«قازاقستان ينجينيرينگ» R&D ورتالىعى» ساتىلىمعا شىعارىلدى. بۇل تۋرالى «قازاقستان ينجينيرينگ» ۇلتتىق كومپانياسى ايتتى، دەپ حابارلايدى «ادىرنا» ءتىلشىسى NBK-عا سىلتەمە جاساپ.
كاسىپورىننىڭ باستاپقى باعاسى 1 ملرد 120,3 ملن تەڭگە بولىپ بەلگىلەنگەن.
E-qazyna.kz پورتالىنداعى ساۋدا-ساتتىق تۋرالى حابارلاندىرۋعا سايكەس، اۋكتسيون 27 قاراشادا وتەدى. قازىرگى ۋاقىتتا الەۋەتتى ساتىپ الۋشىلاردان وتىنىمدەر قابىلدانىپ جاتىر. كەپىلدىك جارنا كولەمى – 168 ملن تەڭگە.
ساتىلىمعا جارعىلىق كاپيتالىنداعى 100 پايىز ۇلەس، ياعني كاسىپورىننىڭ تولىق مەنشىگى شىعارىلعان. ونىڭ قۇنى 1 ملرد تەڭگەنى قۇرايدى. كومپانيادا 58 ادام جۇمىس ىستەيدى.
كاسىپورىن استانا قالاسىندا ورنالاسقان. ول قورعانىس جانە ۇلتتىق قاۋىپسىزدىك سالالارىندا عىلىمي زەرتتەۋلەر جۇرگىزىپ، تاجىريبەلىك ازىرلەمەلەرمەن اينالىسادى.
سونداي-اق ۇشقىشسىز اۆياتسيالىق جۇيەلەردىڭ وپەراتورلارىن دايارلاپ، اسكەري دروندار شىعارادى. ونىمدەرىنىڭ قاتارىندا «شاعالا-م» بارلاۋ-سوققى درونى، Samuryq بارلاۋ ۇشقىشسىز ۇشۋ اپپاراتى، جۇك تاسىمالداۋعا ارنالعان كۆادروكوپتەرلەر، كاميكادزە-دروندار، بارراجداۋشى وق-دارىلەر مەن اۋە نىسانالارى بار. بۇدان بولەك، ورتالىق ءموبيلدى روبوتوتەحنيكالىق كەشەندەر دە وندىرەدى.
ورتالىقتىڭ قازاقستاننىڭ قورعانىس ونەركاسىبى ءۇشىن ماڭىزى زور بولعانىمەن، قارجىلىق كورسەتكىشتەرى كوڭىل كونشىتپەيدى. سوڭعى ەسەپتى جىلدىڭ قورىتىندىسى بويىنشا كاسىپورىننىڭ كىرىسى 139,7 ملن تەڭگەنى قۇراسا، شىعىندارى شامامەن 724,7 ملن تەڭگەگە جەتكەن. قىسقا مەرزىمدى اكتيۆتەرى 465 ملن تەڭگە، ۇزاق مەرزىمدى اكتيۆتەرى 250,8 ملن تەڭگە دەپ باعالانعان. ال مىندەتتەمەلەرىنىڭ كولەمى 704,8 ملن تەڭگەنى قۇراعان. كومپانيانىڭ رەنتابەلدىلىگى نولدىك دەڭگەيدە بولعان.
قازان ايىنىڭ سوڭىنداعى جاعداي بويىنشا كاسىپورىننىڭ كرەديتورلار الدىنداعى بەرەشەگى شامامەن 493,4 ملن تەڭگەگە جەتكەن. ونىڭ باسىم بولىگى الىنعان اۆانستار مەن قارىزدار بويىنشا مىندەتتەمەلەردەن تۇرادى. سونىمەن قاتار ساتىپ الۋشىلار مەن تاپسىرىس بەرۋشىلەردىڭ «R&D ورتالىعىنا» بەرەشەگى شامامەن 305 ملن تەڭگەنى قۇرايدى.
