Shymkenttiń Polıtehnıkalyq kolledjiniń stýdentterimen kezdestim, jaqsy áńgime boldy.
Jalpy, Shymqalada 32 kolledj bar, onda 31 770 stýdent oqıdy. Onyń ishinde 12 240 stýdentke ákimdik bilim grantyn berip otyr. Kolledjderdi jyl saıyn 8 myńǵa jýyq stýdent bitiredi.
Kópshilikti alańdatatyn basty suraq: Túlekter qaıda jumysqa turady? Jumys ornyn ashý - bul ekonomıkanyń isi. Ekonomıka naryqta. Degenmen ekonomıkalyq saıasatqa jaýapty memlekettik organdar bar. Al bilim sapasyna BǴM men ákimdikter jaýapty.
Al stýdentterdiń jeke jaýapkershiligi qandaı? Áńgime osy baǵytta órbidi.
Birinshiden, jas mamandar eń aldymen tańdaǵan mamandyqtardy jaqsylap ıgerý kerek. Ol úshin "Jas maman" jobasy aıasynda sońǵy eki jylda 7 kolledjge zamanaýı jabdyqtar ornatyldy. Dýaldyq oqý tájirıbesi (jumys istep júrip oqý) keńinen engizilip jatyr. Sebebi jumysqa turǵanda túlekterdiń 75 paıyzyna deıin kóp nárseni jańadan úırenýge týra keledi eken.
Ekinshiden, jumysqa turýdy emes, alǵan mamandyǵyn kásipke aınaldyrýǵa tyrysý kerek. Batysta túlekterdiń 90 paıyzǵa jýyǵy “men qandaı kásip ashsam eken” degen oımen oqý ornyn bitiredi. Al bizde 90 paıyz túlek qaıda jumysqa tursam eken dep oılaıdy. Jumysqa turǵan jaqsy. Biraq kásip ashqan odan da jaqsy. Tabys artady, jańa jumys oryndaryn ashady.
Úshinshiden, stýdentter ónertabysqa umtylǵany jón. Kolledjdi aralap júrgenimde stýdentter “Jas maman” boıynsha alynǵan qytaı, nemis, ıspan quraldaryn qalaı paıdalana alatynyn kórsetti. Ony eger qoldanyp qana qoımaı, odan da shaǵyn ári arzan analogtaryn jasaı alsańdar, atalǵan ulttardan biz emes, olar bizden satyp alatyn bolady. Jas mamandar jumys ornyn ashatyn kásipker ǵana bolmaıdy, jańa ındýstrııany ornyqtyratyn ónertapqysh bolady.
Mamandardyń ósý traektorııasy mine osyndaı: jaqsy maman - myqty kásipker - jasampaz ónertapqysh.
Stýdentterdiń jeke jaýapkershiligi ózgeristen bastalady. Ózin ózgerte alǵan adam álemdi de ózgertedi. Al álem árkimnen bastaý alady.
Shyńǵys MUQAN
