۋسينوۆتار وتباسىنىڭ وتاناسى نۇرگۇل بارلىعىن ءوزىم جەتكىزەمىن دەپ وتىر. ول كۇيەۋىمەن سۋردو ءتىلى ارقىلى سويلەسۋ ءۇشىن ونى مەڭگەرىپ تە العان. تابىس تابۋ ءۇشىن كەيدە سۋردو اۋدارماشى بولامىن دەيدى.
«مۇمكىندىگى شەكتەۋلى جاندار بار بولسا دا، ولار قوعامنىڭ مۇشەسى. ەشقانداي سىناققا مويىماي، ءومىر سۇرۋگە تالپىنۋ كرەك. قولىڭنان كەلەتىن ىسپەن اينالىسساڭ، بەرەكەلى بولادى»، - دەيدى نۇرگۇل ءوزى سياقتى مۇگەدەك بالا ءوسىرىپ وتىرعان انالارعا شابىت بەرىپ.
«ادىرنا» ۇلتتىق پورتالى
