Shymkenttikter Abaı Qunanbaıulynyń eskertkishine gúl shoqtaryn qoıdy. Uly aqynnyń 176-jyldyq mereıtoıyna baılanysty uıymdastyrylǵan marafonǵa qalalyq mádenıet basqarmasynyń qyzmetkerleri, mektep oqýshylary jáne abaıtanýshylar qatysty. Hákim Abaıdyń shyǵarmalaryn nasıhattaý kerekpiz degen zııaly qaýym ókilderi óz usynystaryn da jetkizdi.
Abaı kúnin shymkenttikter uly aqynnyń eskertkishine gúl shoqtaryn qoıyp, aǵartýshyny eske alýmen bastady. Mádenı sharaǵa qatysýshylardyń biri qalalyq máslıhat hatshysy Bahadyr Narymbetov Abaı shyǵarmalaryn durys qoldana almaı júrgenimizdi jetkizdi. Aıtýynsha, uly aqynnyń óleńderin mektep oqýshylaryna áli de bolsa tereńirek oqytý kerek. Sózinshe, «Ǵylym tappaı maqtanba» óleńin jeńil eken dep tek bastaýysh synypta ǵana jattatý qate. Ony eseıgennen keıin de maǵynasyn túsinýi tıis deıdi halyq qalaýlysy.
Bahadyr Narymbetov, Shymkent qalalyq máslıhat hatshysy: «Men ómir baqı aıtyp kelemin, kezinde ózimizge ákemiz de aıtqan. Qazir men de bala-shaǵama aıtyp kele jatqan jańaǵy bes asyl is. Ǵylym tappaı maqtanba. Sol bes asyl is pen bes dushpannyń árbir adamnyń ol júreginde bolýy kerek. Eger de biz sol bir-aq shyǵarmasyn negizge ala otyryp urpaq tárbıeleıtin bolsaq, biz eshqandaı utylmaımyz. Biz tek qana alǵa júremiz».
Al abaıtanýshynyń sózinshe, bizdiń qoǵam áli de hákim Abaıdy tanyp-bilgen joq. Bul datany belgileýdiń máni osynda jatyr. Qazirgi jastar da qazaq jazba ádebıetiniń, qazaq ádebı tiliniń negizin salýshy fılosofty tereń biledi dep aıta almaımyn deıdi ol.
Aqjol Qalashbek, abaıtanýshy: «Prezıdentimiz Qasym-Jomart Toqaev Abaı kúnin belgiledi. Ol kúndi ne úshin belgiledi? Ol kúndi belgileýdegi maqsat sol áli de Abaıdy eske alý, oılanýymyz kerek. Al endi Abaıdy eske alsaq, Abaıdy oqysaq, biz odan saıyn kóretinimiz tek paıda. Zııan joq. Endi mynaý baıaǵydan aıtyp júrmiz. Abaı degen arnaıy elimiz úshin ınstıtýt pa, akademııa ma ashyp qoısa. Ol da jaqsy. Mysaly, myna qytaılarda Konfýııı, nemisterde gete akademııasy bar».
Abaı kúni — elimizdiń merekelik kúntizbesine engen kún, biraq resmı demalys kúni bolyp sanalmaıdy. Úkimet Qaýlysymen 10 tamyz Abaı kúni bolyp belgilengen.
Aıta keteıik, Shymkentte Abaı kúnine oraı uıymdastyrylǵan sharalardyń basym bóligi onlaın formatta ótkiziledi. Búginde qalalyq mádenıet basqarmasynyń bastamasymen 12 is-shara josparlanyp otyr. Sondaı-aq uly aqynnyń shyǵarmalaryn dáripteý shaharda eki kúnge jalǵaspaq.
