Marat Báıdildauly: "Ulttyq quryltaı úmitti aqtaı ma?"

1758
Adyrna.kz Telegram

Jyl basynda akademık Orazaly Sábdenniń «Jas alash» gazetinde Quryltaı ótkizý týraly aıtqan usynysy Prezıdenttiń joldaýynda qamtylyp, kóp uzamaı resmı buqaralyq aqparat quraldarynda jarııa etilgen. Búgin, mine, sol usynys negizinde Q.K.Toqaevtyń bastamasymen jalpyulttyq deńgeıde Ulttyq Quryltaı degen jańa ınstıtýt dúnıege keldi. Qazaqstan Respýblıkasy Prezıdentiniń janyndaǵy Ulttyq quryltaı ózin ózi aqtamaǵan burynǵy «Ulttyq qoǵamdyq senim keńesiniń» ornyna kelip otyr. Bılik pen halyq arasynda syndarly dıalogty qalyptastyrýǵa baǵyttalǵan bul konsýltatıvtik-keńesshi qurylym aldyna úlken mindetter júkteleri anyq. Alaıda uıymdastyrýshylar Ulttyq quryltaı quramyna múshelerdi irikteýde óńirler ókilderin qamtýǵa basa mán berip, sodan baıqamaı kóne súrleýge túsip ketkeni baıqalady. Aqıqatynda Ulttyq quryltaı quramyna kiretin adamdar taǵaıyndalmaı, on-laın saılaý jolymen irktelgeni durys bolar edi. Sonyń saldarynan ult úshin mańyzdy taqyryptardy kótere alatyn adamdar kirmeı qalǵan.
Ras, Prezıdent bekitken quramy 117 adamnan turatyn Ulttyq quryltaı músheleriniń qatarynda Muhtar Shahanov, Toqtar Áýbákirov, Ilııa Jaqanov, Seıdahmet Quttyqadam, Asqar Jumadildaev, Ermurat Bapı, Nurtaı Sábılıanov, Qaırat Joldybaıuly, Anar Fazyljanova, Azamathan Ámirtaı sııaqty ulttyq memlekettilikti damytýǵa qatysty ıgi oı aıta alatyn jandar bar eken. Biraq olar kóp emes. Al ulttyq quryltaı qurý týraly eń alǵash usynys tastaǵan akademık Orazaly Sábden esiminiń kórinbeýi tipti ókinish týǵyzdy. «Anyǵyn aıtyp aǵaıynǵa, týrasyn aıtyp týǵanǵa jaqpaımyn» deıtin, memlekettik tildiń janashyry Asyly Osman apamyz da joq bul tizimde. Amankeldi Aıtaly aǵamyz da kórinbeıdi.
Qarasańyz, ulttyq quryltaıda kimder joq deısiz, kásipker de, kolledj dırektory da, JShS dırektory da, tipti Nazarbaevtyń «bulbuly» atanǵan Ermuhambet Ertisbaevqa deıin júr. «Ulttyq qoǵamdyq senim keńesinen» aıyrmashylyǵy músheleriniń sany men naqtylanǵan quziretinde ǵana. Ulttyń ilip alar onshaqty tulǵasy bar ekenin aıttyq. Al qalǵan qalyń «massovka» arasynan olardyń daýysy estile me? Is júzinde bul bıliktiń óz uıǵarymdaryn «halyqpen dıalog» arqyly kólegeılep ótkizip jiberý úshin jasalǵan ınstıtýt tárizdi. Tipti osy quryltaıdyń tolyqtaı qazaqsha ótetini de úlken kúmán bar. Basy men aıaǵy qazaqsha, ortasy oryssha «NÁN-niń alashubar jınalysy» bolyp ketpese jarady.
Al biz Ulttyq Quryltaı eń aldymen qazaq halqynyń memleketquraýshy ult retindegi mártebesin kóteredi, túrli dıasporalardy qazaq halqynyń tóńiregine shoǵyrlandyrady, memlekettiń damýy men qoǵamnyń qalyptasýyna ulttyq turǵydan baǵa beredi dep úmittengen edik. Endi sol úmittiń ózi kózimizden bulbul ushpasa boldy!

 

Marat Báıdildauly (Toqashbaev),

Jazýshy-pýblııst.

 

Pikirler