بۇگىن، 10 تامىز — اباي كۇنىنە وراي شىمكەنت قالاسىندا اۋقىمدى مۋزىكالىق شەرۋ ءوتتى. شارتاراپتى اۋەنگە بولەگەن بۇل مادەني باستاما اياسىندا 100-گە جۋىق ونەرپاز قالانىڭ باستى ورىندارىندا ۇلى اقىننىڭ ماڭگىلىك مۇراسىن پاش ەتتى.
جەرگىلىكتى ونەر ۇجىمدارى قالا تۇرعىندارى مەن قوناقتارىنا مەرەكەلىك كوڭىل-كۇي سىيلاپ، حاكىم ابايدىڭ «كوزىمنىڭ قاراسى»، «جەلسىز تۇندە جارىق اي»، «ايتتىم سالەم قالامقاس» سىندى اندەرىن اۋەلەتە شىرقاپ كوپشىلىكتى ءتانتى ەتتى. ونەرپازدار اۋەجاي، «دالا مول»، تەمىرجول ۆوكزالى، «جاپون» ساياباعى، «پلازا»، «سيتي مول» ساۋدا ورتالىقتارىن ارالاپ، اۋەزدى اندەرىن قالىقتاتتى.
جاندى داۋىستاعى ورىنداۋلار قالانىڭ ءاربىر بۇرىشىن ۇلتتىق ونەردىڭ رۋحىنا بولەدى. جاس پەن كارىنى باۋراپ العان مۋزىكالىق شەرۋ ۇرپاقتى ۇلتتىق قۇندىلىقتارعا باۋلۋدىڭ جانە ۇلى ابايدىڭ اسىل ءسوزىن دارىپتەۋدىڭ جارقىن ۇلگىسىنە اينالدى.
