قازاقستان كەدەنىندەگى سىبايلاس جەمقورلىق ءىسى بويىنشا ايىپتالۋشىلار ۇستالدى، دەپ حابارلايدى "ادىرنا" سايتى قر باس پروكۋراتۋراسىنىڭ ءباسپاسوز قىزمەتىنە سىلتەپ.
«سىبايلاس جەمقورلىققا قارسى قىزمەت پەن باس پروكۋراتۋرانىڭ بىرلەسكەن ءىس-قيمىلىمەن «نۇر جولى» كەدەن بەكەتىنىڭ باسشىسى مەن ونىڭ ورىنباسارى قىلمىستىق ارەكەتكە سايكەس پروكۋراتۋرا قىزمەتكەرىنە 50 مىڭ اقش دوللارى كولەمىندە پارا بەرگەن جەرىنەن ۇستالدى. سونداي-اق «Cargo Management» جشس وكىلى ينسپەكتورلارعا 30 مىڭ دوللار كولەمىندە پارا بەرگەنى ءۇشىن قاماۋعا الىندى، دەپ حابارلادى سەيسەنبى كۇنى باس پروكۋراتۋرانىڭ رەسمي وكىلى دارحان دۇيسەمباي.
باس پروكۋراتۋرادا ناقتىلانعانداي، 27 قاڭتاردا «بەرەكەت لوگيستيك» جشس-ءنىڭ جۇكتەرىن قايتا تەكسەرۋ بارىسىندا پروكۋرورلار جالپى قۇنى 22 توننا، قۇنى ون ميلليون تەڭگەنى قۇرايتىن كونتراباندالىق جۇكتى انىقتاسا، «نۇر جولى» كەدەن بەكەتىنىڭ مامانى موشكانوۆ جەدەل-ىزدەستىرۋ شارالارىن جۇرگىزگەن. باستاپقى تەكسەرۋدە دەكلاراتسيالانباعان تاۋارلاردىڭ سالماعى نەبارى 337 كگ بولعان.
«تاعى ءبىر جاعدايدا الماتى قالاسى بويىنشا مەملەكەتتىك كىرىستەر دەپارتامەنتىنىڭ قىزمەتكەرلەرى اقپاراتتىق جۇيەلەردەگى اقپاراتتى تۇزەتۋ ارقىلى توعىز يمپورتتاۋشىعا 143 ميلليون تەڭگە سوماسىنداعى تاۋارلاردىڭ كەدەندىك قۇنىنىڭ تەكسەرىسىنە كوز جۇما قاراعان»، - دەپ تولىقتىردى قاداعالاۋ ورگانى.
بارلىق ىستەر تەرگەلۋدە.
«كەدەندىك رەتتەۋ سالاسىنداعى پروبلەمالاردى جويۋ ماقساتىندا ۇكىمەتكە پروكۋرورلىق قاداعالاۋ اكتىسى ەنگىزىلدى»، - دەدى دۇيسەمباي.
ەسكە سالايىق، بۇعان دەيىن قازاقستان پرەزيدەنتى قاسىم-جومارت توقاەۆ كەشەندى تەكسەرۋ جۇرگىزۋدى جانە كەدەندىك شەكارادا ءتارتىپتى قامتاماسىز ەتۋدى تاپسىرعان بولاتىن، سودان كەيىن 29 قاڭتاردا باق قازاقستاننىڭ ىقپالدى وتباسى وكىلدەرىمەن بايلانىسى بار كەدەن وپەراتورلارىن تەكسەرىپ جاتقانىن حابارلادى. كەيىنىرەك، 1 اقپانداعى كەزدەسۋدە توقاەۆ بۇل تاقىرىپقا تاعى دا ورالىپ، كەدەندەگى جانە باسقا دا بىرقاتار سالالارداعى سىبايلاس جەمقورلىقپەن كۇرەستى كۇشەيتۋدى تاپسىردى - پرەزيدەنت ايتقانداي، شەكارادا سىبايلاس جەمقورلىققا تاپ بولعانداردىڭ جارتىسى كەدەن قىزمەتكەرلەرىنە پارا بەرگەن. سونداي-اق 1 اقپاندا «دوستىق» جانە «التىنكول» كەدەن بەكەتتەرىنىڭ باسشىلارى ەرلان ومىرزاقوۆ پەن مالىك شاۋلەنوۆتىڭ قىزمەتىنەن الىنعانىن حابارلاندى. وسى كۇنى اگەنتتىك ىقپالدى وتباسىمەن بايلانىسى بار بىرقاتار قازاقستاندىق فيرمالار قىتايدان، بىرىككەن اراب امىرلىكتەرىنەن جانە تۇركيادان كونتراباندالىق ءونىم اكەلدى دەگەن كۇدىككە ىلىنگەنىن حابارلادى.
اقپاننىڭ 10-ى كۇنى ءماجىلىس دەپۋتاتى ايدوس سارىم «قورعاستاعى» زاڭسىز سحەمالاردان ەڭ كوپ پايدا الۋشىلاردىڭ اتى-ءجونىن تەكسەرۋدەن كەيىن جاريا ەتۋگە ۋادە بەردى.
14 اقپاندا اقوردا ءۇش اپتا ىشىندە قازاقستان مەن قىتاي شەكاراسىنداعى تەكسەرۋلەر بويىنشا سەگىز قىلمىستىق ءىس قوزعالعانىن حابارلادى.
16 اقپاندا قازاقستان ەاەو دەڭگەيىندە قىتايلىق تاۋارلاردىڭ «سۇر» اينالىمى ماسەلەسىن كوتەردى.
22 اقپاندا قازاقستان مەن قىتاي اراسىنداعى كەدەندىك دەرەكتەردەگى الشاقتىق 5,7 ميلليارد دوللاردى قۇرايتىنى بەلگىلى بولدى. سونىمەن بىرگە قىرعىزستاننان قازاقستانعا جۇك كولىكتەرىنىڭ 90 پايىزى دەكلاراتسيالانباعان قىتايلىق تاۋارلاردى تاسىمالدايتىنى بەلگىلى بولدى.
3 مامىردا باس پروكۋراتۋرا كەدەن سالاسىنداعى زاڭسىز سحەمالاردان كەلگەن شىعىن 165 ميلليارد تەڭگەنى قۇرايتىنىن حابارلادى.باس پروكۋراتۋرا سونىمەن قاتار قازتاگ اگەنتتىگىنىڭ قازاقستانداعى ەڭ ىقپالدى وتباسىلاردىڭ بىرىنە قاتىسى بار فيرمالاردىڭ كونترابانداعا قاتىستى دەرەكتەرىن راستادى.
"ادىرنا" ۇلتتىق پورتالى
