مارات ءبايدىلداۇلى: "ۇلتتىق قۇرىلتاي ءۇمىتتى اقتاي ما؟"

1759
Adyrna.kz Telegram

جىل باسىندا اكادەميك ورازالى سابدەننىڭ «جاس الاش» گازەتىندە قۇرىلتاي وتكىزۋ تۋرالى ايتقان ۇسىنىسى پرەزيدەنتتىڭ جولداۋىندا قامتىلىپ، كوپ ۇزاماي رەسمي بۇقارالىق اقپارات قۇرالدارىندا جاريا ەتىلگەن. بۇگىن، مىنە، سول ۇسىنىس نەگىزىندە ق.ك.توقاەۆتىڭ باستاماسىمەن جالپىۇلتتىق دەڭگەيدە ۇلتتىق قۇرىلتاي دەگەن جاڭا ينستيتۋت دۇنيەگە كەلدى. قازاقستان رەسپۋبليكاسى پرەزيدەنتىنىڭ جانىنداعى ۇلتتىق قۇرىلتاي ءوزىن ءوزى اقتاماعان بۇرىنعى «ۇلتتىق قوعامدىق سەنىم كەڭەسىنىڭ» ورنىنا كەلىپ وتىر. بيلىك پەن حالىق اراسىندا سىندارلى ديالوگتى قالىپتاستىرۋعا باعىتتالعان بۇل كونسۋلتاتيۆتىك-كەڭەسشى قۇرىلىم الدىنا ۇلكەن مىندەتتەر جۇكتەلەرى انىق. الايدا ۇيىمداستىرۋشىلار ۇلتتىق قۇرىلتاي قۇرامىنا مۇشەلەردى ىرىكتەۋدە وڭىرلەر وكىلدەرىن قامتۋعا باسا ءمان بەرىپ، سودان بايقاماي كونە سۇرلەۋگە ءتۇسىپ كەتكەنى بايقالادى. اقيقاتىندا ۇلتتىق قۇرىلتاي قۇرامىنا كىرەتىن ادامدار تاعايىندالماي، ون-لاين سايلاۋ جولىمەن ىركتەلگەنى دۇرىس بولار ەدى. سونىڭ سالدارىنان ۇلت ءۇشىن ماڭىزدى تاقىرىپتاردى كوتەرە الاتىن ادامدار كىرمەي قالعان.
راس، پرەزيدەنت بەكىتكەن قۇرامى 117 ادامنان تۇراتىن ۇلتتىق قۇرىلتاي مۇشەلەرىنىڭ قاتارىندا مۇحتار شاحانوۆ، توقتار اۋباكىروۆ، يليا جاقانوۆ، سەيداحمەت قۇتتىقادام، اسقار جۇمادىلداەۆ، ەرمۇرات باپي، نۇرتاي ءسابيليانوۆ، قايرات جولدىبايۇلى، انار فازىلجانوۆا، ازاماتحان ءامىرتاي سياقتى ۇلتتىق مەملەكەتتىلىكتى دامىتۋعا قاتىستى يگى وي ايتا الاتىن جاندار بار ەكەن. بىراق ولار كوپ ەمەس. ال ۇلتتىق قۇرىلتاي قۇرۋ تۋرالى ەڭ العاش ۇسىنىس تاستاعان اكادەميك ورازالى سابدەن ەسىمىنىڭ كورىنبەۋى ءتىپتى وكىنىش تۋعىزدى. «انىعىن ايتىپ اعايىنعا، تۋراسىن ايتىپ تۋعانعا جاقپايمىن» دەيتىن، مەملەكەتتىك ءتىلدىڭ جاناشىرى اسىلى وسمان اپامىز دا جوق بۇل تىزىمدە. امانكەلدى ايتالى اعامىز دا كورىنبەيدى.
قاراساڭىز، ۇلتتىق قۇرىلتايدا كىمدەر جوق دەيسىز، كاسىپكەر دە، كوللەدج ديرەكتورى دا، جشس ديرەكتورى دا، ءتىپتى نازارباەۆتىڭ «بۇلبۇلى» اتانعان ەرمۇحامبەت ەرتىسباەۆقا دەيىن ءجۇر. «ۇلتتىق قوعامدىق سەنىم كەڭەسىنەن» ايىرماشىلىعى مۇشەلەرىنىڭ سانى مەن ناقتىلانعان قۇزىرەتىندە عانا. ۇلتتىڭ ءىلىپ الار ونشاقتى تۇلعاسى بار ەكەنىن ايتتىق. ال قالعان قالىڭ «ماسسوۆكا» اراسىنان ولاردىڭ داۋىسى ەستىلە مە؟ ءىس جۇزىندە بۇل بيلىكتىڭ ءوز ۇيعارىمدارىن «حالىقپەن ديالوگ» ارقىلى كولەگەيلەپ وتكىزىپ جىبەرۋ ءۇشىن جاسالعان ينستيتۋت ءتارىزدى. ءتىپتى وسى قۇرىلتايدىڭ تولىقتاي قازاقشا وتەتىنى دە ۇلكەن كۇمان بار. باسى مەن اياعى قازاقشا، ورتاسى ورىسشا «ءنان-ءنىڭ الاشۇبار جينالىسى» بولىپ كەتپەسە جارادى.
ال ءبىز ۇلتتىق قۇرىلتاي ەڭ الدىمەن قازاق حالقىنىڭ مەملەكەتقۇراۋشى ۇلت رەتىندەگى مارتەبەسىن كوتەرەدى، ءتۇرلى دياسپورالاردى قازاق حالقىنىڭ توڭىرەگىنە شوعىرلاندىرادى، مەملەكەتتىڭ دامۋى مەن قوعامنىڭ قالىپتاسۋىنا ۇلتتىق تۇرعىدان باعا بەرەدى دەپ ۇمىتتەنگەن ەدىك. ەندى سول ءۇمىتتىڭ ءوزى كوزىمىزدەن بۇلبۇل ۇشپاسا بولدى!

 

مارات ءبايدىلداۇلى (توقاشباەۆ),

جازۋشى-پۋبليتسيست.

 

پىكىرلەر