«تۇركىتىلدەس جۋرناليستەر قورى» قوعامدىق قورىنىڭ ۇيىمداستىرۋىمەن الماتى، شىمكەنت، قوستاناي قالالارىندا «Fake news. Fact-checking. Information manipulation» تاقىرىبىندا سەمينار-ترەنينگ وتكىزىلدى، دەپ حابارلايدى “ادىرنا” ۇلتتىق پورتالى.
اتالعان جوباعا قازاقستانداعى امەريكا قۇراما شتاتتارى ديپلوماتيالىق ميسسياسى قولداۋ ءبىلدىردى. 2022 جىلدىڭ 8-9 ءساۋىرى مەن 11-12 ساۋىرىندە الماتى، شىمكەنتتە ۇيىمداستىرىلعان سەمينار-ترەنينگكە بريتانيادان «Avrupa» مەديا حولدينگىنىڭ قوجايىنى، جۋرناليست ۆاتان ءوز بەن ۆۆس تەلەارناسىنىڭ نيدەرلاندتاعى مەنشىكتى ءتىلشىسى يۋسۋف وزكان شاقىرىلدى.
شاراعا الماتى قالاسىمەن بىرگە قازاقستاننىڭ بارلىق وبلىس، اۋدان، ايماقتارىنداعى تەلەارنا، گازەت، سايت، راديوارنالاردا جۇمىس ىستەيتىن 80 جۋرناليست قاتىستى.
جوبانىڭ باستى ماقساتى – جۋرناليستەردىڭ اقپارات الۋ جانە تاراتۋداعى كاسىبي بىلىگىن ارتتىرۋ، فاكتچەك جاساۋ تاسىلدەرىن مەڭگەرتۋ، دەرەكتەردى تەكسەرۋ، جالعان اقپاراتپەن كۇرەسۋگە ۇندەۋ.
«بۇل جوبا نەگىزىنەن 2021 جىلدىڭ 25-ءشى قاراشاسىندا باستالدى، ZOOM پلاتفورماسى ارقىلى ءتورت ايعا سوزىلعان ونلاين كۋرس 2022 جىلدىڭ اقپانىندا اياقتالدى. سەميناردىڭ باستى ماقساتى – جالعان اقپاراتتارمەن كۇرەس، باق پەن الەۋمەتتىك جەلىلەردەگى اقپاراتتىق مانيپۋلياتسيانى انىقتاۋ، دەرەكتەردى تەكسەرۋ، فاكتچەك جاساۋ. وعان قوسا اقپاراتتىق مونيپۋلياتسيادان اۋلاق بولۋ جايلى ۇيرەنەدى»،-دەدى «تۇركىتىلدەس جۋرناليستەر قورى» قوعامدىق قورىنىڭ پرەزيدەنتى نازيا جويامەرگەنقىزى.
الماتىداعى سەمينار-ترەنينگتىڭ اشىلۋ سالتاناتىنا قازاقستانداعى امەريكا قۇراما شتاتتارىنىڭ باس كونسۋلى كەرولاين سەۆيدج قاتىسىپ، جۋرناليستەرمەن كەزدەسۋ كەزىندە جالعان اقپاراتپەن كۇرەستىڭ ماڭىزىنا توقتالدى.
«جۋرناليست كەز كەلگەن اقپاراتتى جاريالاعاندا ادامداردى اداستىرماۋ ءۇشىن جاۋاپكەرشىلىكتى سەزىنگەنى ءجون. ودان بولەك الەمدەگى تىڭ اقپاراتتى تاراتا ءبىل جۋرناليستەردىڭ ارتىقشىلىعى دەپ بىلەمىن. پاندەميا باستالعالى كوروناۆيرۋس پەن ۆاكتسيناعا قاتىستى دەزينفورماتسيا مەن كونسپەريالوگيالىق اقپاراتتاردىڭ قالاي تەز تاراعانىن بارلىعىمىز كوردىك. وكىنىشكە قاراي ول ۆيرۋسقا قاراعاندا تەز تارادى. وعان قوسا رەسەيدىڭ ۋكرايناعا باسىپ كىرۋى مەن كليماتتىڭ وزگەرۋى جانە وزگە دە ماسەلەلەردى مىسالعا كەلتىرۋگە بولادى. سول سەبەپتەن سىزدەردىڭ جۇمىستارىڭىزدا مۇقياتتىلىق پەن بىلىكتىلىكتىڭ جوعارى بولعانى ماڭىزدى»،-دەدى باس كونسۋل.
الماتىداعى سالتاناتتى كەشتە «Avrupa» مەدياحولدينگىنىڭ جەتەكشىسى ۆاتان ءوز تۇركىتىلدەس جۋرناليستەر قورىنىڭ پرەزيدەنتى نازيا جويامەرگەنقىزىن ەۋروپاداعى تۇركى جۋرناليستەر اسسوتسياتسياسىنىڭ اتىنان «PRESS AWARDS-2022» سىيلىعىمەن ماراپاتتادى.
”ادىرنا” ۇلتتىق پورتالى
