شىمكەنت قالاسى اكىمىنىڭ ورىنباسارى ماقسۇت يساحوۆ شاھارداعى جول قۇرىلىس جۇمىستارىنىڭ بارىسى تۋرالى باق وكىلدەرىنە ءباسپاسوز-بريفينگىن وتكىزدى.
تۇرعىندار اراسىندا قوناەۆ-رىسقۇلوۆ جولايرىعى مەن ا-2 تاس جولى قۇرىلىسى جانە اۋەجاي ماڭىنداعى جاياۋ جۇرگىنشىلەر جولى، ۆەلوجولاق ساپاسىنا قاتىستى ۆيدەولار مەن پىكىرلەر تاراعان بولاتىن. ماقسۇت پەرنەبايۇلى بۇل جاعدايلارعا جان-جاقتى جاۋاپ بەردى.
– قوناەۆ داڭعىلى بويىنشا جەراستى جاياۋ جۇرگىنشىلەر وتكەلىن اباتتاندىرۋ جۇمىستارى، سونىمەن قاتار، جاڭبىر جانە قار سۋلارىن باعىتتايتىن سۋاعار جۇيەلەرىن ورناتۋ تولىعىمەن اياقتالعان جوق. قازىرگى ۋاقىتتا جەر استى وتكەلىندە جينالعان سۋ سورىلىپ، قالىپقا كەلتىرىلدى. ال اسفالت توسەۋ جۇمىستارى مەردىگەر مەكەمە قاراجاتى ەسەبىنەن اتقارىلادى. ناقتى ايتقاندا، قۇرىلىسقا جاۋاپتى مەردىگەر «بازيس-ك» جشس-نەن قوناەۆ-رىسقۇلوۆ كوشەلەرى قيىلىسىنداعى جولايرىق ءالى قابىلدانعان جوق. ماۋسىم ايىنىڭ سوڭىنا دەيىن كورسەتىلگەن كەمشىلىكتەر جويىلىپ، قۇرىلىس جۇمىستارى اياقتالاتىن بولادى. ال اۋەجاي ماڭىنداعى 0,6 شاقىرىم جولدىڭ كارىز جۇيەسىن مەردىگەر «ەنساف» جشس جۇرگىزگەن. ەندى اتالعان جولداعى كەمشىلىكتەر جاۋاپتى مەردىگەر تاراپىنان رەتكە كەلتىرىلەدى، – دەدى قالا اكىمىنىڭ ورىنباسارى.
قالالىق جولاۋشىلار كولىگى جانە اۆتوموبيل جولدارى باسقارماسى تاراپىنان بيىل جالپى 141 نىسان قۇرىلىس، جوندەۋ جۇمىستارىمەن قامتىلادى: قۇرىلىس جانە قايتا جاڭارتۋ – 19 نىسان (51,5 شاقىرىم), ورتاشا جوندەۋ – 121 نىسان (223,8 شاقىرىم، 291 كوشە), كۇردەلى جوندەۋ – 1 نىسان (19,3 شاقىرىم).
سونىمەن قاتار، 150 ورىنعا ايالداما ورناتۋ جانە اۋدان اكىمشىلىگى تاراپىنان بەكىتىلگەن كوشەلەرگە شاعال تاس توسەۋ جوسپارلانۋدا.
وتكەن جىلدىڭ ناتيجەسى بويىنشا قالاداعى اسفالت جولداردىڭ ۇلەسى 63,6 %-عا جەتكەن ەدى. اسفالت جول ۇلەسىن 2022 جىلى 67,4 %، 2023 جىلى 71,2 %، 2024 جىلى 75 %، 2025 جىلى 79 %-عا ۇلعايتۋ جوسپاردا.
