شىمكەنتتە اباي ەسكەرتكىشىنە گۇل شوقتارى قويىلدى

1500
Adyrna.kz Telegram

شىمكەنتتىكتەر اباي قۇنانبايۇلىنىڭ ەسكەرتكىشىنە گۇل شوقتارىن قويدى. ۇلى اقىننىڭ 176-جىلدىق مەرەيتويىنا بايلانىستى ۇيىمداستىرىلعان مارافونعا قالالىق مادەنيەت باسقارماسىنىڭ قىزمەتكەرلەرى، مەكتەپ وقۋشىلارى جانە ابايتانۋشىلار قاتىستى. ھاكىم ابايدىڭ شىعارمالارىن ناسيحاتتاۋ كەرەكپىز دەگەن زيالى قاۋىم وكىلدەرى ءوز ۇسىنىستارىن دا جەتكىزدى.

اباي كۇنىن شىمكەنتتىكتەر ۇلى اقىننىڭ ەسكەرتكىشىنە گۇل شوقتارىن قويىپ، اعارتۋشىنى ەسكە الۋمەن باستادى. مادەني شاراعا قاتىسۋشىلاردىڭ ءبىرى قالالىق ءماسليحات حاتشىسى باحادىر نارىمبەتوۆ اباي شىعارمالارىن دۇرىس قولدانا الماي جۇرگەنىمىزدى جەتكىزدى. ايتۋىنشا، ۇلى اقىننىڭ ولەڭدەرىن مەكتەپ وقۋشىلارىنا ءالى دە بولسا تەرەڭىرەك وقىتۋ كەرەك. سوزىنشە، «عىلىم تاپپاي ماقتانبا» ولەڭىن جەڭىل ەكەن دەپ تەك باستاۋىش سىنىپتا عانا جاتتاتۋ قاتە. ونى ەسەيگەننەن كەيىن دە ماعىناسىن ءتۇسىنۋى ءتيىس دەيدى حالىق قالاۋلىسى.

باحادىر نارىمبەتوۆ، شىمكەنت قالالىق ءماسليحات حاتشىسى: «مەن ءومىر باقي ايتىپ كەلەمىن، كەزىندە وزىمىزگە اكەمىز دە ايتقان. قازىر مەن دە بالا-شاعاما ايتىپ كەلە جاتقان جاڭاعى بەس اسىل ءىس. عىلىم تاپپاي ماقتانبا. سول بەس اسىل ءىس پەن بەس دۇشپاننىڭ ءاربىر ادامنىڭ ول جۇرەگىندە بولۋى كەرەك. ەگەر دە ءبىز سول ءبىر-اق شىعارماسىن نەگىزگە الا وتىرىپ ۇرپاق تاربيەلەيتىن بولساق، ءبىز ەشقانداي ۇتىلمايمىز. ءبىز تەك قانا العا جۇرەمىز».

ال ابايتانۋشىنىڭ سوزىنشە، ءبىزدىڭ قوعام ءالى دە ھاكىم ابايدى تانىپ-بىلگەن جوق. بۇل داتانى بەلگىلەۋدىڭ ءمانى وسىندا جاتىر. قازىرگى جاستار دا قازاق جازبا ادەبيەتىنىڭ، قازاق ادەبي ءتىلىنىڭ نەگىزىن سالۋشى فيلوسوفتى تەرەڭ بىلەدى دەپ ايتا المايمىن دەيدى ول.

اقجول قالاشبەك، ابايتانۋشى: «پرەزيدەنتىمىز قاسىم-جومارت توقاەۆ اباي كۇنىن بەلگىلەدى. ول كۇندى نە ءۇشىن بەلگىلەدى؟ ول كۇندى بەلگىلەۋدەگى ماقسات سول ءالى دە ابايدى ەسكە الۋ، ويلانۋىمىز كەرەك. ال ەندى ابايدى ەسكە الساق، ابايدى وقىساق، ءبىز ودان سايىن كورەتىنىمىز تەك پايدا. زيان جوق. ەندى مىناۋ باياعىدان ايتىپ ءجۇرمىز. اباي دەگەن ارنايى ەلىمىز ءۇشىن ينستيتۋت پا، اكادەميا ما اشىپ قويسا. ول دا جاقسى. مىسالى، مىنا قىتايلاردا كونفۋتسيي، نەمىستەردە گەتە اكادەمياسى بار».

اباي كۇنى — ەلىمىزدىڭ مەرەكەلىك كۇنتىزبەسىنە ەنگەن كۇن، بىراق رەسمي دەمالىس كۇنى بولىپ سانالمايدى. ۇكىمەت قاۋلىسىمەن 10 تامىز اباي كۇنى بولىپ بەلگىلەنگەن.

ايتا كەتەيىك، شىمكەنتتە اباي كۇنىنە وراي ۇيىمداستىرىلعان شارالاردىڭ باسىم بولىگى ونلاين فورماتتا وتكىزىلەدى. بۇگىندە قالالىق مادەنيەت باسقارماسىنىڭ باستاماسىمەن 12 ءىس-شارا جوسپارلانىپ وتىر. سونداي-اق ۇلى اقىننىڭ شىعارمالارىن دارىپتەۋ شاھاردا ەكى كۇنگە جالعاسپاق.

پىكىرلەر