بۇگىن، 1 شىلدەدە توتەنشە جاعدايلار مينيسترلىگى قاتتى جاۋىن-شاشىنعا بايلانىستى الماتى تاۋلارىنداعى كىشى الماتى وزەنى الابىندا سەل ءجۇرۋ قاۋپى بار ەكەنىن ەسكەرتتى، دەپ حابارلايدى «ادىرنا» ءتىلشىسى.
ماماندار قالا تۇرعىندارى مەن قوناقتارىنا اۋا رايى تۇراقتالعانعا دەيىن ىلە الاتاۋىنا بارۋدان ۋاقىتشا باس تارتۋدى سۇرادى.
«سەل قاۋپى بار ايماقتا كەلەسى قاۋىپسىزدىك ەرەجەلەرىن ساقتاڭىز:
• تاۋداعى جاعداي تۋرالى رەسمي اقپاراتتاردى ۇنەمى باقىلاڭىز;
• سەل قاۋپى تونگەن نەمەسە سەل باستالعان جاعدايدا دەرەۋ بيىك جەرگە كوتەرىلىڭىز;
• وزەن ارنالارىنىڭ، سەل ءجۇرۋى مۇمكىن سايلاردىڭ، كول بوگەتتەرىنىڭ ۇستىندە جانە تومەنگى جاعىندا شاتىر تىگىپ دەمالماڭىز;
• تاۋدىڭ جوعارعى بولىگىندە نوسەر جاۋىن جاۋىپ جاتسا، وزەن ارناسىنان جانە قاۋىپتى ايماقتان دەرەۋ كەتىڭىز. ءوزىڭىزدى جانە جاقىندارىڭىزدى قورعاڭىز!»– دەلىنگەن حابارلامادا.
تجم، «قازسەلدەنقورعاۋ» جانە الماتى قالاسى توتەنشە جاعدايلار دەپارتامەنتىنىڭ ازاماتتىق قورعاۋ قىزمەتتەرى كۇشەيتىلگەن رەجيمدە جۇمىس ىستەپ جاتقانى ايتىلدى. مينيسترلىك مالىمەتىنشە، جاعداي تۇراقتى باقىلاۋدا، سەل قاۋپى بار ۋچاسكەلەرگە مونيتورينگ جۇرگىزىلۋدە، قۇتقارۋ بولىمشەلەرى جەدەل ارەكەت ەتۋگە دايىن.
سونداي-اق حالىقتى جەدەل حاباردار ەتۋ ماقساتىندا ناۋرىزباي اۋدانىندا جەرگىلىكتى قۇلاقتاندىرۋ جۇيەسى ىسكە قوسىلعان.
«بۇل - تۇرعىندارعا اقپاراتتى ۋاقتىلى جەتكىزۋگە باعىتتالعان الدىن الۋ شاراسى. سابىر ساقتاپ، تەك رەسمي اقپارات كوزدەرىنە عانا سەنۋلەرىڭىزدى سۇرايمىز»،— دەپ ءتۇسىندىردى تجم.
