سىبايلاس جەمقورلىققا قارسى قىزمەت ءماجىلىستىڭ بۇرىنعى دەپۋتاتى نۇرجان التاەۆتىڭ ۇستالعانىن راستادى، - دەپ حابارلايدى "ادىرنا".
ء"بىز ونىڭ اسا ءىرى كولەمدە پارا الدى دەگەن كۇدىكپەن ۇستالعانىن راستايمىز. تەرگەۋ مۇددەسىنە جانە قىلمىستىق-پروتسەسسۋالدىق كودەكستىڭ 201-بابىنا قاتىستى وزگە دە مالىمەتتەر جاريا ەتىلمەيدى", - دەدى انتيكور.
ەسكە سالايىق، «مۇقالماس» رەسپۋبليكالىق قوعامدىق بىرلەستىگى التاەۆتى كانديدات رەتىندە ۇسىنعان بولاتىن. الايدا بىرلەستىكتىڭ بىرنەشە مۇشەسى جينالىس حاتتاماسىن جارامسىز دەپ تانۋ تۋرالى وتىنىشپەن سوتقا جۇگىنگەن.
سوت جالپى جينالىستا وبلىستىق قوعامدىق ۇيىم مۇشەلەرىنىڭ باسىم بولىگى نۇرجان التاەۆتى كەزەكتەن تىس پرەزيدەنتتىك سايلاۋعا كانديدات رەتىندە ۇسىنۋعا قارسى داۋىس بەرگەنىن انىقتادى.
2022 جىلعى 12 قازاندا ورتالىق سايلاۋ كوميسسياسى پرەزيدەنتتىككە كانديدات نۇرجان التاەۆتىڭ سايلاۋ قۇقىعىن انىقتاۋ ءراسىمىن توقتاتتى.
نۇرجان التاەۆ اۋىل شارۋاشىلىعى ۆيتسە-ءمينيسترى، ەڭبەك جانە حالىقتى الەۋمەتتىك قورعاۋ ۆيتسە-ءمينيسترى قىزمەتتەرىن اتقارعان، سونداي-اق ءماجىلىستىڭ VI شاقىرىلىمىنىڭ دەپۋتاتى بولعان.
2020 جىلى التاەۆ «امانات» (بۇرىنعى «نۇر وتان») پارتياسىنىڭ مۇشەلىگىنەن ايىرىلدى، ال وسك «پارتيانىڭ بەدەلىن تۇسىرەتىن جانە ونىڭ مۇددەلەرىنە نۇقسان كەلتىرەتىن ارەكەتتەردى جاساعانى ءۇشىن، ونىڭ ىشىندە جاڭا ساياسي پارتيا قۇرۋ نيەتى بار ەكەندىگى تۋرالى بىرقاتار جاريا مالىمدەمەلەردە ايتىلعانى ءۇشىن» دەپۋتاتتىق وكىلەتتىگىنەن ايىرىلدى.
كەيىن «ەل تىرەگى» كاسىپوداعىنا كىردى.
"ادىرنا" ۇلتتىق پورتالى
