شىمكەنتتە مەملەكەت باسشىسى قاسىم-جومارت توقاەۆتىڭ «ادىلەتتى قوعامعا شىنشىل ءسوز» اتتى تاڭداۋلى سوزدەرىنىڭ جيناعى كەڭىنەن تالقىلاندى.
«قىزعالداق» كونگرەسس-حولىندا وتكەن القالى جيىنعا زيالى قاۋىم وكىلدەرى، عالىمدار، ساراپشىلار، قوعام جانە مەملەكەت قايراتكەرلەرى، سونداي-اق بيزنەس پەن شىعارماشىلىق سالا وكىلدەرى قاتىستى. پرەزيدەنتتىڭ ەل دامۋىنا قاتىستى بايىپتى پايىمدارى مەن تاڭدامالى وي-تولعامدارى جيناقتالعان جاڭا باسىلىم جينالعاندار تاراپىنان جوعارى باعاعا يە بولدى.
القالى جيىنعا شىمكەنت قالاسى اكىمىنىڭ ورىنباسارى سارسەن قۇرانبەك مودەراتورلىق ەتتى. ول ءوز سوزىندە پرەزيدەنتتىڭ ءار جىلدارداعى سوزدەرىن تۇتاس ديناميكادا كورۋدىڭ ماڭىزىنا توقتالدى.
مەملەكەت باسشىسىنىڭ ءار كەزەڭدەگى وي-تولعامدارى ءبىر ارناعا توعىسقاندا، ەلدىڭ دامۋ بەلەستەرى مەن بەتبۇرىستى شاقتارى ايقىن كورىنىس تاباتىنىن اتاپ ءوتتى.
جيىندا ج.تاشەنوۆ اتىنداعى ۋنيۆەرسيتەتتىڭ باسقارما توراعاسى، قر ۇعا اكادەميگى وڭالباي اياشەۆ ءبىلىم مەن عىلىمنىڭ ماڭىزىنا توقتالدى. بۇگىندە ءبىلىم ەل دامۋىنىڭ باستى باسىمدىعىنا اينالعانىن ايتقان ول جاستاردىڭ ماماندىق تاڭداۋداعى جانە ەل بولاشاعى الدىنداعى جاۋاپكەرشىلىگىن ءسوز ەتتى. ال شىمكەنت قالالىق تىلدەردى وقىتۋ ادىستەمەلىك ورتالىعىنىڭ ديرەكتورى امانگەلدى يمانقۇلوۆ ۇلتتىق قۇندىلىقتار مەن انا ءتىلىنىڭ تاعدىرىنا توقتالدى. ونىڭ ايتۋىنشا، انا ءتىلى — ۇلتتىڭ جادى مەن ۇرپاقتار ساباقتاستىعىنىڭ التىن كوپىرى.
قازاقستان جازۋشىلار وداعىنىڭ مۇشەسى، اقىن ءارى اۋدارماشى اباي قالشابەك ءسوز قادىرى مەن جاۋاپكەرشىلىگى تۋرالى وي تولعادى. قالامى قارىمدى قالامگەر ءۇشىن ءاربىر ءسوز — ادالدىق پەن شىنايىلىقتىڭ ولشەمى ەكەنىن جەتكىزدى.
باسقوسۋدا «ادىلەتتى قوعام تەك زاڭدارمەن ەمەس، ازاماتتاردىڭ ءبىر-بىرىنە دەگەن سەنىمىمەن، جاۋاپكەرشىلىگىمەن قالىپتاسادى» دەگەن پىكىر ءجيى ايتىلدى. تاۋەلسىزدىك جىلدارىنداعى ەل سالعان سارا جولعا ۇڭىلسەك، قوعام مەن ەكونوميكا قانشا وزگەرگەنىمەن، ادىلەتتىلىك، زاڭدىلىق پەن ءبىلىم ساپاسى ءاردايىم باستى ورىندا قالا بەرمەك.
باسىلىمدا ادىلەتتىلىك، زاڭ ۇستەمدىگى، ۇلتتىق بىرەگەيلىك، ءبىلىم، تسيفرلاندىرۋ جانە ەكولوگيالىق مادەنيەت سياقتى 21 نەگىزگى باعىت قامتىلعان. قاتىسۋشىلاردىڭ ايتۋىنشا، جيناق زاماناۋي مەملەكەتتىك ساياساتتىڭ نەگىزگى باعدارلارىن ايقىنداپ بەرەدى. كىتاپتىڭ جاستار، مەملەكەتتىك قىزمەتشىلەر مەن ۇلتتىق قۇرىلتاي دەپۋتاتتارى ءۇشىن دە ماڭىزى زور.
جيىن بارىسىندا قازاقستاننىڭ ەڭبەك سىڭىرگەن زاڭگەرى، پروفەسسور بەكەت تۇرعاراەۆ تا جۇرەكجاردى لەبىزىن ءبىلدىردى:
— بۇل — مەملەكەت باسشىسىنىڭ كوپجىلدىق ەڭبەگى مەن ەل دامۋىنا قاتىستى قۇندى ويلارى جيناقتالعان وتە ماڭىزدى ەڭبەك. كىتاپتى زور ىقىلاسپەن وقىپ شىقتىم. ارىپتەستەرىمە، دوستارىما جانە بالالارىما "ادىلەتتى قوعامعا شىنشىل ءسوز" كىتابىن وقۋدى جۇكتەدىم، ءتىپتى ءار شاڭىراقتىڭ ۇستەل ءۇستى كىتابىنا اينالدىرۋدى ۇسىندىم، — دەدى ول.
ايتا كەتۋ كەرەك، پرەزيدەنت كىتابى بۇعان دەيىن الماتى، اتىراۋ، پاۆلودار، قاراعاندى جانە سولتۇستىك قازاقستان وبلىستارىندا تالقىلانعان بولاتىن. شارانىڭ «قىزعالداق» كونگرەسس-حولىندا ءوتۋىنىڭ دە وزىندىك ماڭىزى بار. 2025 جىلدىڭ ءساۋىر ايىندا شىمكەنتكە جاساعان ساپارى كەزىندە قاسىم-جومارت توقاەۆ بۇل عيماراتقا «قىزعالداق» اتاۋىن بەرۋ ۇسىنىسىن قولداعان ەدى. بۇگىندە شاھاردىڭ باستى مادەني ورتالىعىنا اينالعان بۇل سارايدا ۇلت بولاشاعى مەن ادىلەتتىلىك جايىندا سالماقتى ويلار ايتىلدى.
جيىن سوڭىندا قاتىسۋشىلار ءوزارا پىكىر الماسىپ، ۇسىنىستارىن ورتاعا سالدى.
