Tıl mäselesı maidanǧa ainalyp barady...

Jasyratyny joq. Bügın ǧana astanalyq jaŋa aşylǧaly otyrǧan 93-mekteptıŋ taǧdyry kökparǧa tüstı. Onşaqty qazaq kelınşegı kelıp, özderınıŋ qūqyqtaryn alǧa salyp, orys synybyn aşudy talap ettı. Būl jaitty aldyn ala estıgen ziialy qauym, bır top mäjılısmen jäne qalalyq şendıler, tıl janaşyrlary bırıgıp, ırıtkıge qarsy tūruǧa tura keldı. Älgı onşaqty kelınşek qazaqşa jaqsy tüsınedı, jartysy söileidı, bıraq balalaryn orys synybyna beruge baryn saldy. Ortasynda bır jıgıt bar. Baiqaǧanym jäne bır kelınşektıŋ aituynşa, küieuı ofiser eken, soǧan qaraǧanda barlyǧy da qazaq äskerınıŋ qyzmetşılerı sekıldı. Kezek pe kezek söilep aryndaryn basqandai boldyq. Äsırese Aiatjan Ahmetjanūlynyŋ sözı naqty ärı şeşımge toly boldy: zaŋ boiynşa radiusy 2 şaqyrymǧa deiıngı maŋaidaǧy kez kelgen mektep taŋdai beruge bolady eken. Sotta būl jaǧynan jeŋe almaisyŋdar dep Aiatjan maŋdaiǧa ūrǧanda etıp aitty. Al būlar jaŋadan salynǧan Bravo tūrǧyn üi keşenınıŋ janyndaǧy 1200 oryndyq mekteptı ielengısı keledı. Üi ışınen üi tıkkısı keledı. Tört kelınşektıŋ esımderı - kädımgı Jämilä, Samal, Äigerım, Şolpan! Rulary - uaq, qypşaq, arǧyn,bıreuı ruyn bılmeidı - reseilıkpın deidı. Būlar - bızdıŋ soŋǧy 30 jyldyq täuelsızdık däuırınıŋ ūrpaǧy. Būlardy kınälauǧa bola ma?! Menıŋşe joq. Olarǧa bır sūraq qoiyp, üş argument aitularyn sūradym: Nelıkten balasyn orysşa oqytpaq? 1.Qazaqşa oqu qiyn. 2.Oqulyqtaryn ūqpaimyz... degen jauap berdı. Şyn mänınde jastardyŋ qazaqşa oqudan qorquyna 30 jyldaǧy oqytu körınısı sebep ekenı mälım. Kontent joq, sapasyz. Oqulyq ekıbastan. Onyŋ üstıne - latynşamen üş ret älıpbi ūsynyp şoşyttyq! Būnyŋ bärı ızsız ketıp jatqan joq. Būnyŋ bärın moiyndai kele, endı müldem basqa özgerıster bastalǧanyn, būnyŋ bärı jöndelıp jatqanyn keltırdık. Söilegen talai şeşen qazaqtıldı oqudyŋ elde anaǧūrlym sapaly ekenın jetkızdı, orysşa oqytuǧa jönı tüzu mūǧalım de joq ekenın köldeneŋ tarttyq. Qysqasy 30 jyl boiǧy betımen ketken bılım beru salasynyŋ äuselesı 50-ge tarta ūltşyldy bırşama terlettı. Kelınşekterdıŋ aryny basylǧandai, bıraq ışındegı bır-ekeuı bas tartqysy joq. Ruhani kerı ketıppız. Bilıkke eregesu de bar, öz ūltynan jerınu de bar. Soǧan qaraǧanda būl salada ısteler şarua şaşetekten. Betımızden alǧandar qaqylaryn aityp qaqyldaǧasyn, fotoǧa bet-jüzderın tüsıruge jasqandyq. Bır atap öterlıgı - qazaqtıldı qauymnyŋ äbden ysylǧandyǧy, bırıge tüskendıgı. Köŋılge senım ūialai tüstı. Būl astananyŋ qaq törındegı bolǧan ruhani şaiqastan kışkene ǧana reportaj.