الەۋمەتتىك جەلىلەردە قاسىم-جومارت توقاەۆ ءوزىنىڭ جەتىستىككە جەتۋ قۇپياسىمەن ءبولىسىپ، كريپتوۆاليۋتامەن قوماقتى قارجى تابۋعا مۇمكىندىك بەرەتىن Immediate Edge باعدارلاماسى تۋرالى ايتقان سۇحباتى تارالۋدا. مۇنىڭ ءبارى فەيك جانە الاياقتىق، دەپ حابارلايدى «ادىرنا» ءتىلشىسى stopfake.kz-كە سىلتەمە جاساپ.
شىندىعىندا، ول مۇنداي سۇحبات بەرمەگەن. ءماتىندى دە، «جەتىستىككە جەتۋ قۇپيالارىن» دا الاياقتار جازعان. ءدال وسىنداي وقيعا 2020 جىلى اۆستراليادا تاراعان بولاتىن، بىراق ول كەزدە ايگىلى اۆستراليالىق كاسىپكەر ديك سميت پەن جازۋشى ۆاليد اليدەن سۇحبات بەرگەن.
وسىدان كەيىن اۆستراليالىق باق بۇل – الاياقتاردىڭ ءىسى دەپ حابارلادى. وكىنىشكە وراي، ول كەزدە ەلدىڭ كەيبىر تۇرعىندارى ءوز جيناقتارىنان ايىرىلىپ قالعان بولاتىن.
2021 جىلى Immediate Edge ۇلىبريتانيادا جارنامالىق ناۋقاندى بەلسەندى جۇرگىزە باستادى. بەلگىلى ءبىر سەرۆيستەر مەن ونىمدەرگە قاتىستى كليەنتتەردىڭ پىكىرلەرىنە ارنالعان Trustpilot.com پورتالىندا ەل تۇرعىندارى Immediate Edge – الاياقتار دەپ جازدى. پايدالانۋشىلاردىڭ ءبىرى ءتىپتى ولاردىڭ جۇمىسى مەن سحەماسىن ەگجەي-تەگجەيلى سيپاتتاعان. ونىڭ ايتۋىنشا، از دا بولسا، قىزىعۋشىلىق تانىتقان كليەنتتەرگە ءار ءتۇرلى «مەنەدجەرلەر» ۇدايى قوڭىراۋ شالىپ وتىرادى جانە ساۋدا-ساتتىققا قاتىسۋ جانە قوماقتى قارجى تابۋ ءۇشىن 250 فۋنت ستەرلينگ تولەۋدى ۇسىنادى. ال تولەم جاسالعاننان كەيىن، ساۋدا-ساتتىققا قاتىسۋعا رۇقسات بەرىلمەگەنى جانە «تاپقان» اقشانى الۋ مۇمكىن ەمەستىگى انىقتالادى.
بروكەر بولىپ تابىلاتىن ونلاين-الاياقتاردى اشكەرەلەۋمەن اينالىساتىن ScamCryptoRobots.com پورتالى دا Immediate Edge – الاياقتىق دەپ جازدى.
دەمەك، قازنەتتە تاراعان قاسىم-جومارت توقاەۆتىڭ Immediate Edge جۇيەسى ارقىلى اقشا تابۋعا شاقىرعان سۇحباتى – فەيك.
