سەرىك ەرعالي: ءتىل ماسەلەسى مايدانعا اينالىپ بارادى...

3962

جاسىراتىنى جوق. بۇگىن عانا استانالىق جاڭا اشىلعالى وتىرعان 93-مەكتەپتىڭ تاعدىرى كوكپارعا ءتۇستى. ونشاقتى قازاق كەلىنشەگى كەلىپ، وزدەرىنىڭ قۇقىقتارىن العا سالىپ، ورىس سىنىبىن اشۋدى تالاپ ەتتى. بۇل جايتتى الدىن الا ەستىگەن زيالى قاۋىم، ءبىر توپ ماجىلىسمەن جانە قالالىق شەندىلەر، ءتىل جاناشىرلارى بىرىگىپ، ىرىتكىگە قارسى تۇرۋعا تۋرا كەلدى.

الگى ونشاقتى كەلىنشەك قازاقشا جاقسى تۇسىنەدى، جارتىسى سويلەيدى، بىراق بالالارىن ورىس سىنىبىنا بەرۋگە بارىن سالدى. ورتاسىندا ءبىر جىگىت بار. بايقاعانىم جانە ءبىر كەلىنشەكتىڭ ايتۋىنشا، كۇيەۋى وفيتسەر ەكەن، سوعان قاراعاندا بارلىعى دا قازاق اسكەرىنىڭ قىزمەتشىلەرى سەكىلدى.

كەزەك پە كەزەك سويلەپ ارىندارىن باسقانداي بولدىق. اسىرەسە اياتجان احمەتجانۇلىنىڭ ءسوزى ناقتى ءارى شەشىمگە تولى بولدى: زاڭ بويىنشا راديۋسى 2 شاقىرىمعا دەيىنگى ماڭايداعى كەز كەلگەن مەكتەپ تاڭداي بەرۋگە بولادى ەكەن. سوتتا بۇل جاعىنان جەڭە المايسىڭدار دەپ اياتجان ماڭدايعا ۇرعاندا ەتىپ ايتتى. ال بۇلار جاڭادان سالىنعان براۆو تۇرعىن ءۇي كەشەنىنىڭ جانىنداعى 1200 ورىندىق مەكتەپتى يەلەنگىسى كەلەدى. ءۇي ىشىنەن ءۇي تىككىسى كەلەدى. ءتورت كەلىنشەكتىڭ ەسىمدەرى - كادىمگى ءجاميلا، سامال، ايگەرىم، شولپان! رۋلارى - ۋاق، قىپشاق، ارعىن،بىرەۋى رۋىن بىلمەيدى - رەسەيلىكپىن دەيدى. بۇلار - ءبىزدىڭ سوڭعى 30 جىلدىق تاۋەلسىزدىك ءداۋىرىنىڭ ۇرپاعى. بۇلاردى كىنالاۋعا بولا ما؟! مەنىڭشە جوق.

ولارعا ءبىر سۇراق قويىپ، ءۇش ارگۋمەنت ايتۋلارىن سۇرادىم: نەلىكتەن بالاسىن ورىسشا وقىتپاق؟ 1.قازاقشا وقۋ قيىن. 2.وقۋلىقتارىن ۇقپايمىز... دەگەن جاۋاپ بەردى.

شىن مانىندە جاستاردىڭ قازاقشا وقۋدان قورقۋىنا 30 جىلداعى وقىتۋ كورىنىسى سەبەپ ەكەنى ءمالىم. كونتەنت جوق، ساپاسىز. وقۋلىق ەكىباستان. ونىڭ ۇستىنە - لاتىنشامەن ءۇش رەت ءالىپبي ۇسىنىپ شوشىتتىق! بۇنىڭ ءبارى ءىزسىز كەتىپ جاتقان جوق.

بۇنىڭ ءبارىن مويىنداي كەلە، ەندى مۇلدەم باسقا وزگەرىستەر باستالعانىن، بۇنىڭ ءبارى جوندەلىپ جاتقانىن كەلتىردىك. سويلەگەن تالاي شەشەن قازاقتىلدى وقۋدىڭ ەلدە اناعۇرلىم ساپالى ەكەنىن جەتكىزدى، ورىسشا وقىتۋعا ءجونى ءتۇزۋ مۇعالىم دە جوق ەكەنىن كولدەنەڭ تارتتىق.
قىسقاسى 30 جىل بويعى بەتىمەن كەتكەن ءبىلىم بەرۋ سالاسىنىڭ اۋسەلەسى 50-گە تارتا ۇلتشىلدى ءبىرشاما تەرلەتتى. كەلىنشەكتەردىڭ ارىنى باسىلعانداي، بىراق ىشىندەگى ءبىر-ەكەۋى باس تارتقىسى جوق. رۋحاني كەرى كەتىپپىز. بيلىككە ەرەگەسۋ دە بار، ءوز ۇلتىنان جەرىنۋ دە بار. سوعان قاراعاندا بۇل سالادا ىستەلەر شارۋا شاشەتەكتەن.
بەتىمىزدەن العاندار قاقىلارىن ايتىپ قاقىلداعاسىن، فوتوعا بەت-جۇزدەرىن تۇسىرۋگە جاسقاندىق.

ءبىر اتاپ وتەرلىگى - قازاقتىلدى قاۋىمنىڭ ابدەن ىسىلعاندىعى، بىرىگە تۇسكەندىگى. كوڭىلگە سەنىم ۇيالاي ءتۇستى. بۇل استانانىڭ قاق تورىندەگى بولعان رۋحاني شايقاستان كىشكەنە عانا رەپورتاج.

 

 

پىكىرلەر
رەداكتسيا تاڭداۋى
Серіктестер/Партнеры
Студия IMA - создание сайтов Доставка цветов Астана - Lova Buket