شىڭعىس مۇقان: قازىرگىنىڭ جولاماندارىن جولعا سالايىق

2685
Adyrna.kz Telegram
تەرروريزمنىڭ قانداي بولاتىنىن العاش رەت 2012 جىلى كوردىم.
سول جىلى تامىز ايىندا اتىراۋ وبلىسى اكىمىنىڭ ورىنباسارى بولىپ تاعايىندالدىم. ءبىر ايدان سوڭ لاڭكەستىك ارەكەت بۇرق ەتە قالدى. ءبىر جىل بۇرىن دا سولاي بولعان. ەكى جىل قاتارىنان، سۇمدىق.
اتىراۋعا ءبىراز تەولوگتاردى شاقىردىق. كوبى شىمكەنتتىڭ جىگىتتەرى. مىقتى ماماندار. جۇمىس بارىسىندا ءتۇرلى اعىمداردىڭ جەتەگىندە كەتكەندەرمەن كەزدەستىم. سونداعى ءبىر كەزدەسۋ ەسىمە تۇسسە، الگە دەيىن دەنەم تۇرشىگەدى.
جاس جىگىت. اناسىمەن كەلدى. اناسى جىلاپ وتىر: «جالعىز ۇلىم ناماز وقي باستاعاندا قۋانىپ ەدىم. ءبىر ايدىڭ ىشىندە مىنەز-قۇلقى وزگەرىپ شىعا كەلدى. «ماما» دەپ موينىما اسىلىپ، بەتىمنەن ءسۇيىپ جۇرەتىن بالام مەنەن الىستاي باستادى. بىرنەشە ايدان كەيىن قارا جامىلعان ءبىر قىزدى الىپ كەلىپ، مەنىڭ ايەلىم دەپ تانىستىردى دا جەتەكتەپ بولمەسىنە كىرىپ كەتتى. ءاي-ءشاي دەپ ايتىپ ۇلگەرمەدىك. جاقسى دەدىك. بالام باقىتتى بولسا بولدى. كەلىن ەكەۋى بىزبەن تاماق ىشپەيدى. تۇسكە دەيىن ۇيىقتايدى. كۇماندى ادامدارمەن ارالاسادى…».
اناسىنا ءسوزىن اياقتاتپاي الگى ەڭگەزەردەي جىگىت: “سەندەر ناماز وقىمايسىڭدار. تاماقتارىڭ حالال ەمەس. كاپىرسىڭدەر”، - دەپ قويىپ قالدى.
شىنى كەرەك، ۇستىمنەن سالقىن سۋ قۇيىپ جىبەرگەندەي كۇي كەشتىم. كەيىننەن مۇندايلارعا ەتىم ۇيرەنىپ كەتتى.
الگىنىڭ بەتىنە قاراسام، كوزى قانتالاپ، الدىندا وتىرعان اناسىن جاۋ كورىپ وتىر.
بۇلىكشىل اعىمداردىڭ قاۋپىن سول كەزدە ءتۇسىندىم.
الگىنىڭ ايتماتوۆتىڭ “بوراندى بەكەتىندەگى” جولاماننان ايىرماشىلىعى جوق.
اتىراۋدا ەركىنبەك شوقاي، ەرسىن امىرە، قانات جۇماعۇل، ايبەك اسقاربەكۇلى، امانتاي ساديەۆ، باتىرجان بەردەنۇلى سىندى جىگىتتەرمەن جىلدار بويى ىرگەسىن قالاعان ەڭبەكتىڭ ناتيجەسىندە دەپ ويلايمىن، 2012 جىلدان بەرى اتىراۋدا لاڭكەستىك وقيعا بولمادى. بولماي-اق قويسىن.
سول كەزدەردەن باستاپ، وڭىرلەردە ءدىن ىستەرى باسقارمالارى قۇرىلا باستادى.
شىمكەنتتە 2020 جىلى ءدىن ىستەرى باسقارماسى قايتا قۇرىلدى. باسقارما جان جاقتى جۇمىس ىستەپ جاتىر.
2020 جىلى شىمكەنتتە دەسترۋكتيۆتى اعىمداردىڭ جەتەگىندە جۇرگەن 86 ادامنىڭ كوزقاراسى وزگەردى، بىلتىر 270 ادام ءداستۇرلى دىنگە ورالدى. ونىڭ استارىندا قانشاما جۇمىس جاتىر. ادامنىڭ ساناسىنان ساڭىلاۋ تاۋىپ، كوزقاراسىن وزگەرتۋدەن اۋىر جۇمىس جوق. قازاقستان قالالارىنىڭ ىشىندە ەڭ كوپ مەشىت شىمكەنتتە. قالادا 88 مەشىت بار.
كەشە وسى باعىتتا جۇمىس ىستەيتىن «اقنيەت قوعامدىق ۇيىمىنداعى قاري دىنتانۋشىلارمەن اقىلداستىم.
مەشىت قىزمەتكەرلەرى مەن جاماعات اداسىپ جۇرگەن باۋىرلارىمىزدى ءبىلىم مەن عىلىمدى، مەيىرىم مەن جاناشىرلىقتى امانات ەتكەن اسىل ءدىنىمىزدىڭ قۇندىلىقتارىنا قايتارا بەرەتىنىنە سەنىمىم مول.
قازاقتا “وزىڭە ءوزىڭ مىقتى بول، كورشىڭدى ۇرى ەتپە” دەگەن ءسوز بار. سول سەكىلدى ءار وتباسى، اۋىل، قالا وزىنە مىقتى بولسا، بۇلىكشىل اعىمدار ءبىزدى الا المايدى.
شىڭعىس مۇقاننىڭ جازباسىنان
"ادىرنا" ۇلتتىق پورتالى
پىكىرلەر