ۇلى وتان سوعىسى جىلدارىندا مادەنيەت مايدان مەن تىلدا حالىقتىڭ رۋحىن كوتەرۋ ىسىندە ماڭىزدى ءرول اتقاردى. سوعىس جىلدارى قازاقستاندىق ارتىستەر 36 525 كونتسەرت وتكىزىپ، ولاردى 9 337 000 ادام تاماشالادى. بۇل تۋرالى قر مادەنيەت جانە اقپارات ءمينيسترى ايدا بالاەۆا الماتىدا وتكەن «جەڭىستىڭ: ۇرپاقتار مەن حالىقتاردىڭ بىرلىگى» كونفەرەنتسياسىندا ايتتى.
كونفەرەنتسيا جۇمىسىنا قر پرەزيدەنتى اكىمشىلىگىنىڭ ىشكى ساياسات ءبولىمىنىڭ مەڭگەرۋشىسى ابزال نۇكەنوۆ، رەسەي فەدەراتسياسى پرەزيدەنتىنىڭ شەت ەلدەرمەن ايماقارالىق جانە مادەني بايلانىستار جونىندەگى باسقارماسى باسشىسىنىڭ ورىنباسارى انتون رىباكوۆ، رەسەي فەدەراتسياسىنىڭ جاستار ءىسى جونىندەگى فەدەرالدىق اگەنتتىگى باسشىسى گريگوري گۋروۆ، ەكى ەلدىڭ عالىمدارى مەن ساراپشىلارى، سونداي-اق بەلسەندى جاستار قاتىستى.
1943 جىلى رەسپۋبليكادا قازاق ايتىسى قايتا جاندانىپ، اقىندار جاۋىنگەرلەر مەن ەڭبەككەرلەردىڭ ەرلىگىن جىرعا قوستى. وسى ۋاقىتتا قازاقستانعا ەۆاكۋاتسيالانعان 90-عا جۋىق جازۋشى قازاق ادەبيەتى قايراتكەرلەرىنىڭ قاتارىن تولىقتىردى. ولاردىڭ ىشىندە الەكسەي تولستوي، سەرگەي ميحالكوۆ، فيودور پانفەروۆ، كونستانتين پاۋستوۆسكي، سامۋيل مارشاك، ميحايل زوششەنكو جانە باسقالارى بار. سونداي-اق، 90-عا جۋىق اقىن-جازۋشى مايدانعا اتتانىپ، سوعىسقا قاتىستى.
«مەملەكەت مادەنيەتتى تەك قولداپ قانا قويماي، ونى نىسانالى تۇردە حالىق اراسىنا تاراتتى، ونىڭ قۋاتتى رۋحاني كۇشىن ۇلى جەڭىسكە جەتۋدىڭ ءبىر تەتىگى رەتىندە شەبەر پايدالاندى ءارى دامىتۋعا كۇش سالدى. قازاقستاندىق ساحنا جانە مۋزىكا ونەرىنىڭ شەبەرلەرى مايداندا زور سۇرانىسقا يە بولدى. ارنايى جىلجىمالى كونتسەرتتىك بريگادالار قۇرىلىپ، ولار مايدان شەبىندە جانە گوسپيتالدەردە كونتسەرت قويدى»، – دەدى ا. بالاەۆا.
ساحنادا تەك بۇرىننان تانىمال تۋىندىلار عانا قويىلىپ قويماي، سوعىس جىلدارىندا تۇڭعىش پرەمەرالار دا ءوتتى. ماسەلەن، 1942 جىلى قازاقستاندا العاش رەت وپەرا جانرىنداعى قويىلىم ساحنالاندى. ونىڭ اۆتورى – ەۆگەني برۋسيلوۆسكي، ال تۋىندى «گۆارديا، العا!» دەپ اتالدى.
1944 احمەت جۇبانوۆ پەن لاتيف ءحاميديدىڭ «اباي» وپەراسى ساحناعا شىقتى. بۇگىندە ناتاليا ساتس ەسىمىن يەلەنىپ وتىرعان بالالار مەن جاسوسپىرىمدەر تەاترى (تيۋز) اشىلدى. سول جىلى كومپوزيتورلار مۇقان تولەباەۆ، ەۆگەني برۋسيلوۆسكي جانە لاتيف حاميدي بىرىگىپ، قازاق كسر-ءىنىڭ العاشقى مەملەكەتتىك ءانۇرانىن جازدى.
سوعىس كەزەڭى قازاقستاننىڭ بەينەلەۋ ونەرى ءۇشىن دە ماڭىزدى كەزەڭ بولدى. سۋرەتشىلەر 2 500-دەناستام كەسكىندەمە، گرافيكا جانە ءمۇسىن تۋىندىلارىن جاسادى. بۇل شىعارمالاردا كەڭەس ادامدارىنىڭ مايدان مەن تىلداعى ءپاتريوتيزمى، تاباندىلىعى، ەرلىگى مەن قاھارماندىعى بەينەلەندى. قازاقستان كەسكىندەمەسى مەن گرافيكاسىنىڭ دامۋىنا قوسقان ۇلەسى ۇشىن قازاق كسر جوعارعى كەڭەسى پرەزيديۋمىنىڭ شەشىمىمەن ءابىلحان قاستەەۆ پەن مويسەي لەۆينگە «قازاقستاننىڭ حالىق سۋرەتشىسى» اتاعى بەرىلدى.
