ەلىمىزدە بارلىق اۋىل تۇرعىنى 1 شىلدەدەن باستاپ مەديتسينالىق تەكسەرىستەن وتەدى. بۇل تۋرالى دەنساۋلىق ساقتاۋ ءمينيسترى اجار عينيات بىرقاتار وبلىس اۋدانى مەن مونوقالالارىنىڭ باس دارىگەرلەرىمەن كەزدەسۋ بارىسىندا ايتتى، دەپ حابارلايدى «ادىرنا» ءتىلشىسى.
«نەگىزگى مەديتسينالىق، ينفراقۇرىلىمدىق، تەحنولوگيالىق رەسۋرستار قالالاردا شوعىرلانعان جاعدايلاردا اۋىل تۇرعىندارى ءالى دە بىلىكتى مەديتسينالىق قىزمەتتەر، مامانداندىرىلعان كومەك الۋدا قيىندىقتارعا تاپ بولادى. ءبىزدىڭ ورتاق مىندەتىمىز - ءاربىر ءومىر ءۇشىن كۇرەسۋ، ادام قاي جەردە تۇرسا دا، ول ءبىزدىڭ پاتسيەنت بولىپ قالا بەرەدى، ال دارىگەر وعان ەڭ قاجەتتى كومەك كورسەتۋى ءتيىس", - دەدى ول كەڭەسكە قاتىسۋشىلارعا ارناعان سوزىندە.
ءمينيستردىڭ ايتۋىنشا، كوپتەگەن پروبلەمانىڭ تاريحي تامىرى بار، ولار جىلدار بويى سوزىلىپ، بۇگىندە دەنساۋلىق ساقتاۋ سالاسىنا ۇلكەن جۇكتەمە تۇسىرۋدە. بۇل كادر تاپشىلىعى، مەديتسينالىق وبەكتىلەردىڭ فيزيكالىق توزۋى، جول-كولىك قاتىناسىنىڭ السىزدىگى، اۋىلدا مەديتسينالىق تەحنيكامەن جاراقتاندىرۋدىڭ تومەندىگى.
وسىعان بايلانىستى، مينيسترلىك اۋىل تۇرعىندارىن باستاپقى دياگنوستيكامەن قامتۋدى ارتتىرۋعا باعىتتالعان بىرقاتار ءىس-شارالاردى ىسكە اسىرىپ جاتقانىن، ول ءۇشىن بارلىق جاستاعى اۋىل تۇرعىندارىن پروفيلاكتيكالىق تەكسەرۋ جۇرگىزۋ تۋرالى بۇيرىقتىڭ جوباسى ازىرلەنگەنىن حابارلادى. تەكسەرىس 1 شىلدەدەن باستاپ ىسكە قوسىلماق.
بۇدان باسقا، اۋىلدا مەديتسينالىق كومەكتىڭ قولجەتىمدىلىگىن جاقسارتۋ ءۇشىن دەنساۋلىق ساقتاۋ ۇيىمدارى جەلىسىنىڭ مەملەكەتتىك ءنورماتيۆى، مەديتسينالىق كومەك كورسەتۋ ستاندارتتارى قايتا قاراستىرىلىپ، كولىك مەديتسيناسىنىڭ ارسەنالى كۇشەيتىلەدى.
«ادىرنا» ۇلتتىق پورتالى
