اتىراۋ وبلىستىق تاريحي-ولكەتانۋ مۋزەيىنىڭ قورىن تولىقتىرعان قۇندى جادىگەرلەردىڭ ءبىرى سارايشىق قالاسىنىڭ قازباسىنان تابىلعان قىش ىدىس – البارەللو. قازبا جۇمىسى كەزىندە (2017ج.) تاندىر پەشتىڭ ءتۇتىن جۇرەتىن ارناسىنان ءبۇتىن كۇيىندە تابىلعان بولاتىن.
قىش ىدىستىڭ تۇلعاسى تسيليندر ءپىشىندى، ءتۇبى ساقينالى تۇعىرلى كەلگەن، ايىرىقشا كەڭ مويىندى. ىدىس سارعىش توپىراق تۇستەس سىرمەن سىرلانعان. سىرلى ىدىستىڭ تۇلعاسى ويۋلى كومپوزيتسيامەن كوركەمدەلگەن. تىك تىلىك سىزىقتارمەن سىزىلعان ءتورت جولاقتان تۇرادى، اراسىنا كولدەنەڭ بولىنگەن ەكى تراپەتسيا تۇرىندەگى بەلگىنى شتريحتاپ ورناتقان. جوعارى جاعىندا تورتجاپىراقتى گۇلدى فريز جۇرگىزىلگەن. يىق بولىگى تىك سىزىقتارمەن سەكتورلارعا بولىنگەن، بۇل بەلدەۋ 20 تراپەتسيادان تۇرادى. موينى شىرشا تارىزدەس ورنەكپەن اشەكەيلەنگەن. ءسىرا، ويۋلار جۇيەسى ىدىس مىندەتىندەگى جالپى لوگيكانىڭ ءمان ماتىنىندە وقىلسا كەرەك.
البارەللو - دارىلىك مايلار مەن سۇيىقتىقتاردى ساقتاۋ، تاسىمالداۋ ءۇشىن جاسالاتىن ارناۋلى ىدىس. بۇل ىدىستى ورتاعاسىرلاردا ۇلى جىبەك جولى بويىنداعى سارايشىققا قىرىمنان اكەلگەن بولۋى مۇمكىن دەپ جورامالدايمىز. ويتكەنى سول كەزدەردە قىرىم جاعالاۋىندا گەنۋيا كولونيالارى بولعانى ءمالىم. ال البارەللو الەمدە ەۋروپالىقتاردىڭ، اسىرەسە يتاليالىقتاردىڭ تەحنولوگياسى بويىنشا دايىندالعان ءونىم رەتىندە ەسەپتەلەدى. بىراق، ىدىستىڭ سارايشىقتا جاسالۋ مۇمكىندىگىن دە جوققا شىعارۋعا بولمايدى.
البارەللو اتاۋىنىڭ ماعىناسى تۋرالى ايتا كەتسەك، ءبىزدىڭ مۇنايلى ءوڭىر ادامدارى ءۇشىن «باررەل» ءسوزى بىرشاما تانىس بولار. مۇناي كولەمىنىڭ ولشەم بىرلىگىن باررەلمەن ەسەپتەيدى. باررەل اعىلشىن تىلىندە «بوشكە» دەگەن ءسوز. بۇل ءسوز اعىلشىن تىلىنە كونە فرانتسۋز تىلىنەن ەنسە، ءوز كەزەگىندە فرانتسۋزدارعا اراب تىلىنەن كىرگەن. «ءال» دەگەن اراب تىلىندەگى كومەكشى ءسوز وزىنەن كەيىن كەلەتىن سوزدەردىڭ تۇسىندىرمەسى رەتىندە قولدانىلادى.
البارەللو ىدىسىنىڭ ءپىشىنى دە بوشكە تۇرىندە جاسالعانى ءبىراز جايدى اڭعارتسا كەرەك.
