Talas burym, bishkek burym, osh burym

3018
Adyrna.kz Telegram

(Músin jaıly músin-jyr)

Jaqsy shyǵarma qashanda táýir dúnıege túrtki bolady. Alataýdyń arǵy betindegi aıyr qalpaqty aǵaıynnyń atyn jalpaq jurtqa tanytyp júrgen talantty músinshi qyz Tamıla Mamatova áleýmettik jelide "Qyrǵyz arýy" degen týyndysyn tanystyrǵan soń kóp uzamaı qazaq poezııasynyń jas dúldúli Mıras Asan óz paraqshasynda jańa ǵana jazǵan keremet óleńin jarııalady. Mırastyń músin jaıly músin-jyry músin qashaǵandaı ádemi órilipti. Poezııa, etnografııa, estetıka, ádemilik, ásemdik... Qysqasy, bári bar... Ult jyrynyń shyn sheberleriniń biri Abzal Bóken bul týyndyǵa "Myna óleń uqqanǵa, Músinnen de myqty bolyp shyqqandaı" dep laıyqty baǵa berdi. Nesi bar, shedevr týraly shedevr! Káne, sizder de oqyp kórińizder. Músin áne, óleń mine...
Sal balshyqty bıletip, qara tasqa til bitirgen Tamıla qyz, qazaq jyrynyń taǵy bir jaýharyn qabyl alyńyz!

QYRǴYZ ARÝY

(Músinshi Tamıla Mamatovanyń «Qyrǵyz arýy» músinin kórgende týǵan ekspromt óleń)

Qaı ǵasyrdan shyǵa keldiń has kerim,
Hordyń qyzy, hosh kerim!
Júzindeısiń aq semserdiń jarq etken,
Izindeısiń kesteniń!

Qaı ǵasyrdan kele jatsyń, qos burym,
Qom sýlardaı bulǵaqtap!
Talas burym,
Bishkek burym,
Osh burym,
Órgen sulý symbattap!

Qaı dáýirdiń jumbaǵysyń sheshpegen,
Qaı qalamnyń jyrlarysyń jazbaǵan?
Eńlikgúlsiń esh jahanda óspegen,
Qyzyl shoqsyń oı-oshaqta mazdaǵan!

Aq qamaryń shaǵylysyp ýaqytqa,
Aq tamaǵyń dáýirlerdi emintip.
Músinbisiń ornatylǵan baqytqa,
Álem yntyq,
Men yntyq!

Qaı aıyldyń balasy ediń qyrmyzy?
Qaı ǵalamnyń juldyzy ediń, juldyzy?
Seni jansyz músin deýge qımaımyn,
Eı, qyrǵyzdyń qypsha beldi úr qyzy!

Aq kóılegiń,
Aqsha júziń,
Aq aryń,
Sútteı appaq aıdan tamǵan aq nurym!
Qyzyl bórkiń,
Qyzyl beshpet,
Qamaryń,
Júregime baılap alǵan aqtyǵym!

Beý, qyrǵyzdyń qypsha bel qyz aıymy,
Boıy suńǵaq, bota kózdi moıyly!
Adamzattyń asyp týǵan arystan,
Seni jar ǵyp alar eken qaı uly?!

Bir qarasam Kúnikeısiń kúımeli,
Bir qarasam Jámılásiń beıneli!
Bir qarasam Qanykeısiń has sulý,
Er Manastyń súıgeni!

Súıgen júrek - kúıgen júrek kúldirep,
Janaryń ot naızaǵaıdaı tilgilep,
Qaı ǵasyrdan shyǵa keldiń eken sen,
Shoq tal úkiń shomyp nurǵa úlbirep!

Mıras Asan

Pikirler