سوڭعى ۋاقىتتا سۋ تاسقىنى ماسەلەسى اۋدان جۇرتشىلىعىن الاڭداتىپ، قوعامدىق رەزونانس تۋعىزدى. ەرىگەن قار سۋى مەن جوعارىدان كەلگەن قىزىل سۋدىڭ ابىگەرگە سالعانى بار.
بۇگىن ءوزىمنىڭ جەكە پاراقشام ارقىلى سۋ تاسقىنىنىڭ الدىن الۋ شارالارى كەزىندەگى جەرگىلىكتى اتقارۋشى ورگان وكىلدەرىنىڭ ارەكەتىن، كوزبەن كورىپ، قۇلاق ەستىگەن دۇنيەنى بايانداۋدى ءجون كوردىم.
بيىلعى جىلدىڭ كوكتەمى تەك اۋدان جۇرتشىلىعىن عانا ەمەس، ەلىمىزدىڭ بىراقاتار وڭىرىنە قاۋىپ ءتوندىردى. كازتالوۆ اۋدانى دا سۋ تاسقىنىنىڭ زاردابىن شەگۋى مۇمكىن ەدى. «قازسۋشار» رمك باتىس قازاقستان وبلىستىق فيليالىنان رەسەي فەدەراتسياسىنىڭ سۋ قويمالارىنان كوپ مولشەردە سۋ جىبەرىلىپ جاتىرعاندىعى جونىندە حابار الدىق. سول ساتتەن باستاپ اۋدان اكىمى اپپاراتىنىڭ ۇجىمى تاۋلىكتىك جۇمىس رەجيمىنە كوشىپ، سۋدىڭ قارقىنىنا ساعات سايىن باقىلاۋ جۇرگىزىلىپ وتىردى.
اۋدان اكىمى اسلانبەك سارقۇلوۆتى الاڭداتقان باستى ماسەلە — حالىقتىڭ اماندىعى. ءوزى باستاپ، ورىنباسارلارى مەن ءبولىم، مەكەمە باسشىلارى سۋ باسۋ قاۋپى بار اۋىلداردا سۋ تاسقىنىنىڭ الدىن الۋ شارالارىن جۇرگىزدى. وبلىس باسشىلىعىمەن كەلىسە وتىرىپ، اۋدانىمىزعا تەحنيكالار الدىردى. اۋدانىمىزداعى مەردىگەرلەرمەن جانە جەكە كاسىپكەرلەر، شارۋا قوجالىق جەتەكشىلەرىمەن دە سويلەسىپ، سۋ تاسقىنىنىڭ الدىن الۋ شارالارىنا قولداۋ كورسەتۋگە شاقىردى. ءتىلسىز جاۋمەن كۇرەسكە تەك باسشىلار عانا ەمەس مەكەمە قىزمەتكەرلەرى دە جۇمىلدىرىلىپ، ەرىكتىلەر جانە اۋىل تۇرعىندارى تارتىلدى.
اۋدان اكىمى توتەنشە جاعدايدىڭ الدىن الۋ جونىندەگى شتاب مۇشەلەرىمەن، ورىنباسارلارىمەن بىرگە اۋدانىمىزدىڭ بارلىق اۋىلدىق وكرۋگتەرى مەن ەلدى مەكەندەرىندە بولىپ،سۋ تاسقىنىنىڭ الدىن الۋ شارالارىن، ليماندار مەن كولدەرگە سۋ شىعارۋ جۇمىستارىن باقىلادى. 31 ناۋرىز كۇنى اۋدانىمىزعا وبلىستىق توتەنشە جاعدايلار ءبولىمىنىڭ قولداۋىمەن ترەكول ماركالى جول تالعامايتىن تەحنيكاسى كەلدى. سول كۇنى كازتالوۆ اۋدانىنىڭ سۋ تاسقىنىنا قارسى شتابىنىڭ مۇشەلەرى «ۆارفولومەەۆكا»، «كازتالوۆ 1» سۋ قويماسى، «مەدەتساي» بوگەتى، «اقسيراق» قاقپاسىنىڭ احۋالىمەن تانىسىپ، باقىلاۋعا الدى. اۋدان اكىمى اسلانبەك سارقۇلوۆ باستاعان شتاب مۇشەلەرى جانە بقو قوعامدىق كەڭەسىنىڭ توراعاسى ەربول سالىقوۆ، بقو اۋىل شارۋاشىلىعى باسقارماسىنىڭ باسشىسى م.ا. رۇستەم زۇلقاشەۆ، «قازسۋشار» رمك بقو فيليالى ديرەكتورىنىڭ ورىنباسارى تولەگەن عۇماروۆ اتالعان نىساندارداعى سۋدىڭ كەلۋىن جانە ايداۋ پروتسەسىن نازارعا الدى. سۋدىڭ كەلۋى جانە ءوتۋى قارقىندى. شتاب مۇشەلەرى جانە وبلىستان كەلگەن ماماندار سۋ تاسقىنىنىڭ الدىن الۋ ماقساتىندا بىرقاتار شەشىمدەر قابىلدادى. سونىڭ ءبىرى قوشانكول اۋىلدىق وكرۋگىنىڭ ليماندارى مەن كولدەرىنە سۋ ايداۋ ارقىلى كازتالوۆ اۋىلىنا كەلەتىن سۋ قارقىنىن ازايتۋ.
