25 ساۋىرگە قاراعان ءتۇنى تۇركىستان وبلىسى قازىعۇرت جانە سارىاعاش اۋدانىندا بولعان سەلدەن كەمى ءتورت ءجۇز مال قىرىلىپ، 18 ۇيگە سۋ كىردى. بۇل تۋرالى "ادىرنا" سايتى ازاتتىق راديوسىنا سىلتەپ حابارلايدى.
وتباسىمەن مال باعىپ كۇن كورەتىن ساراپحانا اۋىلىنىڭ تۇرعىنى عازيزا باتىرحانوۆا نوسەر جاڭبىردان كەيىن شامامەن 20 مينۋتتا سەل ءجۇرىپ، سۋ ادام بويىنا جەتكەنىن ايتادى. ول قوراسىنداعى ءىرى قارا مەن ءتورت ءجۇز قويدىڭ جارتىسىنا جۋىعىن شىعارىپ ۇلگەرگەنىمەن، قالعانى لاي سۋعا تۇنشىعىپ، قوراسىندا ولگەن.
- بۇل - 25 وتباسىنىڭ قويى ەدى. ءبىز جاياتىن ەدىك. تۇنگى ساعات توعىزدار شاماسى سۋ كەلدى. ۇيدەن شىققانىمىز سول-اق ەدى، سۋ كەۋدەمىزگە دەيىن كوتەرىلدى. ۇلگەرە المادىق. ءىرى قالا مال مەن جىلقىنى شىعاردىق. قويدىڭ قوراسى سۋعا تولدى. قورانى بۇزىپ 187 باس قويدى امان الىپ قالدىق. قالعانى تۇنشىعىپ ءولدى، - دەيدى ول.
تۇرعىنداردىڭ ايتۋىنشا، توتەنشە جاعداي تۋرالى الدىن-الا ەسكەرتۋ بولماعان. سۋمەن بىرگە اعىپ كەلگەن لاي اۋلا مەن قورالاردى باسىپ قالعان. تاڭعا دەيىن ءوز كۇشتەرىمەن تازالاۋعا تىرىسقان.
- تاڭەرتەڭ اكىمدىككە كومەك سۇراپ باردىق. تەحنيكا بەرەيىك، وزدەرىڭ جانارمايىن قۇيىپ تازالاتىڭدار دەدى. ەندى سول كومەك كۇتىپ وتىرمىز، - دەيدى جىڭىشكە اۋىلىنىڭ تۇرعىنى مەڭدىباي جۇباتوۆ
اۋداندا توتەنشە جاعدايعا بايلانىستى ارنايى كوميسسيا قۇرىلىپ، شىعىن كولەمى انىقتالىپ جاتىر. اۋدان اكىمدىگى دۇيسەنبى تۇسكە دەيىن سەلدەن سۋعا اعىپ نە تۇنشىعىپ ولگەن 312 مال تىركەلگەنىن، ناقتى سانى ءالى ەسەپتەلىپ جاتقانىن حابارلادى. تۇركىستان وبلىسى اكىمدىگىنىڭ مالىمەتىنشە، سەلدەن 53 ءۇيدىڭ اۋلاسىنا سۋ كىرگەن.
"18 ۇيگە، ءبىر مەيرامحانا مەن 16 عيماراتقا سۋ كىرگەن. ادام شىعىنى جوق. قاۋىپ-قاتەر سەيىلگەن. ەۆاكۋاتسيالانعان تۇرعىندار ۇيىنە قايتتى" دەيدى اكىمدىك.
"ادىرنا" ۇلتتىق پورتالى
