Elımızde barlyq auyl tūrǧyny 1 şıldeden bastap medisinalyq tekserısten ötedı. Būl turaly Densaulyq saqtau ministrı Ajar Ǧiniiat bırqatar oblys audany men monoqalalarynyŋ bas därıgerlerımen kezdesu barysynda aitty, dep habarlaidy «Adyrna» tılşısı.
«Negızgı medisinalyq, infraqūrylymdyq, tehnologiialyq resurstar qalalarda şoǧyrlanǧan jaǧdailarda auyl tūrǧyndary älı de bılıktı medisinalyq qyzmetter, mamandandyrylǧan kömek aluda qiyndyqtarǧa tap bolady. Bızdıŋ ortaq mındetımız - ärbır ömır üşın küresu, adam qai jerde tūrsa da, ol bızdıŋ pasient bolyp qala beredı, al därıger oǧan eŋ qajettı kömek körsetuı tiıs", - dedı ol keŋeske qatysuşylarǧa arnaǧan sözınde.Ministrdıŋ aituynşa, köptegen problemanyŋ tarihi tamyry bar, olar jyldar boiy sozylyp, bügınde densaulyq saqtau salasyna ülken jükteme tüsırude. Būl kadr tapşylyǧy, medisinalyq obektılerdıŋ fizikalyq tozuy, jol-kölık qatynasynyŋ älsızdıgı, auylda medisinalyq tehnikamen jaraqtandyrudyŋ tömendıgı. Osyǧan bailanysty, Ministrlık auyl tūrǧyndaryn bastapqy diagnostikamen qamtudy arttyruǧa baǧyttalǧan bırqatar ıs-şaralardy ıske asyryp jatqanyn, ol üşın barlyq jastaǧy auyl tūrǧyndaryn profilaktikalyq tekseru jürgızu turaly būiryqtyŋ jobasy äzırlengenın habarlady. Tekserıs 1 şıldeden bastap ıske qosylmaq. Būdan basqa, auylda medisinalyq kömektıŋ qoljetımdılıgın jaqsartu üşın densaulyq saqtau ūiymdary jelısınıŋ memlekettık normativı, medisinalyq kömek körsetu standarttary qaita qarastyrylyp, kölık medisinasynyŋ arsenaly küşeitıledı.
«Adyrna» ūlttyq portaly
