نۇر-سۇلتاندا سەگىزىنشى قاباتتا تەرەزەگە ءىلىنىپ تۇرعان قىزدى قۇتقارعان 36 جاستاعى ءسابيت شونتاقباەۆ قازاقستان حالقىنا ءۇن قاتتى، دەپ حابارلايدى “ادىرنا” ۇلتتىق پورتالى tengrinews.kz سايتىنا سىلتەمە جاساپ.⠀
"جاعدايىم جاقسى. جاڭا عانا ءۇش بولمەلى پاتەر بەرگەن قۇرىلىس كومپانياسىنىڭ كەڭسەسىنەن شىقتىم. قۇجاتتاردى تولتىرىپ شىقتىم. ماعان كومەكتەسكەن دوسىما دا ەكى بولمەلى پاتەر بەرىلەدى دەدى. قازىر قۇجاتتارىن دايىنداپ جاتىر", - دەدى شونتاقباەۆ .
ايتۋىنشا، وعان بەلگىسىز بىرەۋلەر تەلەفون سوعىپ، كەشەگى ارەكەتى ءۇشىن العىس ايتىپ جاتقان كورىنەدى.
ء"بارىن بىردەي ەستە ساقتاي المايمىن، ءبارى العىس ايتىپ، قولداپ جاتىر. جەزقازعان، كوكشەتاۋ، تالدىقورعان، الماتىدان، جان-جاقتان تەلەفون سوعىپ جاتىر. ءتىپتى، كوبىن تانىمايمىن", - دەيدى ول.
ءسابيت شونتاقباەۆ قولداپ جاتقان قازاقستان حالقىنا العىسىن ءبىلدىردى.
"قۇدايعا شۇكىر، ماعان ءبارى جەتەدى. قازاقستان حالقىنا ءۇن قاتقىم كەلەدى، كومەكتەسىپ جاتقان ادامدارعا العىس ايتامىن. ءبىر-بىرىمىزگە جاقسىلىق جاساۋ وتە دۇرىس", - دەيدى ول.
ءسابيت قىزدىڭ اتا-اناسىمەن ءالى كەزدەسپەگەنىن ايتتى.
"قىزدىڭ اناسى تەلەفون سوعىپ، العىس ايتتى. اتا-اناسىن ءالى كورگەن جوقپىن", - دەپ تۇيىندەدى ول.
”ادىرنا” ۇلتتىق پورتالى
