شىمكەنتتىڭ پوليتەحنيكالىق كوللەدجىنىڭ ستۋدەنتتەرىمەن كەزدەستىم، جاقسى اڭگىمە بولدى.
جالپى، شىمقالادا 32 كوللەدج بار، وندا 31 770 ستۋدەنت وقيدى. ونىڭ ىشىندە 12 240 ستۋدەنتكە اكىمدىك ءبىلىم گرانتىن بەرىپ وتىر. كوللەدجدەردى جىل سايىن 8 مىڭعا جۋىق ستۋدەنت بىتىرەدى.
كوپشىلىكتى الاڭداتاتىن باستى سۇراق: تۇلەكتەر قايدا جۇمىسقا تۇرادى؟ جۇمىس ورنىن اشۋ - بۇل ەكونوميكانىڭ ءىسى. ەكونوميكا نارىقتا. دەگەنمەن ەكونوميكالىق ساياساتقا جاۋاپتى مەملەكەتتىك ورگاندار بار. ال ءبىلىم ساپاسىنا بعم مەن اكىمدىكتەر جاۋاپتى.
ال ستۋدەنتتەردىڭ جەكە جاۋاپكەرشىلىگى قانداي؟ اڭگىمە وسى باعىتتا ءوربىدى.
بىرىنشىدەن، جاس ماماندار ەڭ الدىمەن تاڭداعان ماماندىقتاردى جاقسىلاپ يگەرۋ كەرەك. ول ءۇشىن "جاس مامان" جوباسى اياسىندا سوڭعى ەكى جىلدا 7 كوللەدجگە زاماناۋي جابدىقتار ورناتىلدى. دۋالدىق وقۋ تاجىريبەسى (جۇمىس ىستەپ ءجۇرىپ وقۋ) كەڭىنەن ەنگىزىلىپ جاتىر. سەبەبى جۇمىسقا تۇرعاندا تۇلەكتەردىڭ 75 پايىزىنا دەيىن كوپ نارسەنى جاڭادان ۇيرەنۋگە تۋرا كەلەدى ەكەن.
ەكىنشىدەن، جۇمىسقا تۇرۋدى ەمەس، العان ماماندىعىن كاسىپكە اينالدىرۋعا تىرىسۋ كەرەك. باتىستا تۇلەكتەردىڭ 90 پايىزعا جۋىعى “مەن قانداي كاسىپ اشسام ەكەن” دەگەن ويمەن وقۋ ورنىن بىتىرەدى. ال بىزدە 90 پايىز تۇلەك قايدا جۇمىسقا تۇرسام ەكەن دەپ ويلايدى. جۇمىسقا تۇرعان جاقسى. بىراق كاسىپ اشقان ودان دا جاقسى. تابىس ارتادى، جاڭا جۇمىس ورىندارىن اشادى.
ۇشىنشىدەن، ستۋدەنتتەر ونەرتابىسقا ۇمتىلعانى ءجون. كوللەدجدى ارالاپ جۇرگەنىمدە ستۋدەنتتەر “جاس مامان” بويىنشا الىنعان قىتاي، نەمىس، يسپان قۇرالدارىن قالاي پايدالانا الاتىنىن كورسەتتى. ونى ەگەر قولدانىپ قانا قويماي، ودان دا شاعىن ءارى ارزان انالوگتارىن جاساي الساڭدار، اتالعان ۇلتتاردان ءبىز ەمەس، ولار بىزدەن ساتىپ الاتىن بولادى. جاس ماماندار جۇمىس ورنىن اشاتىن كاسىپكەر عانا بولمايدى، جاڭا يندۋستريانى ورنىقتىراتىن ونەرتاپقىش بولادى.
مامانداردىڭ ءوسۋ تراەكتورياسى مىنە وسىنداي: جاقسى مامان - مىقتى كاسىپكەر - جاسامپاز ونەرتاپقىش.
ستۋدەنتتەردىڭ جەكە جاۋاپكەرشىلىگى وزگەرىستەن باستالادى. ءوزىن وزگەرتە العان ادام الەمدى دە وزگەرتەدى. ال الەم اركىمنەن باستاۋ الادى.
شىڭعىس مۇقان
