ماڭعىستاۋ، قىزىلوردا وبلىستارىندا اشتان قىرىلىپ جاتقان مال يەلەرىنە وتەماقى تولەنبەيدى، دەپ حابارلايدى “كتك” ارناسى.
تەك ازىعىن الىپ، قالعان مال باسىن ساقتاپ قالۋعا ۇكىمەتتەن كومەك بەرىلەدى. ازىرگە شىعىننىڭ ناقتى سوماسى ەسەپتەلمەگەن. اۋىل شارۋاشىلىعى مينيسترلىگى جاعدايدىڭ بۇلايشا ۋشىعىپ كەتۋىنە تاعى دا اكىمدەردى كىنالادى.
ءبىر عانا ماڭعىستاۋ وبلىسىندا قۇرعاقشىلىقتىڭ كەسىرىنەن 1300-دەن استام مال باسى ارام قاتقان. ونىڭ ىشىندە 540 باس جىلقى، 46 باس ءىرى قارا جانە 492 ۇساق مال.
اۋىل شارۋاشىلىعى مينيسترلىگى قالعان ءتورت تۇلىكتى امان الىپ قالۋىنا ۇكىمەتتەن 3 ميلليارد 500 ميلليون تەڭگە قوردان ءبولۋدى سۇراپ وتىر.
قازىر "كاسپي" كورپوراتسياسىنان مال ازىعىن ارزانداتۋعا 200 ميلليون تەڭگە بولىنگەن. ال ماۋسىمنىڭ 20-نا قاراي ماڭعىستاۋ وبلىسىنا 600 توننادان استام ارپا جەتكىزىلەدى. جالپى 1700 توننادان استام ارپا وسى وڭىرگە بولىنبەك. ال جاعدايدىڭ بۇلايشا شيەلەنىسۋىن مينيسترلىك جەرگىلىكتى بيلىكتەگىلەردىڭ شيكىلىگى دەپ وتىر.
“نەگىزى جەرگىلىكتى اكىمدىك جاعدايدىڭ ۋشىعىپ بارا جاتقانى جايىندا الدىن الا حابارلاۋى كەرەك ەدى. مالدىڭ قىرىلىپ جاتقانىن اۋىل شارۋاشىلىعى مينيسترلىگى ءوزى انىقتادى. بۇل قالىپتاسقان جاعداي كۇزدە ەت باعاسىنىڭ قىمباتتاۋىنا ەش اسەر ەتپەيدى. سەبەبى قىرىلعان مال باسىنىڭ سانى وڭىردەگى جالپى كولەمىنىڭ 0,1 پايىزىن عانا قۇرايدى. ەت قىمباتتامايدى دەگەن سەنىمدەمىز”، – دەيدى قر اشم مال شارۋاشىلىعى ءونىمىن ءوندىرۋ جانە قايتا وڭدەۋ دەپارتامەنتى ديرەكتورىنىڭ ورىنباسارى قايرات مۇتاەۆ.
