بۇگىن قوعام بەلسەندىسى وعىز دوعان Qazkom بانكىنىڭ استانا قالاسىنداعى سارىارقا فيليالىنا بارىپ، مەملەكەتتىك تىلدە ەسەپشوت اشتىرا الماي، ءبىراز قيىندىققا تاپ بولدى. بۇل تۋرالى وعىز دوعان ءوزىنىڭ فەيسبۋكتەگى پاراقشاسىندا ۆيدەو جاريالاعان.
ۆيدەوعا كوز سالساق، بانك مەنەدجەرىنىڭ قازاق تىلىندە سويلەۋدەن باس تارتقانىن كورۋگە بولادى. سويلەمەگەنىمەن قويماي، كليەنتتىڭ تالابىنا ءمان بەرمەستەن كۇزەتشىنىڭ جانىنا باردى (قۋىپ شىعىڭىزدار دەپ وتىنگىسى كەلدى مە ەكەن، نە ايتقانى ەستىلمەدى - اۆت.).
سوسىن ءوزىن وسى فيليالدىڭ باسشىسى دەپ تانىستىرعان ءاليا ەسىمدى ايەل كەلدى. كليەنت وعان قىزمەتكەردىڭ قازاقشا سويلەۋدەن باس تارتقانىن ايتىپ شاعىمدانىپ ەدى، ول قۇلاق اسپادى.
كەرىسىنشە وعىز دوعانعا ورىسشا "ۋبەريتە كامەرۋ" دەپ زەكىدى. ونىڭ بۇل ءسوزىن تۇسىنبەگەن وعىز دوعان قازاقشا سويلەڭىز دەپ ءوتىندى، بىراق ءاليا ەسىمدى ايەل ونى جاقتىرماعان سىڭاي تانىتىپ، ءوز قىزمەت ورنىنا كەتىپ قالدى. ول تەك كامەرانى وشىرگەن جاعدايدا عانا كليەنتپەن سويلەسەتىنىن ايتتى.
قازاقشا بىلەتىن ءبىر قىزمەتكەر كليەنتكە قىزمەت كورسەتكىسى كەلگەنىمەن، ول كامەرانى ءوشىرۋدى تالاپ ەتتى.
"نە ءۇشىن ۆيدەوعا تۇسىرۋگە بولمايدى؟" دەگەن سۇراققا بانك قىزمەتكەرلەرى ءبىر اۋىزدان "بولمايدى" دەپ قانا جاۋاپ بەرىپ جاتتى. الايدا قاي زاڭنىڭ شەڭبەرىندە تۇسىرۋگە بولمايتىنىن ءتۇسىندىرىپ بەرە المادى.
اقىر سوڭىندا قازاقشا سويلەگىسى كەلمەگەن بانكتىڭ كۇزەتشىلەرى كليەنتتى، ياعني وعىز دوعاندى يتەرىپ-يتەرىپ، بانكتەن قۋىپ شىقتى. كۇزەتشى دە نە ءۇشىن تۇسىرۋگە بولمايتىنىن ايتا المادى.
7 مينۋت بويى كليەنتكە كامەرا الدىندا قازاقشا قىزمەت كورسەتۋگە ىنتا تانىتقان جان بولمادى. بارلىعى دا اۋەلى كامەرانى ءوشىرۋدى تالاپ ەتتى.
http://www.matritca.kz
