ەر ادام قارىزىن تولەمەگەنى ءۇشىن تۇركىستان وبلىسىنىڭ تۇرعىنىنان تەلەديدار مەن جيھازىن الىپ كەتكەن، دەپ حابارلايدى “ادىرنا” ۇلتتىق پورتالى.
جەرگىلىكتى تۇرعىن ورداباسى پوليتسيا قىزمەتكەرلەرىنە ونىڭ تانىسى كەلىپ، قارىزىن تولەۋدى تالاپ ەتىپ، رۇقساتسىز تەلەديدار مەن اس ۇيدەگى جيھازىن الىپ كەتكەن.
كەلتىرىلگەن زالالدىڭ جالپى سوماسى شامامەن 200 مىڭ تەڭگەنى قۇرادى.
پوليتسيا دەرەۋ وقيعا ورنىنا جەتتى. ۋچاسكەلىك ينسپەكتورلار بىرقاتار قاجەتتى جەدەل-ىزدەستىرۋ شارالارىن جۇرگىزدى. قابىلدانعان شارالار ناتيجەسىندە بوتەننىڭ مۇلكىن زاڭسىز يەمدەنگەن كۇدىكتى انىقتالدى، دەپ حابارلادى پوليتسيا.
بەلگىلى بولعانداي، اۋىل تۇرعىنى كۇدىكتىنىڭ دۇكەنىنەن ازىق-تۇلىك قارىزعا العان، بىراق اقشاسىن تولەمەگەن. وسىلايشا زاڭسىز جولمەن كۇدىكتى قارىزدى ءوندىرىپ الۋعا شەشىم قابىلداعان.
پوليتسيا بۇل فاكتىنى قر قىلمىستىق كودەكسىنىڭ 389-بابى «وزىنشە بيلىك ەتۋ» بويىنشا تىركەدى. تەرگەۋ ءجۇرىپ جاتىر، - دەپ قورىتىندىلادى تۇركىستان وبلىسىنىڭ دەپارتامەنتى.
”ادىرنا” ۇلتتىق پورتالى
