وسىنداي يگى تىلەكپەن شىمكەنتتىكتەر قالا كۇنىن تويلادى. مەرەكە قارساڭىندا 20-دان اسا ماڭىزدى ءىس-شارا ۇيىمداستىرىلىپ، كەشە ءال-فارابي الاڭىندا رەسپۋبليكاعا تانىمال ونەرپازداردىڭ قاتىسۋىمەن قورىتىندى گالا-كونتسەرت ءوتتى.
بۇل مەرەكە بۇرىنعىدان وزگەرەك. سەبەبى، پاندەميادان سوڭ العاش رەت كەڭ كولەمدە ءدۇبىرلى توي تويلاندى. مەرەكەلىك كوڭىل-كۇي مەن شاتتىق لەبى شىمكەنت قالاسىنىڭ اكىمى م.ايتەنوۆتىڭ قۇتتىقتاۋ سوزىنەن دە سەزىلدى.
— شىمكەنت رەسپۋبليكالىق قالا ستاتۋسىن العان 4 جىل ىشىندە تۇرعىندار سانى 12 پايىزعا، ءوندىرىس كولەمى 6 ەسە ارتىپ، مەگاپوليس بيۋدجەتى 4 ەسەگە دەيىن ۇلعايدى. شاھارىمىز ينۆەستيتسيا تارتۋ بويىنشا رەسپۋبليكادا كوشباسشى قالاعا اينالدى. 2200 جىلدان استام تاريحى بار شاھار 4 جىل جىل ىشىندە دامي ءتۇستى. فۋتبولشىلارىمىز دا قالا كۇنىنە سىيلىق جاساپ، «ورداباسى» كلۋبى وڭتۇستىك دەربيىندە «تاراز» كومانداسىنان 3-2 ەسەبىمەن باسىم ءتۇستى. شىمكەنت — جاستاردىڭ قالاسى. شارىقتاي بەر، شىمكەنت! – دەدى م.دۇيسەنبەكۇلى قۇتتىقتاۋ سوزىندە.
قازاقستان ەستراداسىنىڭ جۇلدىزدارى الاڭعا جينالعان شىمكەنتتىكتەرگە ەرەكشە كوڭىل-كۇي سىيلادى. كەش قوناقتارى زاتتىبەك كوپبوسىنۇلى، مەدەۋ ارىنباەۆ، باۋىرجان يساەۆ، ايگەرىم قالاۋباەۆا، عازيزحان شەكەربەكوۆ، «جىگىتتەر» كۆارتەتى، قايرات نۇرتاس پەن وزگە دە ونەرپازدار قالا كۇنىنە قوناق كادەسىن ۇسىنىپ، اننەن شاشۋ شاشتى. ولاردىڭ شىمكەنتكە ارناعان تىلەكتەرى كورەرمەندەردى جىگەرلەندىرىپ، كەش كوركىن قىزدىرا ءتۇستى.
سالتاناتتى كەش سوڭى وت شاشۋعا ۇلاسىپ، شىمكەنتتىكتەردى ەرەكشە كۇيگە بولەدى.
ايتا كەتەيىك، مەرەكەلىك ءىس-شارالار لەگى «فان كلۋبتار» شەرۋىنەن باستاۋ الىپ، Shymkent Nomad Film فەستيۆالىمەن جالعاسقان بولاتىن. سونىمەن قاتار، ءتۇرلى سپورتتىق تۋرنيرلەر ۇيىمداستىرىلىپ، قازاقستاننىڭ ۇزدىك تاۋار وندىرۋشىلەرى، قولونەر شەبەرلەرى مەن اۋىل شارۋاشىلىق ونىمدەرىنىڭ جارمەڭكەسى ءوتتى. شىمكەنتتە ءشامشى اندەرى شىرقالىپ، قالا تۇرعىندارى مەن تۋريستەر Balmuzdaq Fest فەستيۆالىن تاماشالادى.
