Eks-prezıdent Nursultan Nazarbaev bılikten aıyrylyp, otbasy músheleri qyzmetten ketip, tizgin prezıdent Qasym-Jomart Toqaevqa tıgeni sol edi, keıbir jurt prezıdentti maqtap ala jóneldi. Al osy kúnge deıin Nursultan Nazarbaevty maqtap kelgender bir-aq kúnde ózgerip shyǵa keldi. Nege.kz tilshisi eks-prezıdenti jer-kókke tıgizbeı maqtap kelgen Myrzataı Joldasbekov pen aqyn Nesipbek Aıtulyna habarlasyp kórgen edi, dep habarlaıdy "Adyrna" ulttyq portaly.
Myrzataı Joldasbekov: Davaı, prekratı!
– Siz Nursultan Nazarbaevpen birge boldyńyz. Qazir eks-prezıdent qaıda? Bılikte júrgende maqtadyńyz. Bılikten ketkennen keıin nege izdemeısiz?
– Meni saıasatqa kóp qosa bermeshi, aınalaıyn.
– Saıasatqa kezinde aralastyńyz ǵoı...
– Davaı, prekratı!
– Nazarbaev týraly eshteńe aıtpaısyz ba?
– Eshteńe aıtpaımyn qazir. Ol týraly ne aıtasyń qazir?
– Kópshilik ony aıyptap jatyr, siz de aıyptaısyz ba, álde áli de jaqtaısyz ba?
– ...
Kezinde Nursultan Nazarbaevty paıǵambarǵa teńegen Myrzataı Joldasbekov tilshi suraǵyn tolyq tyńdamastan telefon tutqasyn qoıa saldy.
Nesipbek Aıtuly: Qazir ókinemin...
– Qazir bárimiz «Nazarbaev qaıda?» dep izdep jatyrmyz ǵoı. Tuńǵysh prezıdent Qazaqstanda ma, álde shetelde me? Qalaı oılaısyz?
– Men ony ıiskep bilemin be? Ony Úkimetten sura. Prezıdentten sura. Bir bilse, Toqaev biledi ony. Odan basqa kim biledi. Sondaı suraq bola ma eken?
– Kezinde eks-prezıdentke arnap «Báıterek» poemasyn jazyp, maqtap edińiz...
– Maqtadyq, nesi bar?! Onda Elbasyn maqtaǵan joqpyn. Ol kezde Astana jóninde jazdym. Al aıta ber.
– Pikirińiz ózgergen joq pa?
– Nazarbaevtyń astanany kóshirýdegi tarıhı eńbegin joqqa shyǵarýǵa bolmaıdy. «Báıterek» poemasy 2003 jyly jazyldy. Odan bólek shetelde de mıllıondaǵan kitap jazyldy. Sol kezde ol kisiniń eńbegin aıttyq. Astanany aýystyrý men Soltústik Qazaqstan oblysyndaǵy shekarany bekitýi tarıhtan eshqashan óshpeıdi. Ol – úlken eńbek. Ony biz qalaı joqqa shyǵaramyz? Al endi onyń sońy mynadaı bolǵanyna meniń qatysym qansha?
– Qazir áleýmettik jelide eks-prezıdentke qatty syn aıtyp jatyr. Bir kezderi maqtaǵan adamyńyzdy aqtap alýǵa tyryspaısyz ba?
– Men nege aqtaýym kerek ony?! Eńbegi bary – bar, astanany aýystyrǵanyn joqqa shyǵarmaımyn. Shekarany bekitkeni, Qazaqstandy halyqaralyq arenada áıgilegeni aıtyldy. Odan keıin Qazaqstandy boqqa batyryp, myna dúnıeniń byt-shytyn shyǵarsa, men ony nege aqtaýym kerek?
– Siz sonda Nazarbaevty aıyptap otyrsyz ba?
– Men emes, búkil álem solaı aıtyp jatyr ǵoı. «Qazaqstannyń búkil baılyǵyn bir otbasy qaltasyna salyp aldy» dep jatyr. Ony men aıtyp otyrǵan joqpyn ǵoı.
– «Báıterek» poemasyn jazǵan kezde muny bilmedińiz be?
– Eı, aınalaıyn, sen qyrtpa, «Báıterek» qaıda?! Odan keıin 20 jyl ótti. Davaı, basymdy aýyrtpa! Jıyrma jylda dúnıe ózgermeı me? Adam bir-aq kúnde ózgerip jatyr.
– Jalpy jaǵympazdyq degenge qalaı qaraısyz?
– Men jaǵympazdanǵan joqpyn. Der kezinde... Táýelsizdikti jyrladym men!
– Kezinde maqtap poema jazǵanyńyzǵa qazir ókinesiz be?
– Qazir ókinemin…
P.S. Mine, biz suraý salǵan qaıratker men aqynnyń pikiri osyndaı boldy. Tuńǵysh prezıdent Nursultan Nazarbaevty bir kezderi jer-kókke syıǵyzbaı maqtaǵandar men oǵan arnap poema jazǵandardyń qarasy kóp. Aldaǵy ýaqytta olardyń da oıyn bilýge tyrysamyz.
Serik JOLDASBAI,
"Adyrna" ulttyq portaly
