قىزىلوردالىقتاردىڭ گازعا قارىزى 1 ميلليارد تەڭگەدەن اسىپ كەتكەن، دەپ حابارلايدى "ادىرنا" ۇلتتىق پورتالى "حابار 24"-كە سىلتەمە جاساپ.
بەلگىلى بولعانداي، قوردالانىپ قالعان قارىزى بار ابونەنتتىڭ سانى — 55 مىڭ. جىلۋ ماۋسىمى اياقتالعاننان كەيىن زاڭ بويىنشا تۇتىنۋشىلاردى گازدان اجىراتۋعا رۇقسات. سوندىقتان «قازترانسگاز ايماق» اق قىزىلوردا وندىرىستىك فيليالى ۇيلەردى كوگىلدىر وتىننان اجىراتۋدى باستاپ كەتكەن.
ماسەلەن، قىزىلوردا قالاسى، قارابالاەۆ كوشەسىندەگى جەكە تۇرعىن ءۇيدىڭ ءبىرىنىڭ يەسى ەكى جىلدان بەرى اقى تولەمەگەن. قوردالانعان قارىزى 142 مىڭ تەڭگەدەن اسىپ كەتىپتى. جالپى ءبىر عانا تيتوۆ ىقشام اۋدانىندا 9300 ابونەنت بولسا، سونىڭ 8 جارىم مىڭدايى ۋاقىتىندا تولەم جاساماي وتىر.
– قارسىلىق بىلدىرەدى ابونەنتتەر، وشىرتكىزبەيدى. كونتروللەردى دە تىڭدامايتىن ابونەنتتەر بار. ەڭ جوعارعى قارىز 300-350 مىڭنان باستالادى، ەڭ تومەنگى قارىز 25 مىڭ، 10 مىڭ تەڭگەگە دەيىن قارىزدار بار، — دەيدى "قازترانسگاز ايماق" اق قىزىلوردا وندىرىستىك فيليالىنىڭ ءبولىم باسشىسى ق.تۇرعانباەۆا.
"قازترانسگاز ايماق" اق قوف اپاتتى-ديسپەتچەرلىك قىزمەتىنىڭ باسشىسى بازاربەك ەرىمبەتوۆتىڭ ايتۋىنشا، بۇگىندە قىزىلوردا قالاسى مەن قىزىلوردا وبلىسى بويىنشا تۇتىنۋشىلاردىڭ گازعا بەرەشەگى 1 ملرد تەڭگەدەن اسىپ كەتكەن.
"ادىرنا" ۇلتتىق پورتالى.
