Shymkent qalasy ákiminiń orynbasary Maqsut Isahov shahardaǵy jol qurylys jumystarynyń barysy týraly BAQ ókilderine baspasóz-brıfıngin ótkizdi.
Turǵyndar arasynda Qonaev-Rysqulov jolaıryǵy men A-2 tas joly qurylysy jáne áýejaı mańyndaǵy jaıaý júrginshiler joly, velojolaq sapasyna qatysty vıdeolar men pikirler taraǵan bolatyn. Maqsut Pernebaıuly bul jaǵdaılarǵa jan-jaqty jaýap berdi.
– Qonaev dańǵyly boıynsha jerasty jaıaý júrginshiler ótkelin abattandyrý jumystary, sonymen qatar, jańbyr jáne qar sýlaryn baǵyttaıtyn sýaǵar júıelerin ornatý tolyǵymen aıaqtalǵan joq. Qazirgi ýaqytta jer asty ótkelinde jınalǵan sý sorylyp, qalypqa keltirildi. Al asfalt tóseý jumystary merdiger mekeme qarajaty esebinen atqarylady. Naqty aıtqanda, qurylysqa jaýapty merdiger «Bazıs-K» JShS-nen Qonaev-Rysqulov kósheleri qıylysyndaǵy jolaıryq áli qabyldanǵan joq. Maýsym aıynyń sońyna deıin kórsetilgen kemshilikter joıylyp, qurylys jumystary aıaqtalatyn bolady. Al áýejaı mańyndaǵy 0,6 shaqyrym joldyń káriz júıesin merdiger «EnSaf» JShS júrgizgen. Endi atalǵan joldaǵy kemshilikter jaýapty merdiger tarapynan retke keltiriledi, – dedi qala ákiminiń orynbasary.
Qalalyq jolaýshylar kóligi jáne avtomobıl joldary basqarmasy tarapynan bıyl jalpy 141 nysan qurylys, jóndeý jumystarymen qamtylady: qurylys jáne qaıta jańartý – 19 nysan (51,5 shaqyrym), ortasha jóndeý – 121 nysan (223,8 shaqyrym, 291 kóshe), kúrdeli jóndeý – 1 nysan (19,3 shaqyrym).
Sonymen qatar, 150 orynǵa aıaldama ornatý jáne aýdan ákimshiligi tarapynan bekitilgen kóshelerge shaǵal tas tóseý josparlanýda.
Ótken jyldyń nátıjesi boıynsha qaladaǵy asfalt joldardyń úlesi 63,6 %-ǵa jetken edi. Asfalt jol úlesin 2022 jyly 67,4 %, 2023 jyly 71,2 %, 2024 jyly 75 %, 2025 jyly 79 %-ǵa ulǵaıtý josparda.
