Dáýlet Tóleýtaıuly Dınara Satjanǵa bergen suhbatynda qazaqtyń toı dese ishken asyn jerge qoıyp, qatty shashylatyny týraly aıtty, dep habarlaıdy “Adyrna” ulttyq portaly.
Juma saıyn qaıyrymdylyq jasap, baspana syıǵa tartyp, odan qalsa, baspanaǵa alýǵa baǵyt berip júrgen Dáýlet óziniń 4 páteri bar ekenin ashyp aıtty.
“Birinshi kezekte ózinen aıamaý kerek. Biraq ózińnen aıamaý kerek eken dep, qaryzǵa, Kaspi bólip tóleýge kıim alý durys emes. Óziń ómirge bir-aq ret kelgennen keıin, jaqsyny kórýge umtylý kerek. Biraq onyń da shegi bolady.
Pandemııa kezinde talaı adamdy kórdim. Ótkende bir tanysym, tanymal adam úıi joq áli kúnge deıin, biraq ol “Dior-dyń 800-900 myń teńge turatyn sómkesi bar” dep maqtanady. Dior-yń qurysyn dedim, úıiń joq, nesine maqtanasyń? Bárin jasap al, ári qaraı brend qýasyń ba, óziń bilesiń”, – deıdi Dáýlet.
Qazaqtyń Dáýleti atty laqap atpen tanylǵan ol bar jıǵan-tergenin toıǵa shashatyn halyqty túsinbeıtinin aıtty.
“Toı da solaı. 5 saǵattyq toıǵa 5 jyl tóleıtin kredıt alady. Odan keıin eki jas ajyrasty, deıdi.
Jaǵdaıyń bar ma, Nur-Sultanda 30 myń adamdyq stadıon bos tur, sonda toı jasa. Jaǵdaıyń joq pa, kórpeńe qaraı kósil. Uıat bolady degenniń bári bos sóz.
Erteńgi kúni nesıe tóleı almaı otyrǵanda uıattyń kókesi sonda bolady. Toı ótti, eldiń bári jedi, paketke saldy, ysyrap jasady, ketti. Al erteńgi kúni eki jas qınalǵan kezde, sol toıǵa kelgen adamnyń bireýi “qınalyp qalypsyńdar, kredıtterińdi tólep bereıin” dep kele me?
Toı bolý kerek, biraq árkimniń shamasyna qaraı. Toı – Táńirdiń qazynasy. Toıdyń arqasynda biz qazaqtyǵymyzdy joǵaltpaı otyrmyz. Biraq mıkrokredıttik uıymdardan 2 mln kredıt alyp, sony 5 mln etip qaıtaryp otyrǵan adamdar bar. Odan da eki jaqtan ketken aqshany qosyp, bastapqy jarna retinde jastarǵa berip, úı alýǵa bolady”, – dedi Tóleýtaıuly.
Baspanaly bolǵysy kep júrgen adamdarǵa eń alǵash jasaý kerek qadammen de bólisti.
“Eń birinshi keńes, tiri adam tirshiligin jasaý kerek. Otyrsaq otyra beremiz. Anaý qymbat, mynaý qymbat, zaman sondaı dep negatıvtiń bárin boıymyzǵa jınap alatyn bolsaq, energııamyzdy joǵaltyp, álsiz adamǵa aınalamyz. Al eger de “joq jasaımyn, qolymnan keledi, aınalamdy ózgertemin, soǵan qaraı talpynamyn” deıtin bolsa, ol adam kúsh-qýat jınaıdy. Al adamnyń boıyndaǵy energııa túbinde aqshaǵa alyp keledi”, – deıdi bloger.
”Adyrna” ulttyq portaly
