Shymkent qalasynyń turǵyny Batyr Ospanov Ońtústik Koreıa eline jumys isteýge ketken. Alaıda ony tanystary turyp jatqan úıinen óli kúıinde tapqan, dep habarlaıdy “Adyrna” ulttyq portaly QazAqparatqa silteme jasap.
Marqumnyń tanystary oǵan anasynyń qaza bolǵanyn estirtpek bolǵan. Alaıda habarlasa almapty. Bolmaǵan soń qaraly habardy jetkizýge úıine kelgende olar Batyrdyń baqılyq bolǵanyn kórgen. Qazir onyń máıitin elge jetkizý qıyndyq týǵyzyp otyr.
«Júregi qysylyp, kúızeliste júrgen. Sol kezde óz-ózime syımaı júrmin, qolym jumysqa barmaı júr degen edi. Anasy osyndaı jaǵdaıǵa dýshar bolǵanyna senbeı júrgen. Biraq maǵan naqty qashan qaıtatynyn aıtpaǵan. Bıyl oralýym múmkin degen. Sebebi, oıynda iske asyrsam degen josparlary bolatyn»,- deıdi marqumnyń jubaıy Zamıra Aspanova.
Shetelde jantásilim etken azamat qurylys salasynda eńbek etip júrgen. Endi artynda uly men qyzy qaldy. Týystarynyń aıtýynsha, ol qaıtys bolardan 10 kún buryn múlde habarlaspaı ketken. Alaıda, oǵan deıin jıi qońyraý shalyp turypty.
Týystary múmkin anasynyń aýyrǵanyn syrtta júrip estý aýyr tıgen bolar dep boljam jasaıdy. «Koreıa kómek» qoǵamdyq qory ákimshisiniń sózinshe, Batyr Ospanov zańsyz mıgrant bolyp jumys istegen. Al, onyń máıiti 2022 jyly sáýir aıynyń 20-sy kúni óz úıinen tabylǵan. Ondaǵy polıııa departamenti bergen resmı aqparatqa sáıkes, ol sáýirdiń 16-sy kúni túnde kóz jumǵan.
«Qazirgi tańda qosymsha tergep-tekserý jumystary júrip jatyr. Máıitti Qazaqstanǵa jiberý úshin «Koreıa kómek» zańgerleri jáne Qazaqstannyń Ońtústik Koreıadaǵy elshilik ókilderi tıisti qujattardy rettep, jumys atqaryp jatyr. PD málimetine sáıkes, bul azamat júrek talmasynan qaıtys bolǵan»,- deıdi «Koreıa kómek» qaıyrymdylyq qorynyń ákimshisi Samat Ahmetov.
Tergeý jumystary aıaqtalǵan soń 26 sáýirde marqumnyń denesi týǵan jerine jetkizilmek. Alaıda máıitti Ońtústik Koreıadan elge alyp keletin kompanııa bul qyzmeti úshin 10 mln von surap otyr. Bul - 3,5 mln teńge. Qazir marqumnyń týystary men tanys dostary osy qarajatty jınap jatyr.
”Adyrna” ulttyq portaly
