Terrorızmniń qandaı bolatynyn alǵash ret 2012 jyly kórdim.
Sol jyly tamyz aıynda Atyraý oblysy ákiminiń orynbasary bolyp taǵaıyndaldym. Bir aıdan soń lańkestik áreket burq ete qaldy. Bir jyl buryn da solaı bolǵan. Eki jyl qatarynan, sumdyq.
Atyraýǵa biraz teologtardy shaqyrdyq. Kóbi Shymkenttiń jigitteri. Myqty mamandar. Jumys barysynda túrli aǵymdardyń jeteginde ketkendermen kezdestim. Sondaǵy bir kezdesý esime tússe, álge deıin denem túrshigedi.
Jas jigit. Anasymen keldi. Anasy jylap otyr: «Jalǵyz ulym namaz oqı bastaǵanda qýanyp edim. Bir aıdyń ishinde minez-qulqy ózgerip shyǵa keldi. «Mama» dep moınyma asylyp, betimnen súıip júretin balam menen alystaı bastady. Birneshe aıdan keıin qara jamylǵan bir qyzdy alyp kelip, meniń áıelim dep tanystyrdy da jetektep bólmesine kirip ketti. Áı-sháı dep aıtyp úlgermedik. Jaqsy dedik. Balam baqytty bolsa boldy. Kelin ekeýi bizben tamaq ishpeıdi. Túske deıin uıyqtaıdy. Kúmándi adamdarmen aralasady…».
Anasyna sózin aıaqtatpaı álgi eńgezerdeı jigit: “Sender namaz oqymaısyńdar. Tamaqtaryń halal emes. Kápirsińder”, - dep qoıyp qaldy.
Shyny kerek, ústimnen salqyn sý quıyp jibergendeı kúı keshtim. Keıinnen mundaılarǵa etim úırenip ketti.
Álginiń betine qarasam, kózi qantalap, aldynda otyrǵan anasyn jaý kórip otyr.
Búlikshil aǵymdardyń qaýpin sol kezde túsindim.
Álginiń Aıtmatovtyń “Borandy beketindegi” Jolamannan aıyrmashylyǵy joq.
Atyraýda Erkinbek Shoqaı, Ersin Ámire, Qanat Jumaǵul, Aıbek Asqarbekuly, Amantaı Sadıev, Batyrjan Berdenuly syndy jigittermen jyldar boıy irgesin qalaǵan eńbektiń nátıjesinde dep oılaımyn, 2012 jyldan beri Atyraýda lańkestik oqıǵa bolmady. Bolmaı-aq qoısyn.
Sol kezderden bastap, óńirlerde Din isteri basqarmalary quryla bastady.
Shymkentte 2020 jyly Din isteri basqarmasy qaıta quryldy. Basqarma jan jaqty jumys istep jatyr.
2020 jyly Shymkentte destrýktıvti aǵymdardyń jeteginde júrgen 86 adamnyń kózqarasy ózgerdi, byltyr 270 adam dástúrli dinge oraldy. Onyń astarynda qanshama jumys jatyr. Adamnyń sanasynan sańylaý taýyp, kózqarasyn ózgertýden aýyr jumys joq. Qazaqstan qalalarynyń ishinde eń kóp meshit Shymkentte. Qalada 88 meshit bar.
Keshe osy baǵytta jumys isteıtin «Aqnıet qoǵamdyq uıymyndaǵy qarı dintanýshylarmen aqyldastym.
Meshit qyzmetkerleri men jamaǵat adasyp júrgen baýyrlarymyzdy bilim men ǵylymdy, meıirim men janashyrlyqty amanat etken asyl dinimizdiń qundylyqtaryna qaıtara beretinine senimim mol.
Qazaqta “Ózińe óziń myqty bol, kórshińdi ury etpe” degen sóz bar. Sol sekildi ár otbasy, aýyl, qala ózine myqty bolsa, búlikshil aǵymdar bizdi ala almaıdy.
Shyńǵys Muqannyń jazbasynan
"Adyrna" ulttyq portaly
