Terrorizmnıŋ qandai bolatynyn alǧaş ret 2012 jyly kördım.
Sol jyly tamyz aiynda Atyrau oblysy äkımınıŋ orynbasary bolyp taǧaiyndaldym. Bır aidan soŋ laŋkestık äreket būrq ete qaldy. Bır jyl būryn da solai bolǧan. Ekı jyl qatarynan, sūmdyq.
Atyrauǧa bıraz teologtardy şaqyrdyq. Köbı Şymkenttıŋ jıgıtterı. Myqty mamandar. Jūmys barysynda türlı aǧymdardyŋ jetegınde ketkendermen kezdestım. Sondaǧy bır kezdesu esıme tüsse, älge deiın denem türşıgedı.
Jas jıgıt. Anasymen keldı. Anasy jylap otyr: «Jalǧyz ūlym namaz oqi bastaǧanda quanyp edım. Bır aidyŋ ışınde mınez-qūlqy özgerıp şyǧa keldı. «Mama» dep moinyma asylyp, betımnen süiıp jüretın balam menen alystai bastady. Bırneşe aidan keiın qara jamylǧan bır qyzdy alyp kelıp, menıŋ äielım dep tanystyrdy da jetektep bölmesıne kırıp kettı. Äi-şäi dep aityp ülgermedık. Jaqsy dedık. Balam baqytty bolsa boldy. Kelın ekeuı bızben tamaq ışpeidı. Tüske deiın ūiyqtaidy. Kümändı adamdarmen aralasady…».
Anasyna sözın aiaqtatpai älgı eŋgezerdei jıgıt: “Sender namaz oqymaisyŋdar. Tamaqtaryŋ halal emes. Käpırsıŋder”, - dep qoiyp qaldy.
Şyny kerek, üstımnen salqyn su qūiyp jıbergendei küi keştım. Keiınnen mūndailarǧa etım üirenıp kettı.
Älgınıŋ betıne qarasam, közı qantalap, aldynda otyrǧan anasyn jau körıp otyr.
Bülıkşıl aǧymdardyŋ qaupın sol kezde tüsındım.
Älgınıŋ Aitmatovtyŋ “Borandy beketındegı” Jolamannan aiyrmaşylyǧy joq.
Atyrauda Erkınbek Şoqai, Ersın Ämıre, Qanat Jūmaǧūl, Aibek Asqarbekūly, Amantai Sadiev, Batyrjan Berdenūly syndy jıgıttermen jyldar boiy ırgesın qalaǧan eŋbektıŋ nätijesınde dep oilaimyn, 2012 jyldan berı Atyrauda laŋkestık oqiǧa bolmady. Bolmai-aq qoisyn.
Sol kezderden bastap, öŋırlerde Dın ısterı basqarmalary qūryla bastady.
Şymkentte 2020 jyly Dın ısterı basqarmasy qaita qūryldy. Basqarma jan jaqty jūmys ıstep jatyr.
2020 jyly Şymkentte destruktivtı aǧymdardyŋ jetegınde jürgen 86 adamnyŋ közqarasy özgerdı, byltyr 270 adam dästürlı dınge oraldy. Onyŋ astarynda qanşama jūmys jatyr. Adamnyŋ sanasynan saŋylau tauyp, közqarasyn özgertuden auyr jūmys joq. Qazaqstan qalalarynyŋ ışınde eŋ köp meşıt Şymkentte. Qalada 88 meşıt bar.
Keşe osy baǧytta jūmys ısteitın «Aqniet qoǧamdyq ūiymyndaǧy qari dıntanuşylarmen aqyldastym.
Meşıt qyzmetkerlerı men jamaǧat adasyp jürgen bauyrlarymyzdy bılım men ǧylymdy, meiırım men janaşyrlyqty amanat etken asyl dınımızdıŋ qūndylyqtaryna qaitara beretınıne senımım mol.
Qazaqta “Özıŋe özıŋ myqty bol, körşıŋdı ūry etpe” degen söz bar. Sol sekıldı är otbasy, auyl, qala özıne myqty bolsa, bülıkşıl aǧymdar bızdı ala almaidy.
Şyŋǧys Mūqannyŋ jazbasynan
"Adyrna" ūlttyq portaly
Ūqsas jaŋalyqtar
