قىزىلوردا وبلىسىنىڭ ەكس-اكىمى گۇلشارا ابدىقالىقوۆا جاڭا قىزمەتكە تاعايىندالدى. ول 6 ماۋسىمنان باستاپ «قازمۇنايگاز» ۇلتتىق كومپانياسى اق ادام رەسۋرستارىن باسقارۋ جونىندەگى بيزنەس-سەرىكتەسى قىزمەتىنە كىرىستى. بۇل تۋرالى ۇلتتىق كومپانيانىڭ ءباسپاسوز قىزمەتى Halyq Uni رەداكتسياسىنىڭ رەسمي ساۋالىنا بەرگەن جاۋابىندا ايتتى، دەپ حابارلايدى «ادىرنا» ءتىلشىسى.
گۇلشارا ابدىقالىقوۆانىڭ نەگىزگى مىندەتتەرىنە:
الەۋمەتتىك جوبالاردىڭ جۇزەگە اسىرىلۋىنا جەتەكشىلىك ەتۋ;
الەۋمەتتىك ەڭبەك قاتىناستارىن ءتيىمدى رەتتەۋ;
ادام رەسۋرستارىن باسقارۋ دەپارتامەنتىنىڭ ىشكى جىنە سىرتقى كوممۋنيكاتسيالارىن قالىپتاستىرۋ مەن نىعايتۋعا ىقپال ەتۋ;
كادر ءاۋديتىنىڭ ناتيجەلەرىن تالداۋ جانە قىزمەتكەرلەردى ءتيىمدى باسقارۋ ماسەلەلەرى كىرەدى.
«قازمۇنايگاز» ۇلتتىق كومپانياسى جاڭا قىزمەتكەرىنىڭ قانشا جالاقى الاتىنىنا جاۋاپ بەرۋدەن باس تارتتى، قىزمەتكەرلەرگە ەڭبەكاقى تولەۋ ماسەلەسىنە قاتىستى اقپارات قۇپيا جانە كوپشىلىككە جاريا ەتىلمەيتىنىن ايتتى.
گۇلشارا ابدىقالىقوۆا 1965 جىلى قىزىلوردا وبلىسىندا تۋعان. 1987 جىلى جامبىل جەڭىل جانە تاماق ونەركاسىبى تەحنولوگيالىق ينستيتۋتىن بىتىرگەن، ەكونوميست-ساراپشى.
ينستيتۋتتى اياقتاعاننان كەيىن 1987-94 جىلدارى قىزىلوردا وبلىسى الەۋمەتتىك قورعاۋ ءبولىمىنىڭ اعا ينسپەكتورى، ءبولىم باستىعى بولىپ جۇمىس ىستەدى.
1994-95 جىلدارى – قازاقستان رەسپۋبليكاسى جوعارى كەڭەسىنىڭ كەڭەسشىسى.
1995-2003 جىلدارى قازاقستان ەڭبەك جانە حالىقتى الەۋمەتتىك قورعاۋ مينيسترلىگىنىڭ ءبولىم باستىعى، باسقارما باستىعىنىڭ ورىنباسارى، باسقارما باستىعى، دەپارتامەنت ديرەكتورىنىڭ ورىنباسارى، دەپارتامەنت ديرەكتورى بولدى.
2003-2005 جىلدارى – ەڭبەك جانە حالىقتى الەۋمەتتىك قورعاۋ ۆيتسە-ءمينيسترى.
2005 جىلدان – «مەملەكەتتىك اننۋيتەتتىك كومپانيا» ءومىردى ساقتاندىرۋ جونىندەگى كومپانياسى» اق باسقارما توراعاسى.
2009 جىلدىڭ 4 ناۋرىزىنان – ەڭبەك جانە حالىقتى الەۋمەتتىك قورعاۋ ءمينيسترى.
2013 جىلدىڭ 28 قاراشاسىنان – قازاقستان پرەمەر-ءمينيسترىنىڭ ورىنباسارى.
2014 جىلدىڭ 11 قاراشاسىنان - قر مەملەكەتتىك حاتشىسى.
2019 جىلدىڭ اقپانىنان – قازاقستان پرەمەر-ءمينيسترىنىڭ ورىنباسارى.
2019 جىلدىڭ تامىزىنان 2020 جىلدىڭ ناۋرىزىنا دەيىن ءماجىلىس دەپۋتاتى بولدى.
2020 جىلدىڭ ناۋرىزىنان 2022 جىلدىڭ ساۋىرىنە دەيىن قىزىلوردا وبلىسىنىڭ اكىمى بولدى.
ەسكە سالايىق، وسىدان شامامەن ەكى جىل بۇرىن قىزىلوردا وبلىسىنىڭ اكىمى گۇلشارا ابدىحالىقوۆا جاڭاقورعان اۋدانىنا جۇمىس ساپارىمەن بارعان. سول كەزدە پوليتسەيلەر اكىم كەلەدى دەپ جولدى جاۋىپ، باسقا كولىكتەردى جۇرگىزبەي قويعان. بۇل جاعدايعا اشۋلانعان قىزىلوردالىق تۇرعىن اۋدان ارالاپ جۇرگەن ءوڭىر باسشىسىنا بارىپ «جولدى جاباتىن حاننىڭ قىزىسىز با؟» دەپ شۇيلىككەن. بۇل جاعداي الەۋمەتتىك جەلىلەردە قىزۋ تالقىلانعان بولاتىن.