1 ءساۋىر كۇنى اۋدان اكىمى سۋ باسۋ قاۋپى بار، قاراوزەن بويىندا ورنالاسقان ساتىبالدى (كوكتەرەك اۋىلدىق وكرۋگى), بوستاندىق (قاراسۋ اۋىلدىق وكرۋگى), جاس (قاراوزەن اۋىلدىق وكرۋگى) ەلدى مەكەندەرىندە بولىپ، وزەن سۋىنىڭ كەلۋ قارقىنىن، اعىمداعى احۋالدى باقىلاپ، ەلدى مەكەندەر تۇرعىندارىمەن كەزدەسىپ، سۋ تاسقىنىنىڭ الدىن الۋ ماسەلەلەرىن تالقىلادى.
سونىمەن قاتار اۋدان اكىمى اسلانبەك سارقۇلوۆ №2 كازتالوۆ اۋداندىق اۋرۋحاناسىندا بولىپ، سۋ تاسقىنىنىڭ الدىن الۋ كەزىندە جاراقات العان قۇتقارۋشى №17 ءورت ءسوندىرۋ بولىمىندە بولىمشە كومانديرى باتىربەك قاپسيىقوۆپەن كەزدەستى. اۋدان باسشىسى قۇتقارۋشىعا ەل باسىنا كۇن تۋعان كەزدەگى ەڭبەگى ءۇشىن ريزاشىلىعىن ءبىلدىردى.
وزدەرىڭىزگە بەلگىلى «لەكەر» سۋ قويماسىنداعى تازا اۋىز سۋ كوكتەمگى قار سۋىمەن ارالاسىپ، اۋدان ورتالىعىنداعى اۋىز سۋ ماسەلەسىنە قيىندىق تۋعىزدى. دەگەنمەن اۋىز سۋ ماسەلەسى بويىنشا شارا قابىلدانىپ، تاسىمال ارقىلى تۇرعىنداردى اۋىز سۋمەن قامتاماسىز ەتۋ جۇمىستارى جۇرگىزىلدى. وسى كۇنى اۋدان اكىمى اسلانبەك سارقۇلوۆ «لەكەر» سۋ قويماسىنا بارىپ، سالا ماماندارىمەن بىرگە جاعدايدى باقىلادى. ستانتسيا اۋماعىندا ءالى دە كوپ مولشەردە قار سۋى بولعاندىقتان اتپەن قاتىناۋ عانا مۇمكىن بولدى. اتالعان سۋ ستانتسياسىنىڭ ماسەلەسى كۇن تارتىبىنە قويىلىپ، الداعى ۋاقىتتا ءتيىستى شارالار قابىلداندى. اۋدان اكىمىنىڭ باستاماسىمەن «لەكەر» سۋ قويماسىنىڭ ۇڭعىمالارىن تازارتۋ جۇمىستارى جۇرگىزىلدى.
اينالاسى سۋعا تولعان سۋ قويماسىنا جەتۋ ءۇشىن بقو توتەنشە جاعدايلار دەپارتامەنتىنىڭ ترەكول ماشيناسى، «بوكەيوردا» مەملەكەتتىك تابيعي رەزەرۆاتىنىڭ ارنايى تەحنيكالارى جۇمىلدىرىلىپ، اۋداندىق ءماسليحات دەپۋتاتتارى مەن اۋداندىق مەكەمە قىزمەتكەرلەرى توپىراق سالىنعان قاپشىقتاردى تيەپ، تاسىمالداۋعا سەپتىگىن تيگىزدى. اۋدان اكىمى اسلانبەك احمەتوللاۇلى جۇمىسشىلارعا قۇرمەتپەن قاراپ، ءوزى دە بىلەك سىبانا كىرىسىپ بىرگە جۇمىس ىستەدى.
