وڭتۇستىك كورەياعا جۇمىس ىستەۋگە كەتكەن شىمكەنتتىك جۇمباق جاعدايدا كوز جۇمدى

3360
Adyrna.kz Telegram
فوتو: قازاقپارات
فوتو: قازاقپارات

شىمكەنت قالاسىنىڭ تۇرعىنى باتىر وسپانوۆ وڭتۇستىك كورەيا ەلىنە جۇمىس ىستەۋگە كەتكەن. الايدا ونى تانىستارى تۇرىپ جاتقان ۇيىنەن ءولى كۇيىندە تاپقان، دەپ حابارلايدى “ادىرنا” ۇلتتىق پورتالى قازاقپاراتقا سىلتەمە جاساپ. 

مارقۇمنىڭ تانىستارى وعان اناسىنىڭ قازا بولعانىن ەستىرتپەك بولعان. الايدا حابارلاسا الماپتى. بولماعان سوڭ قارالى حاباردى جەتكىزۋگە ۇيىنە كەلگەندە ولار باتىردىڭ باقيلىق بولعانىن كورگەن. قازىر ونىڭ ءمايىتىن ەلگە جەتكىزۋ قيىندىق تۋعىزىپ وتىر.

«جۇرەگى قىسىلىپ، كۇيزەلىستە جۇرگەن. سول كەزدە ءوز-وزىمە سىيماي ءجۇرمىن، قولىم جۇمىسقا بارماي ءجۇر دەگەن ەدى. اناسى وسىنداي جاعدايعا دۋشار بولعانىنا سەنبەي جۇرگەن. بىراق ماعان ناقتى قاشان قايتاتىنىن ايتپاعان. بيىل ورالۋىم مۇمكىن دەگەن. سەبەبى، ويىندا ىسكە اسىرسام دەگەن جوسپارلارى بولاتىن»،- دەيدى مارقۇمنىڭ جۇبايى زاميرا اسپانوۆا.

شەتەلدە ءجانتاسىلىم ەتكەن ازامات قۇرىلىس سالاسىندا ەڭبەك ەتىپ جۇرگەن. ەندى ارتىندا ۇلى مەن قىزى قالدى. تۋىستارىنىڭ ايتۋىنشا، ول قايتىس بولاردان 10 كۇن بۇرىن مۇلدە حابارلاسپاي كەتكەن. الايدا، وعان دەيىن ءجيى قوڭىراۋ شالىپ تۇرىپتى.

تۋىستارى مۇمكىن اناسىنىڭ اۋىرعانىن سىرتتا ءجۇرىپ ەستۋ اۋىر تيگەن بولار دەپ بولجام جاسايدى. «كورەيا كومەك» قوعامدىق قورى اكىمشىسىنىڭ سوزىنشە، باتىر وسپانوۆ زاڭسىز ميگرانت بولىپ جۇمىس ىستەگەن. ال، ونىڭ ءمايىتى 2022 جىلى ءساۋىر ايىنىڭ 20-سى كۇنى ءوز ۇيىنەن تابىلعان. ونداعى پوليتسيا دەپارتامەنتى بەرگەن رەسمي اقپاراتقا سايكەس، ول ءساۋىردىڭ 16-سى كۇنى تۇندە كوز جۇمعان.

«قازىرگى تاڭدا قوسىمشا تەرگەپ-تەكسەرۋ جۇمىستارى ءجۇرىپ جاتىر. ءمايىتتى قازاقستانعا جىبەرۋ ءۇشىن «كورەيا كومەك» زاڭگەرلەرى جانە قازاقستاننىڭ وڭتۇستىك كورەياداعى ەلشىلىك وكىلدەرى ءتيىستى قۇجاتتاردى رەتتەپ، جۇمىس اتقارىپ جاتىر. پد مالىمەتىنە سايكەس، بۇل ازامات جۇرەك تالماسىنان قايتىس بولعان»،- دەيدى «كورەيا كومەك» قايىرىمدىلىق قورىنىڭ اكىمشىسى سامات احمەتوۆ.

تەرگەۋ جۇمىستارى اياقتالعان سوڭ 26 ساۋىردە مارقۇمنىڭ دەنەسى تۋعان جەرىنە جەتكىزىلمەك. الايدا ءمايىتتى وڭتۇستىك كورەيادان ەلگە الىپ كەلەتىن كومپانيا بۇل قىزمەتى ءۇشىن 10 ملن ۆون سۇراپ وتىر. بۇل - 3,5 ملن تەڭگە. قازىر مارقۇمنىڭ تۋىستارى مەن تانىس دوستارى وسى قاراجاتتى جيناپ جاتىر.

ادىرنا” ۇلتتىق پورتالى

پىكىرلەر