ەلىمىزدە ءۇش ميلليونعا جۋىق مال قىرىلىپ، ەكى ميلليون ادام تابىسىنان ايىرىلۋى مۇمكىن. كوڭىل قۇلازىتارلىق مۇنداي بولجامدى قازاقستاننىڭ مال وسىرۋشىلەر ۇلتتىق قاۋىمداستىعى جاسادى. بۇل تۋرالى "ەۋرازيا" ءبىرىنشى ارناسى حابارلايدى.
اپتاپ ىستىقتان كولدەر سۋالىپ، ءشوپ كۇيىپ كەتتى. شارۋالار مەن ەكولوگتار بۇعان كۇن رايىن عانا ەمەس، سالعىرتتىق تانىتقان شەنەۋنىكتەردى دە كىنالاپ وتىر.
مال وسىرۋشىلەر ۇلتتىق قاۋىمداستىعىنىڭ توراعاسى الماسبەك سادىرباەۆتىڭ ايتۋىنشا، قازىردىڭ وزىندە مال باسىنىڭ 30 پروتسەنتىنەن ايىرىلىپ وتىرمىز. ال ۇكىمەت بولسا جاعدايدى تۇزەۋ ءۇشىن ەشبىر شارا قولدانباعان.
پرەزيدەنت جەم-ءشوپ ەكسپورتىن قىسقارتۋ جونىندە تاپسىرما بەردى. اۋىل شارۋاشىلىعى مينيسترلىگى سۇرلەم، پىشەن، قارا بيداي مەن سۇلى ەكسپورتىنا شەكتەۋ قويدى. الايدا ساراپشىنىڭ ايتۋىنشا، فەرمەلەر بۇل داقىلداردى پايدالانبايدى.
"ولار فۋراجدىق بيدايدىڭ 4-5 كلاسىن، كەبەك پەن ارپانى قولدانادى. ال ول ەكسپورتتالىپ جاتىر. ءبىزدىڭ ەلىمىز 30 جىلدا جەم-ءشوپ ساياساتى تۋرالى ويلانىپ تا كورمەگەن. مالدىڭ قىرىلۋى توقتامايدى، 3 ميلليوننان استام مالدان ايىرىلايىق دەپ وتىرمىز", - دەيدى سادىرباەۆ.
ۆەدومستۆوداعىلاردىڭ بۇل جونىندە پىكىرى باسقا. مال شارۋاشىلىعى ونىمدەرىن ءوندىرۋ جانە قايتا وڭدەۋ دەپارتامەنتى ديرەكتورىنىڭ ورىنباسارى قايرات مۇتاەۆتىڭ ايتۋىنشا، بۇل سالاداعى جاعداي كۇردەلى، الايدا دابىل قاعاتىنداي اۋىر ەمەس.
"ماڭعىستاۋ وبلىسىندا 1 159, قىزىلوردا وبلىسىنىڭ ارال اۋدانىندا 480 باس مال ءولدى. الايدا مال باسىنىڭ جالپى سانىن ەسكەرسەك، قىرىلعان مال 1 پروتسەنتتەن اسپايدى", - دەيدى مۇتاەۆ.