وسى كۇنى كەشكە اۋدان ورتالىعىندا جاماعاتقا اۋىزاشار بەرىلدى. اۋىزاشارعا قاتىسقان اۋدان اكىمى جاماعاتتى رامازان ايىمەن قۇتتىقتاپ، سۋ تاسقىنىنىڭ الدىن الۋداعى بەلسەندىلىكتەرى ءۇشىن ريزاشىلىعىن ءبىلدىردى. سونداي-اق «ەلدە ورىن العان جاعدايعا بايلانىستى اۋدان اكىمدىگىنە الۋعا جوسپارلانعان Hyundai Tucson ماركالى قوس اۆتوكولىك الىنبايدى جانە بۇل قاراجات ەلدى مەكەندەردى سۋدان قورعاۋ شارالارى سىندى وزەكتى ماسەلەلەردى شەشۋگە جۇمسالاتىن بولادى» دەگەن مالىمدەمە جاسادى.
جالپى سۋ تاسقىنى قاۋپى تونگەن مەزگىلدە اۋدان اكىمى كازتالوۆ، جالپاقتال، بوستاندىق، قاراوبا، قوشانكول، تەرەڭكول، جاڭاجول، قاراوزەن، بىرىك، كوكتەرەك، قاراسۋ، اقپاتەر، قايىڭدى، بولاشاق، تالدىقۇدىق، تالدىاپان اۋىلدىق وكرۋگتەرىنىڭ ورتالىعى مەن ەلدى مەكەندەرىندە بولدى. سۋ باسۋ قاۋپى بولعان ساتىبالدىعا وكرۋگ اكىمى باقىتجان ساتقانۇلى، بوستاندىق (قاراسۋ ا.و.) ەلدى مەكەنىنە «ايبىن» سپورت كلۋبىنىڭ ديرەكتورى اسحات تالعاتۇلى جاۋاپتى بولىپ، قاۋىپ سەيىلگەنشە ەلدى مەكەننىڭ قاۋىپسىزدىگىن قامتاماسىز ەتۋ جۇمىستارىن جۇرگىزىپ، باسشىلىقتى اعىمداعى احۋالمەن ساعات سايىن حاباردار ەتىپ وتىردى.
ءتىلسىز جاۋمەن كۇرەسكە 19 تەحنيكا وبلىستان كەلدى، اۋداننان 27 تەحنيكا، 1500 ادام، 5 قايىق، 1 تىركەمەلى موتوپومپا جانە 2 موتوپومپا جۇمىلدىرىلدى. اۋدان بويىنشا 26050 قاپشىق قاپتالدى.
سۋ تاسقىنىنىڭ الدىن الۋ جۇمىستارى كەزىندە اۋدان اكىمى مەن ورىنباسارلارى، مەكەمە باسشىلارى مەن مەكەمە قىزمەتكەرلەرى ۇيدە ەمەس، تۇزدە بولدى. كابينەتتە ەمەس، حالىقپەن بىرگە بولدى. اۋىر كەزەڭدە ماماندارمەن جانە اۋدانىمىزدىڭ اعا بۋىن وكىلدەرىمەن ماڭىزدى شەشىمدەر قابىلداپ، ءبىرىنشى قارا باستىڭ قامىن ەمەس، حالىقتىڭ اماندىعىن قويدى. تەك اۋدان ورتالىعى عانا ەمەس، اۋدانىمىزدىڭ بارلىق اۋىلدارى مەن ەلدى مەكەندەرىندە بولىپ، ترەكول تەحنيكاسى ارقىلى 2100 شاقىرىمدى ءجۇرىپ ءوتىپ، جاعدايدى ءوز كوزىمەن باقىلادى. تاڭ اعارىپ اتقان ساتتە جولعا شىعىپ، ءتۇن ورتاسى اۋعان شاقتا قايتا ورالدىق. دالادا باتىپ، سۋدىڭ ورتاسىندا قالعان دا ساتتەر بولدى. بقو تجد جەدەل قۇتقارۋ جاساعىنىڭ باس قۇتقارۋشىلارى شىنبولات جامانقۇلوۆ، ءادىلحان جۇماعاليەۆ جانە بقو تجد ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى (ورال قالاسى) رمم №21 ءوسب ءورت ءسوندىرۋشى-قۇتقارۋشى ازاماتتىق قورعاۋ كىشى سەرجانتى ازات اليموۆ سىندى ازاماتتاردىڭ كومەگىمەن دىتتەگەن ماقساتىمىزعا جەتتىك.
سۋ تاسقىنىنىڭ الدىن الىپ، قاۋىپتى سەيىلتۋدە مەملەكەتتىك قىزمەتكەرلەردىڭ ۇلەسى زور!
