تانىمال ادامدار نازارباەۆتان تەرىس اينالىپ جاتىر

2746
Adyrna.kz Telegram

ەكس-پرەزيدەنت نۇرسۇلتان نازارباەۆ بيلىكتەن ايىرىلىپ، وتباسى مۇشەلەرى قىزمەتتەن كەتىپ، تىزگىن پرەزيدەنت قاسىم-جومارت توقاەۆقا تيگەنى سول ەدى، كەيبىر جۇرت پرەزيدەنتتى ماقتاپ الا جونەلدى. ال وسى كۇنگە دەيىن نۇرسۇلتان نازارباەۆتى ماقتاپ كەلگەندەر ءبىر-اق كۇندە وزگەرىپ شىعا كەلدى. Nege.kz ءتىلشىسى ەكس-پرەزيدەنتى جەر-كوككە تيگىزبەي ماقتاپ كەلگەن مىرزاتاي جولداسبەكوۆ پەن اقىن نەسىپبەك ايتۇلىنا حابارلاسىپ كورگەن ەدى، دەپ حابارلايدى "ادىرنا" ۇلتتىق پورتالى.

مىرزاتاي جولداسبەكوۆ: داۆاي، پرەكراتي!

– ءسىز نۇرسۇلتان نازارباەۆپەن بىرگە بولدىڭىز. قازىر ەكس-پرەزيدەنت قايدا؟ بيلىكتە جۇرگەندە ماقتادىڭىز. بيلىكتەن كەتكەننەن كەيىن نەگە ىزدەمەيسىز؟

– مەنى ساياساتقا كوپ قوسا بەرمەشى، اينالايىن.

– ساياساتقا كەزىندە ارالاستىڭىز عوي...

– داۆاي، پرەكراتي!

– نازارباەۆ تۋرالى ەشتەڭە ايتپايسىز با؟

– ەشتەڭە ايتپايمىن قازىر. ول تۋرالى نە ايتاسىڭ قازىر؟

 كوپشىلىك ونى ايىپتاپ جاتىر, ءسىز دە ايىپتايسىز با، الدە ءالى دە جاقتايسىز با؟

– ...

كەزىندە نۇرسۇلتان نازارباەۆتى پايعامبارعا تەڭەگەن مىرزاتاي جولداسبەكوۆ ءتىلشى سۇراعىن تولىق تىڭداماستان تەلەفون تۇتقاسىن قويا سالدى.

نەسىپبەك ايتۇلى: قازىر وكىنەمىن...

– قازىر ءبارىمىز «نازارباەۆ قايدا؟» دەپ ىزدەپ جاتىرمىز عوي. تۇڭعىش پرەزيدەنت قازاقستاندا ما، الدە شەتەلدە مە؟ قالاي ويلايسىز؟

– مەن ونى يىسكەپ بىلەمىن بە؟ ونى ۇكىمەتتەن سۇرا. پرەزيدەنتتەن سۇرا. ءبىر بىلسە، توقاەۆ بىلەدى ونى. ودان باسقا كىم بىلەدى. سونداي سۇراق بولا ما ەكەن؟

– كەزىندە ەكس-پرەزيدەنتكە ارناپ «بايتەرەك» پوەماسىن جازىپ، ماقتاپ ەدىڭىز...

– ماقتادىق، نەسى بار؟! وندا ەلباسىن ماقتاعان جوقپىن. ول كەزدە استانا جونىندە جازدىم. ال ايتا بەر.

– پىكىرىڭىز وزگەرگەن جوق پا؟

– نازارباەۆتىڭ استانانى كوشىرۋدەگى تاريحي ەڭبەگىن جوققا شىعارۋعا بولمايدى. «بايتەرەك» پوەماسى 2003 جىلى جازىلدى. ودان بولەك شەتەلدە دە ميلليونداعان كىتاپ جازىلدى. سول كەزدە ول كىسىنىڭ ەڭبەگىن ايتتىق. استانانى اۋىستىرۋ مەن سولتۇستىك قازاقستان وبلىسىنداعى شەكارانى بەكىتۋى تاريحتان ەشقاشان وشپەيدى. ول – ۇلكەن ەڭبەك. ونى ءبىز قالاي جوققا شىعارامىز؟ ال ەندى ونىڭ سوڭى مىناداي بولعانىنا مەنىڭ قاتىسىم قانشا؟

 قازىر الەۋمەتتىك جەلىدە ەكس-پرەزيدەنتكە قاتتى سىن ايتىپ جاتىر. ءبىر كەزدەرى ماقتاعان ادامىڭىزدى اقتاپ الۋعا تىرىسپايسىز با?

– مەن نەگە اقتاۋىم كەرەك ونى؟! ەڭبەگى بارى – بار، استانانى اۋىستىرعانىن جوققا شىعارمايمىن. شەكارانى بەكىتكەنى، قازاقستاندى حالىقارالىق ارەنادا ايگىلەگەنى ايتىلدى. ودان كەيىن قازاقستاندى بوققا باتىرىپ، مىنا دۇنيەنىڭ بىت-شىتىن شىعارسا، مەن ونى نەگە اقتاۋىم كەرەك؟

– ءسىز سوندا نازارباەۆتى ايىپتاپ وتىرسىز با?

– مەن ەمەس، بۇكىل الەم سولاي ايتىپ جاتىر عوي. «قازاقستاننىڭ بۇكىل بايلىعىن ءبىر وتباسى قالتاسىنا سالىپ الدى» دەپ جاتىر. ونى مەن ايتىپ وتىرعان جوقپىن عوي.

– «بايتەرەك» پوەماسىن جازعان كەزدە مۇنى بىلمەدىڭىز بە؟

– ەي، اينالايىن، سەن قىرتپا، «بايتەرەك» قايدا؟! ودان كەيىن 20 جىل ءوتتى. داۆاي، باسىمدى اۋىرتپا! جيىرما جىلدا دۇنيە وزگەرمەي مە؟ ادام ءبىر-اق كۇندە وزگەرىپ جاتىر.

– جالپى جاعىمپازدىق دەگەنگە قالاي قارايسىز؟

– مەن جاعىمپازدانعان جوقپىن. دەر كەزىندە... تاۋەلسىزدىكتى جىرلادىم مەن!

– كەزىندە ماقتاپ پوەما جازعانىڭىزعا قازىر وكىنەسىز بە?

– قازىر وكىنەمىن…

P.S. مىنە، ءبىز سۇراۋ سالعان قايراتكەر مەن اقىننىڭ پىكىرى وسىنداي بولدى. تۇڭعىش پرەزيدەنت نۇرسۇلتان نازارباەۆتى ءبىر كەزدەرى جەر-كوككە سىيعىزباي ماقتاعاندار مەن وعان ارناپ پوەما جازعانداردىڭ قاراسى كوپ. الداعى ۋاقىتتا ولاردىڭ دا ويىن بىلۋگە تىرىسامىز.

سەرىك جولداسباي، 

"ادىرنا" ۇلتتىق پورتالى

پىكىرلەر