"تىلەۋحان ۇلتتىق سپورتتى قۇلدىراتىپ، ساتىبالدى بولىنگەن اقشانى الىپ وتىردى" - رامازان ءساتتىباي

8091
Adyrna.kz Telegram

قر ۇلتتىق سپورت تۇرلەرىنەن بۇرىنعى مەملەكەتتىك جاتتىقتىرۋشى رامازان ءساتتىباي جۋرناليست نارتاي ارالبايۇلىنا بەرگەن سۇحباتىندا ۇلتتىق سپورت قاۋىمداستىعى بەكبولات تىلەۋحانوۆ باسقارعان كەزدە نە سەبەپتى قۇلدىراپ كەتكەنى توقتالىپ، بىلىقتارىن اشىپ بەردى. بۇل تۋرالى "ادىرنا" ۇلتتىق پورتالى جازادى. 

"بەكبولاتتى ۇلتتىق سپورت قاۋىمداستىعىنا قولىنان جەتەكتەپ ءوزىم الىپ كەلدىم. ۇلتتىق سپورتىمىز دامۋ كەرەك دەدىم. بىراق بۇل جەردە جالعاندىق كوبەيىپ كەتتى. بۇل جارناما. ۇلتتىق سپورت جارىستارىن قاۋقىلداتىپ، شۋىلداتىپ، دۋىلداتىپ وتكىزەمىز. بىراق ونىڭ ار جاعىندا ءبىر كەرەمەت ءنارى، تاربيەلىك ءمانى جوق. سونداي ءبىر ەل "وي، شىركىن-اي! مىنە، بولسا وسىنداي بولسىن! ناعىز قازاقتىڭ رۋحاني دۇنيەسى ءتىرىلىپ جاتىر عوي! مىناۋ كەرەمەت ەكەن" دەگەن نارسەسى جوق. سول ءوزىمىز سول 15-20 ءۇيىمىزدى تىگىپ تاستاپ، ۋلاعان-شۋلاعانعا ءارى ساپىرىپ، بەرى ساپىرىپ وتكىزەمىز. بەكبولاتتى سول قىزمەتكە اكەلگەنىمە وكىندىم دەسەم دە بولادى. نەگە دەسەڭ... جۇدەۋ، تالعامپازدىق جوق.  تۇك جوق. قۇر اشەيىن بۇگىنگىمەن عانا جارق-جۇرق ەتىپ وتكىزە سالىپ، ەرتەڭگى كۇنى ول وشسە وشە بەرسىن دەگەندەي...", - دەيدى رامازان ءساتتىباي. 

سۇحبات بارىسىندا رامازان ءساتتىباي ۇلتتىق سپورت قاۋىمداستىعى بەكبولات تىلەۋحاننىڭ جەكە مەنشىك عيماراتىندا وتىراتىنىن مالىمدەدى.

"قاۋىمداستىق دەگەندە ءوزىنىڭ جەكە مەنشىك عيماراتى عوي. سول بەكبولاتتىڭ وزىنە قارايتىن عيماراتتىڭ ىشىندە ءبىزدىڭ قاۋىمداستىعىمىز وتىرادى. قازىرگى سپورتتى دامىتۋ ورتالىعى ول كىسىلەر دە سوندا وتىرادى. ەندى بۇل قاۋىمداستىققا اقشا بيۋدجەتتەن ەمەس سامۇرىق-قازىنادان ءبولىندى. سول قوردان جىلىنا بىزگە اقشا بولىنەدى. "انا جارىسقا جەتپەي جاتىر، مىنا سپورتتى كوتەرۋ كەرەك" دەپ ايتام... "اقشا جوق، اقشا جوق، اقشا جوق انا جەردە". ەندى سامۇرىق-قازىنادان ءبىر كورگەنىمدە  جىلىنا ءبىز 1 ملردتاي اقشا الدىق. بۇل ۇلتتىق سپورتقا دەگەن سۇمدىق اقشا!", - دەيدى جاتتىقتىرۋشى. 

رامازان ءساتتىباي ۇلتتىق سپورتقا بولىنگەن اقشانى سول كەزدە قايرات ساتىبالدى يەمدەنىپ، ءوزى الىپ وتىرعانىنا توقتالدى.

"بەكبولات ەكەۋمىز ءبىر كۇنى رەنجىستىك. اقشا قايدا؟ دەپ. "اقشا ەندى راحا ءوزىڭىز بىلەسىز عوي، سامۇرىق-قازىنادان قايرەكەڭ بارىپ الادى" دەدى. ءبىزدىڭ پوچەتنىي پرەزيدەنت، قۇرمەتتى پرەزيدەنتىمىز قايرات ساتىبالدى الىپ كەتەدى، اقشا سول كىسىدە قالادى. مەن ايتامىن: "توقتات، تۋرا ءبىزدىڭ ۇلتتىق سپورتىمىزعا قاراپ تۇر ما؟ وسى ءبىزدىڭ اقشامىزعا؟ ونى جالعىز مەن ەمەس ەستىگەن. "بولمايدى جىگىتتەر، مىنانى ايتۋ كەرەك. قايرات سوندا ءبىزدىڭ ۇلتتىق سپورتىمىزعا قاراپ ءجۇر ما سوندا؟" دەدىم. "وي قايتەسىز راحا! قايتەسىز ونى. نەمەنەگە بۇيتەسىز ونى" دەدى. مەن "توقتات، مەن وعان وشپەندىلىكپەن، كورەالماۋشىلىقپەن، قىزعانىشپەن، باسقا بىردەنەمەن ەمەس... ءوزىن قاراش انە، تاەكۆوندونى قارا! كاراتەنى قارا! التىنمەن اپتاپ، كۇمىستەپ قاپتاپ قويعان. ەي، مەن ءوز جەرىمدە ءجۇرىپ، ءوز اۋىلىمدا ءجۇرىپ ۇلتتىق سپورتىم نە بولىپ جاتىر؟ مىناۋ قايىرشى ەمەس، سورلىنىڭ كۇيىن كەشىپ ءجۇر عوي... بۇل سوندا قالاي؟", - دەيدى رامازان ءساتتىباي. 

پىكىرلەر