ەكىباستۇز مەديتسينا كوللەدجىنىڭ 4-كۋرس ستۋدەنتى ايدانا تەمىربولاتوۆا ديپلومىن قولىنا الاتىن شاقتا وقۋدان شىعارىلدى. ونىڭ ەكىباستۇز قالالىق ورتالىق اۋرۋحاناسىندا جاتقان اناسى سۆەتلانا ءارى اۋرۋمەن ارپالىسىپ، ءارى قىزىنىڭ بولاشاعىنا الاڭداپ شارق ۇرۋدا. ايدانانىڭ وقۋدان شەتتەتىلۋ سەبەبىن بىلمەك بولىپ، مۇعالىمدەرىنە حابارلاستىق.
مەدكوللەدج مۇعالىمدەرىنىڭ ايتۋىنشا، ايدانانىڭ دەنساۋلىعى سوڭعى ۋاقىتتا ءماز بولماعان. كوۆيد دەرتىنە قارسى ۆاكتسينانىڭ 1-كەزەڭى وعان تەرىس اسەر ەتىپ، اۋرۋحانادا دەرماتيتتەن ەمدەلۋگە ءماجبۇر بولعان. ودان كەيىن كوپ ۇزاماي دەنساۋلىعىنان تاعى اقاۋ شىعىپ، بۇل جولى ونىڭ وكپەسى سىرقاتتانعانى انىقتالىپ، تاعى دا اۋرۋحاناعا جاتىپ شىققان. وسىلايشا، ءتورت جىل بويى اۋىل مەن قالانىڭ ورتاسىندا سابىلىپ جۇرگەن ستۋدەنت ءساۋىر ايىندا №1 ەمحاناعا پراكتيكاعا بارعان. ايدانا پراكتيكا قۇجاتتامالارىن قورعاۋعا كەسىلگەن مەرزىمدە كەلە الماپتى. ويتكەنى اناسى – قازاق ءتىلى مەن ادەبيەتى ءپانى مۇعالىمى سۆەتلانا سىزدىقوۆانىڭ دەنساۋلىعى ناشارلاپ، اۋرۋحاناعا تۇسكەن. تولىق ەمەس وتباسىندا 11 جاسار اقبوتاعا قارايلايتىن ادام بولماعاندىقتان، ايدانا اۋىلدا سىڭلىسىنە قامقور بولىپ، اناسىنا كەرەك-جاراعىن اپارىپ تۇرعان. وتباسىنىڭ اۋىر ءحالى كوللەدج باسشىلىعى مەن مۇعالىمدەرىنىڭ نازارىنان تىس قالعان.
ارينە، ءبىز كوللەدج مۇعالىمدەرىن بىرجاقتى كىنالاي المايمىز. سەبەبى ايدانا پراكتيكا قۇجاتتارىن ۋاقىتىلى تاپسىرماعانىنا ءوزى كىنالى. بىراق قۇجاتتامالاردىڭ ۋاقىتىلى تولتىرىلىپ، رەتىمەن جۇرگىزىلۋىن سوناۋ ءساۋىر ايىنان بەرى پراكتيكا جەتەكشىسى نەلىكتەن قاداعالاماعانى بەلگىسىز. ءبىز ايدانادان ساباق ۇلگەرىمى جايلى سۇرادىق. «كىلەڭ بەسكە وقىدىم دەپ ايتا المايمىن. العان باعالارىم – «ءۇش» پەن «ءتورت» ارالاس. بىراق حيرۋرگيا پانىنەن نەشە العانىمدى بىلمەيمىن، ويتكەنى بىزدە بۇل ءپان دۇرىس جۇرگىزىلگەن جوق، ءتىپتى تولىققاندى جۇرگىزىلمەدى دەۋگە بولادى. «زاچەتكامىزدى» ەشقاشان قولىمىزعا الىپ كورگەن جوقپىز، ول وقۋ بولىمىندە جينالىپ تۇردى. ال ەلەكتروندى كۇندەلىك دەگەندى ەستىگەن دە ەمەسپىز، مەديتسينالىق كوللەدج ونداي ۇعىمنان الىس»، - دەدى.
ايدانانىڭ اناسى سۆەتلانا كلارا قابىشقىزى اتتى زەينەتكەر مۇعالىمگە دە وكپەلى ەكەن. ءبىز اتالعان مۇعالىمگە اتا-انانىڭ نەگە رەنىشتى ەكەنىن زەرتتەپ جاتپادىق، تەك بار بولعانى «جۇمىسسىز جاستار ءۇيىرىلىپ وتىرعاندا زەينەتكەر مۇعالىمدەردى ۇستاۋ قاشانعى جالعاسپاق؟» - دەپ سۇراعىمىز كەلەدى.
23 ماۋسىمدا بىتىرۋشىلەر ءۇشىن مەملەكەتتىك ەمتيحاندار باستالادى. وكىنىشكە قاراي، ايدانا ەمتيحانعا جىبەرىلگەن جوق. باسشىلىقتىڭ ونى وقۋدان شىعارۋ تۋرالى بۇيرىعى شىعىپ قويىپتى. اناسىنىڭ اۋىر حالدە جاتقانىنا، ءسىڭلىسىنىڭ قاراۋسىز وتىرعانىنا قاراماستان...
ءتورت جىل ارقانىڭ قىسىندا ايازعا توڭىپ اۋىل مەن ەكى ورتانى توزدىرعان ەڭبەگى دالاعا كەتكەن قازاق قىزى مەملەكەتتىك ەمتيحاننان قۇلاپ جاتسا، ءوزى كىنالى دەيسىڭ عوي. ال ول بولسا شىن مانىندە ءساۋىر مەن ماۋسىم اراسىندا – باقانداي ءۇش اي بويى تاجىريبەگە قاتىسقانىن ەمحانادان بەرىلگەن مىنەزدەمەسى ايعاقتاپ تۇر...
ەگەر ستۋدەنت پراكتيكا قۇجاتتاماسىن ۋاقىتىلى قورعاي الماسا، كوللەدجدەگى پراكتيكا جەتەكشىسى قايدا قاراعان؟ حيرۋرگيا ءپانى نەگە تولىق جۇرگىزىلمەدى؟ اۋىل بالاسىنىڭ تاعدىرىنا نەگە وسىنشا نەمقۇرايدى بولدىق؟!
وسىدان بىرنەشە جىل بۇرىن ەكىباستۇز مەديتسينا كوللەدجىنە جابىلۋ قاۋپى ءتونىپ، ماسەلەگە جەرگىلىكتى قازاق جۋرناليستەرى ارالاسقان بولاتىن. «جەل بولماسا، ءشوپتىڭ باسى قيمىلدامايدى» دەۋشى ەدى قازاق. اتالعان جايتتىڭ بارىنەن كوللەدج باسشىلىعى قورىتىندى شىعارسا كەرەك-ءتى...
ايتپاقشى، ەكىباستۇزدا مەديتسينا ماماندارى تاپشى. بۇل تاپشىلىق، اسىرەسە، كوۆيد ىندەتى اسقىنىپ تۇرعان شاقتا قاتتى بايقالدى. الايدا بۇل جايت تا كوللەدج باسشىلىعىنىڭ قاپەرىنەن تىس قالعان...
جانارگۇل قادىروۆا،
پاۆلودار وبلىسى
